Nyima i Solomona
5 “Trejine hniminang,*
Lö hë ni ngöne la hlapang.
Hnenge hna huji muro me itre dröne hnitr ka pui lolo.
Hnenge hna iji la miel ne la ume bii;
Hnenge hna iji la wainang me melekeng.”
“Epun itre sinee hun, ange xeni jë!
Iji jë nge ahmo epuni jë hnene la itre hatrene ihnim!”
2 “Eni a meköl, ngo ka hlë la hning.
Drenge hi ni la hniminang a fenifeni qëhnelö!
‘Trejine hniminang, pane fe pi koi ni,
Neköi pinying, me sineeng ka lolo!
Ke hmuhmu hë la heng hnei xaxapo,
Me peneheng hnene la wene lepanyi ne la jidr.’
3 Ase hë ni una la iheetreng.
Hapeu, tro hmaca kö ni a heetrën?
Ase hë ni wasine la lue cang.
Hapeu, tro hmaca kö ni a adron?
4 Hnene la hniminang hna hule hmaca la iwanakoime i angeic qa ngöne la gaa xulu ne la qëhnelö,
Nge kola manomano la wenethëhming pi angeic.
5 Hnenge hna mejë troa fe kowe la hniminang;
Kola neni la muro ngöne la lue iwanakoimeng,
Me oele ne muro ngöne la itre hene wanakoimeng,
Me hune la nyine thingi qëhnelö.
6 Hnenge hna fe kowe la hniminang,
Ngo koilo hmaca ha la hniminang, patre hë angeic.
Hace catre la hning la angeic a tro.*
Hnenge hna thele angeic, ngo tha öhnyi angeice kö ni.
Hnenge hna hë, ngo tha sa kö angeic.
7 Hnenge hna ixelë memine la itretre thup ka tro kanothe la traon.
Hnei angatr hna lepi ni me eatrë ni.
Hnene la itre ka thupëne la itre hag hna huletrije la isoleng.
8 Itre jajiny ne Ierusalema fe, pane sisinyi jë koi ni ka hape:
Maine tro epuni a iöhny memine la hniminang,
Ke qaja ju koi angeic ka hape, eni a hmo sai angeic.”
9 “Nemene la ka sisitria thene la hnimina i ö hune la itre xan,
Eö föe ka mingöminge catre kö?
Nemene la ka sisitria thene la hnimina i ö hune la itre xan,
Matre eö a sipo hun troa sisiny koi ö?”
10 “Ka mingöming me egöcatre la hniminang;
Mama cile kö angeic e nyipine la ala 10 000.
11 Ame la he i angeic, ke gool, nyipi gool.
Ceitune hi la itre penehe i angeic me itre dröne pama ka elelewa,*
Ka wetrewetr tune la halo.
12 Ceitune hi la luemeke i angeic me itre piny ezine la itre tim,
Ka sië melek,
Nge ka të ezine la ketre basë ka tiqa gala.*
13 Ceitune hi la lue itrasitre i angeic memine la ketre götran gaa cia hnitr ka pui lolo,
Itre sasala hna haöthe hnene la itre haö ka pui lolo.
Ceitune hi la ukeineqë i angeic me itre lili, nge kola neni qa ngön, la oele ne muro.
14 Hna kuca hnei gool la itre hene wanakoime i angeic, nge hnei berulo la itre itaime i angeic.
Hna kuca hnei jia ne elefa ka ucici lolo la hni i angeic, nge hna amingömingön hnei safairo.
15 Ceitune hi la lue ca i angeic me lue ikapa hna kuca hnei etë ka mingöming, nge hna atë hune la itre trepen hna kuca hnei nyipi gool.
Ceitui angeice hi memine la Lebanona, nge mingöminge catre angeic tune la itre sinöe arasi.
16 Ka menyike pi hë la ukeineqë* i angeic,
Nge hna ajan asë hi thei angeic.
Itre jajiny ne Ierusalema, celë hi pengöne la hniminang, eje hi, pengöi angeice hi lai.”