Esodro
8 Nge öni Iehova koi Mose ka hape: “Tro jë koi Farao, nge qaja jë ka hape, ‘Hane hi la hna qaja hnei Iehova, nue pi la nöjeng matre tro angatr a nyihlueng. 2 Nge maine xele pala kö eö, tro ni a kuca matre troa haöthe la nöje i eö hnei itre grenui. 3 Tro ha haöthe la Nil hnei itre grenui. Nge tro ume ej a tro qa lai, me löthe la uma i eö, me hnahage i eö, me elë hune la göhnë i eö. Nge tro ume ej a lö hnine la itre uma ne la itre hlue i eö, me tro nyipine la nöje i eö, me ngöne la itre hnë öl, me ngöne la itre hnë sa falawa*. 4 Tro la itre grenui a sesë hui eö, me nöje i eö, me nöjei hlue i eö.”’”
5 E thupen, hnei Iehova hna qaja koi Mose ka hape: “Hape jë koi Arona, ‘Xome jë la sine tö i eö, nge köjane pi la itre timi ka neni, me itre jë i tim ka tro qa ngöne la Nil, me itre an, nge axulune pi la itre grenui, matre tro ume ej a haöthe la nöje Aigupito asë.’” 6 Arona a xejë jë la sine tö i angeic, me köjane la itre timi ne Aigupito. Ame hna xulu pi la itre grenui, nge ume ej a haöthe jë la nöj. 7 Ngo hnene fe la itre atre huuj ka trene haze hna kuca tun, jëne la itre haze i angatr hna juetrën. Hnei angatre fe hna axulune la itre grenui ngöne la nöje Aigupito. 8 Nge Farao a hë Mose jë me Arona, me hape: “Pane xëwe sai ni jë koi Iehova, matre tro nyidrëti a apatrene qaathenge la itre grenui, me qaathene la nöjeng. Ke tro hë ni a nue la nöje i epon troa huuje koi Iehova.” 9 Matre öni Mose jë hi koi Farao: “Qanyi nyipëti kö qaja koi ni ka hape, eu la tro ni a xëwe sai nyipë koi Akötresie, matre patre pi la itre grenui qaathei nyipë, me itre hlue i nyipë, me nöje i nyipë, me itre uma i nyipë. Ngo tro hi a hetreny ngöne la Nil.” 10 Nge öni Farao: “Elany.” Matre öni Mose: “Tro ha eatr la hnei nyipëti hna sipon, matre tro hë nyipëti a atre laka, pëkö ka ceitu me Iehova Akötresi hun. 11 Tro la itre grenui a tro qaathei nyipë, me itre uma i nyipë, me itre hlue i nyipë, me nöje i nyipë. Ngo tro pe hi a hetreny ngöne la Nil.”
12 Ame la Mose me Arona a tro qaathei Farao, hnei Mose hna xëwe sai Farao koi Iehova, pine la itre grenui hna axulune koi Farao. 13 Ame hnei Iehova hna kapa la sipo i Mose, nge kola mec la itre grenui hnine la itre uma, me tröne la itre uma, me ngöne la itre hlapa. 14 Ame hna ce xawan itre ej, me kuci nyimu ta, matre pi asë hë la nöj. 15 Nge ame la Farao a öhne laka, uqa ha la nöj, nyidrëti a axetine ju la hni nyidrë, nge tha drei Mose kö me Arona, tune lo hna qaja hnei Iehova.
16 Nge öni Iehova koi Mose: “Qaja ju koi Arona ka hape, ‘Xejë jë la sine tö i eö, nge lepe ju la xaxau, matre nyi tresitre pi ngöne la nöje Aigupito asë.’” 17 Celë hi hnei nyidroti hna kuca. Hnei Arona hna xejë la sine tö i angeic, me lepe la xaxau nge kola lapane la itre atr me itre öni hnene la itre tresitr. Nge tresitre asë hë la so ne dro ne Aigupito. 18 Matre hnene la itre atre huuj ka trene haze hna tupathe troa tun, ene la troa axulune la itre tresitr jëne la itre haze i angatr hna juetrën, ngo thatreine kö angatr. Nge kolo pala hi a heje la itre atr me itre öni hnene la itre tresitr. 19 Ame hnene la itre atre huuj ka trene haze hna qaja koi Farao ka hape: “Hene wanakoime i Akötresieti lai.” Ngo Farao pala hi a axetine la hni i nyidrë, nge xele kö nyidrëti ma drei angatr, tune lo hna qaja hnei Iehova.
20 Ame hnei Iehova hna qaja koi Mose ka hape: “Canga ilë jë e hmahmakany, nge tro jë troa ixelë me Farao, ke angeic a troa uti kowe la Nil. Tro hë eö a qaja ka hape, ‘Hane hi la hna qaja hnei Iehova, “nue pi la nöjeng matre tro angatr a nyihlueng. 21 Ngo e xele eö, tro ni a upe la itre neng ka ihej koi eö, me kowe la itre hlue i eö, me nöje i eö, me hnine la itre uma i eö.* Tro la itre hnalapa ne Aigupito a tiqa hnei neng ka ihej, nge tro fe ume ej a haöthe la ihnadro. 22 Ngöne la drai cili, isa pengöne kö la aqane tro ni a ujë kowe la nöje Gosena, lo hna lapan hnene la nöjeng, tha tro kö a hetre nenge ka ihej e cili. Qa ngöne lai, tro hë eö a atre laka, ame ni Iehova, eni e celë ngöne la nöj. 23 Eje hi, tro ni a aisane la nöjeng, me nöje i eö. Tro la hatrene cili a mama elany.”’”
24 Nge celë hi hna kuca hnei Iehova. Hna löthe la uma i Farao hnene la itre nenge ka ihej, me itre hnalapa ne la itre hlue i nyidrë, me nöje Aigupito asë. Hna lepe la nöj asë hnene la itre nenge ka ihej. 25 Ame hnei Farao hna hë Mose me Arona me hape: “Tro jë epuni a huuj kowe la Akötresi epun, ngo e celë ngöne la nöj.” 26 Ngo öni Mose ka hape: “Tha loi kö e tro huni a kuca tun, ke tro la angetre Aigupito lai a sisine la itre huuj hne huni hna troa huujëne koi Iehova Akötresi hun. Nge e tro huni a huujën qëmeke i angatr la hnei angatre hna sisin, hapeu, tha tro jë kö angatre lai a tranyi huni hnei etë? 27 Tro pe huni a tro kowe la hnapapa, a traqa koi köni drai ne tro. Nge e cili, tro huni a huuj koi Iehova Akötresi hun, tune lo hnei nyidrëti hna qaja.”
28 Öni Farao jë hi: “Tro hë ni a nue epun troa huuje koi Iehova Akötresi epun ngöne la hnapapa. Ngo casi hi, the tro kö e gaa nany. Xëwe sai ni jë kowe la Akötresi epun.” 29 Nge öni Mose jë hi: “Enehila, tro hë ni a nue nyipë, me xëwe koi Iehova. Nge elany, tro hë la itre nenge ka ihej a ananyi Farao, me itre hlue i nyidrë, me nöj i nyidrë. Ngo tha tro hmaca kö Farao a iaö* hun, me cipane la nöj troa huuje koi Iehova.” 30 Matre Mose a tro ju qaathei Farao, me xëwe koi Iehova. 31 Nge Iehova a kapa ju la sipo i Mose. Matre hnene la itre nenge ka ihej hna ananyi Farao, me itre hlue i nyidrë, me nöje i nyidrë. Pë hë ca nenge ka ihej. 32 Ngo Farao a axetine hmaca ju la hni nyidrë, nge nyidrëti a cipane hmaca jë la nöj.