Ieremia
22 Hane hi la hna qaja hnei Iehova: “Tro jë kowe la uma ne la joxu ne Iudra troa tro fë la maca celë. 2 Tro eö a qaja koi angeic ka hape: ‘Drenge ju la trengewekë i Iehova, eö joxu ne Iudra ka lapa hune la therone i Dravita. Nge loi e tro fe a dreng hnene la itre ka huliwa koi ö me nöje i ö, lo itre ka lö qa ngöne la itre qëhnelö celë. 3 Hane hi la hna qaja hnei Iehova: “Isigöline jë la meköt me thiina ka meköt. Cilëgöline jë la itre hna qenatrekënön. The qanangazone kö la itre trenyiwa. The akötrëne kö la itre hna mecitrij hnei kem me itre sine föe. Nge the anenine kö ngöne la nöje ce, la madra ne la itre ka pë engazon. 4 Ke maine tro epuni a isin troa trongën la itre hnenge hna qaja, tro hë la itre joxu ka lapan la therone i Dravita, a tithe la itre ikariota me itre hos, matre lö qa ngöne la itre qëhnelö ne la hnanyijoxu cememine la itre ka huliwa i angatr, me nöje i angatr.”’
5 “‘Ngo maine tha drenge kö epuni la itre trengewekë cili,’ öni Iehova, ‘eni a sisinyi ngöne la meleng laka, tro ha patre la hnanyijoxu celë.’
6 “Ke hane hi la hna qaja hnei Iehova göne la hnanyijoxu ne Iudra:
‘Ame koi ni, ceitui ö me Gileada,
Ceitui ö memine la he ne la Lebanona.
Ngo tro ni a kuca matre hnapapa pi ö;
Tha tro hmaca kö a lapan la itre traone i ö.
7 Eje hi, tro ni a hën* la itre ka iapatreny matre lepi ö,
Angatr me itre jia ne isi i angatr.
Tro hë angatr a satrije la itre arasi i ö ka mingöminge catr
Matre troa kei ngöne la eë.
8 “‘Nge tro la itre nöj ka nyimutre a cili thenge me goeëne la traon, me hnying ka hape: “Hnauëne la Iehova a kuca tun kowe la traon ka tru celë?” 9 Nge tro ha sa koi angatr: “Ke hnei angatr hna nuetrij la isisinyikeu i Iehova Akötresi angatr, me thil me nyihluen la itre xaa haze.”’
10 The treije pine kö la ka mec,
Nge the latresi pi angeice kö.
Ngo treije catre jë pe göne la ka tro,
Ke tha tro hmaca kö angeic a bëek me öhne la nöj hna hnaho angeice ngön.
11 “Ke hane hi la hna qaja hnei Iehova göi Saluma* nekö i Iosea, lo joxu ne Iudra ka nyihnai Iosea me trotrij la götrane ce: ‘Tha tro kö angeic a bëek a tro celë, 12 ke tro angeic a mec ngöne la nöj hna kötre sai angeice kow, nge tha tro hmaca kö angeic a öhne la nöje ce.’
13 Ekölöhini la atre xupi uma, ngo tha thenge kö la meköt
Nge ka xup la itre xaa hnahag e koho, ngo tha thenge kö la thiina ka meköt,
Nge ka musinën la atre lapa easenyi angeic troa huliwa koi angeic,
Ngo tha hna nyithupene pe;
14 Lo atre qaja ka hape: ‘Tro ni a xupi umang atraqatr
Me itre hnahag ka tru e koho.
Tro ni a kuca la itre mamalama
Me heetrën la uma hnei inehe arasi me peidrën hnei ka madra.’
15 Hapeu, tro pala kö eö a mus, ke tru la arasi hnei ö hna huliwan hui itre xan?
Hnene fe la keme i ö hna hane xeni me ij,
Ngo ame kö nyidrë, hnei nyidrëti hna isigölin la meköt me thiina ka meköt,
Matre hna tro loi la mele i nyidrë.
16 Hnei nyidrë hna cilëgöline la emekötine la itre ka akötr me itre ka pë ewekë,
Matre kola tro loi asë.
‘Hapeu, tha celë kö aqane ujë ne la itre ka selën ka hape, ka atre ni?’ öni Iehova.
17 ‘Ngo ame kö eö, casi hi la hna thel hnene la luemeke i ö me hni i ö: troa kepe thupen qa ngöne la hna huliwa qenatrekënö,
Troa anenine la madra ne la itre ka pë engazon,
Me iaö me atrekënö.’
18 “Qa ngöne lai, hane hi la hna qaja hnei Iehova göi Iehoiakima, nekö i Iosea joxu ne Iudra,
‘Tha tro kö a hnëmeci angeic me hape:
“Ekölöhini la trejin me eni! Ekölöhini ö sine la madrang!”
Tha tro kö a hnëmeci angeic me hape:
“Ekölöhini joxu! Ekölöhini pë hë la lolo i nyidrë!”
19 Tro ha kelemi angeic tune la aqane kelem la boliko,
Tro ha hule zozon la ngönetrei i angeic me kuiën
E tröne la itre qëhnelö ne Ierusalema.’
20 Elë jë* a tro Lebanona nge sue jë!
Epi troa mexem la nine i ö e Basana,
Nge sue jë qa ngöne la itre wetr ne Abarima!
Ke asë hë lep anyilanyilan la itre hanyi ö.
21 Ame ngöne lo eö a mele tingeting, hnenge hna ithanata koi ö!
Ngo öni ö: ‘Tha tro kö ni a dreng.’
Celë hi aqane ujë i ö qaane lo eö a co,
Eje hi, tha hnei ö kö hna drei ni.
22 Tro la enyi a xom ananyin* la itre ka thupë mamoe i ö,
Nge tro ha kötre fë la itre hanyi ö.
E cili, tro eö a hmahma nge troa thaipië eö pine la nöjei akötre i ö.
23 Atre lapa e Lebanona fe,
Ka mele nyipine la itre sinöe arasi,
Tha aqane tro kö eö a hokötr e traqa pi la akötr,
Tune la föe ka hnaho!”
24 “‘Maine nyipici laka, ka mele ni,’ öni Iehova, ‘ngacama tro ju hë Konia* nekö i Iehoiakima joxu ne Iudra, a tune la otrene wanakoim nyine pelehatren ngöne la ime macang, ngo tro kö ni a huletriji angeice qa lai! 25 Tro ni a nu eö kowe la itre ka thele troa humuthi ö, eje hi, kowe la itre hnei ö hna xouen, ene Nebukaneza* joxu ne Babulona me angetre Kaledaia. 26 Tro ni a hnatriji ö me thine i ö atre hnaho eö kowe la nöje trenyiwa, ketre nöj laka, tha hna hnaho epone kö e cili, nge hnë tro epon a mec. 27 Nge tha tro hmaca kö angatr a bëek kowe la nöj hnei angatr hna treije pin.
28 Ame Konia ke, hapeu, tha ceitui angeice kö me ketre trengen ka kaqa nge hna methinën,
Nge hna xele ma wang?
Hnauëne laka, hna triji angeic me itre matra i angeic e kuhu hnadro
Me kuië angatr kowe la nöj hnei angatre hna thatre?’
29 Ihnadro* fe, ihnadro, ihnadro! drei Iehova ju.
30 Hane hi la hna qaja hnei Iehova:
‘Sija ju la ëje ne la atre celë kösë lo ka pë kuku,
Kösë pëkö ewekë ka loi hnei angeic hna kuca ngöne la mele* i angeic,
Ke pëkö ca matra i angeic ka troa atreine
Lapan la therone i Dravita, me musi e Iudra.’”