Ieremia
42 Ame hnene la itre tane isi, me Iohanana nekö i Karea, me Iezania nekö i Hosaia, memine la nöjei atr qane ju hi la ka co uti hë la ka tru, 2 hna qaja koi Ieremia perofeta ka hape: “Pane drenge ju la xëwe hun, nge thithi sai huni jë koi Iehova Akötresi ö, me thatraqane la itre ka lapa pe. Ke eö hi la a goeën laka, ala nyimu huni ekö, ngo ala xalaithe pe hi huni enehila. 3 Pane hnyingëne jë koi Iehova Akötresi ö la gojeny nyine tro huni a trongën, memine la nyine tro huni a kuca.”
4 Matre öni Ieremia perofeta jë hi: “Ka loi. Tro ni a thithi koi Iehova Akötresi epun, tune la hnei epuni hna sipon. Nge tro pë hë ni a thuemacanyi epun la hna qaja hnei Iehova. Pëkö hnenge hna troa juetrën koi epun.”
5 Nge sa jë hi angatr koi Ieremia ka hape: “Epi tro Iehova, lo temoë ka nyipici me meköt a cile koi hun, e tha trongëne hnyawa kö hun la hna amekötin hnei Iehova Akötresie, jën eö. 6 Ngacama loi ju hë maine ngazo la hnei nyidrëti hna troa qaja, ngo tro kö huni a drengethenge Iehova Akötresi së, lo hne huni hna upi ö kow. Matre tro ha tro loi la mele hun, e tro huni a drengethenge Iehova Akötresi së.”
7 Thupene la 10 lao drai, hnei Iehova hna ewekë koi Ieremia. 8 Ame hnei Ieremia hna hë Iohanana nekö i Karea, me itre tane isi ka ce me angeic, memine la nöjei atr asë qane ju hi la ka co uti hë la ka tru. 9 Öni angeice jë hi: “Hane hi la hna qaja hnei Iehova Akötresi Isaraela, lo hnei epuni hna upi ni kow matre xëwe sai epun: 10 ‘Maine tro epuni a lapa ngöne la nöje ce, tro ni a xupi epun, nge tha tro kö ni a thëtriji epun, eje hi, tro ni a traa epun, nge tha tro kö ni a fejetriji epun. Ke tro ni a hace fë la akötr hnenge hna axulun koi epun. 11 The xouene kö la joxu ne Babulona, lo hnei epuni hna xouen.’
“‘The xoue angeice kö, ke ce eni me epun matre amele epun, me thepe epuni qa ngöne la ime i angeic,’ öni Iehova. 12 Nge tro ni a utipi epun, nge tro fe angeic a utipi epun me bëeke sai epuni kowe la nöje i epun.
13 “‘Ngo maine tro epuni a hape: “Waea, tha tro kö huni a lapa ngöne la nöje ce!” nge maine tha drenge kö epuni la hna qaja hnei Iehova Akötresi epun, 14 me hape: “Waea, tro pe huni a tro Aigupito; tha tro kö huni a atre la isi e cili, me drenge la trutru, me pë falawa; e cili hi la hne huni hna troa lapa.” 15 Matre, epun itre ka lapa pe e Iudra, drenge ju la hna qaja hnei Iehova. Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Maine xecie hnyawa koi epun troa tro Aigupito me lapa* e cili, 16 haawe, tro ha traqa koi epuni e Aigupito la isi* hnei epuni hna xouen, nge tro la jiin hnei epuni hna xouen a xötrethenge epuni uti hë e Aigupito, nge tro hë epuni a meci e cili. 17 Ame asë hi la nöjei atr ka mekun troa tro Aigupito, tro hë angatr a meci hnene la isi,* me jiin, me itre meci ka ixötrekeu.* Pëkö ala cas thei angatr ka troa mel, me kötren la ngazo hnenge hna troa axulun koi angatr.”’
18 “Ke hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Tune lo kola nenge la elëhning me trengehning kowe la angetre Ierusalema, tro fe ni a nenge la trengehning hui epun, e tro epuni a tro Aigupito. Tro pë hë la itre atr a qeje epun ngöne la kola ieji, me xouene la ewekë ka traqa koi epun. Tro ha eji epun me thaipië epun, nge tha tro hmaca kö epuni a öhne la götrane ce.’
19 “Ase hë Iehova hmekë epun, itre atrene Iudra ka mele pe! The tro pi kö a tro Aigupito. Trotrohnine hnyawa ju la: eni a hmekë epuni enehila 20 laka, tro epuni a mec pine la ngazo i epun. Hnei epuni hna upi ni troa hnying koi Iehova Akötresi epun. Öni epuni lo: ‘Thithi sai huni jë koi Iehova Akötresi së. Nge thuemacanyi huni jë la hna troa qaja hnei Iehova Akötresi së, nge tro huni a trongën.’ 21 Nge enehila, ase hë ni thuemacanyi epuni la hnei nyidrëti hna qaja. Ngo tha tro kö epuni a drengethenge Iehova Akötresi epun, nge tha tro kö epuni a kuca la hnei nyidrëti hna upi ni troa qaja. 22 Haawe, trotrohnine hnyawa ju la: tro hë epuni a meci hnene la isi,* me jiin, me meci ka ixötrekeu ngöne la nöj hnei epuni hna pi lapan.”