Iosua

17 Thupene lai, hnene la tribu i Manase, lo pane nekö i Iosefa, hna kapa la götrane i angatr qa ngöne la hna uthidrönegöti.* Ame Makiri, lo pane nekö i Manase, keme i Gileada, ke ketre atr ka isi angeic; matre hna hamë angeic la nöje Gileada me Basana. 2 Nge ame la itre xaa matra i Manase, ke hna hamë götrane i angatre fe qa ngöne la hna uthidrönegöti,* thenge la itre fami i angatr: ene la itre nekö i Abiezera, me itre nekö i Heleka, me itre nekö i Aseriela, me itre nekö i Sekema, me itre nekö i Hefera, me itre nekö i Semida. Celë hi la itre trahmanyi ka xulu qaathei Manase nekö i Iosefa, thenge la itre fami i angatr. 3 Ngo ame kö Zelofeada nekö i Hefera, lo nekö i Gileada nekö i Makiri, lo nekö i Manase, ke pë fe kö nekö i angeic trahmany, ngo itre jajinyi pe. Hane hi la ëjene la itre nekö i angeice jajiny: Mala, Noa, Hogela, Mileka, me Tireza. 4 Hnei angatr hna tro troa wai Eleazara atre huuj, me Iosua nekö i Nuna, memine la itre tan, me hape: “Hnei Iehova hna amekötin koi Mose troa thue götrane hun, tune lo hna kuca kowe la itre xa* i eahun.” Haawe, tune lo hnei Iehova hna amekötin, hna hamë götrane i angatr, tune lo aqane kuca kowe la itre trejin ne la keme i angatr.*

5 Hna hamëne fe la 10 lao götran koi Manase, matre nyixane la nöje Gileada me Basana, lo lue ka ej ngöne la ketre götran* ne la hneopegejë Ioridrano, 6 ke hna hamë götrane fe kowe la itre nekö i Manase jajiny,* tune la itre nekö i angeic trahmany.* Matre hna hamëne pë hë la nöje Gileada kowe la itre xaa matra i Manase.

7 Ame la ifego ne la götrane i Manase, ke kola tro qa Asera uti hë e Mikematha qëmekene Sekema, me uti hmaca a tro kolojë,* hmekune la götran hna lapan hnene la angetre Eni-Tapua. 8 Matre ame hë la nöje Tapua, ke zi i Manase. Ngo ame kö la traon ne Tapua, lo ka ej ngöne la ifego i Manase, ke götran ne la itre matra i Eferaima. 9 Ame la ifego, ke ej a uti kowe la tim Kana, ngöne la götrane kolojë ne la tim. E cili fe la itre xaa traone i Eferaima nyipine la itre götrane i Manase; ame la ifego i Manase, ke ej a tro ngöne la götrane kolopi ne la tim, me hmaca ngöne la hnagejë. 10 Matre ame la itre götran e kolojë, ke zi i Eferaima, nge ame la itre götran e kolopi, ke zi i Manase.* Nge hna nyi ifegone la itre götrane i Manase hnene la hnagejë. Ame la götrane i Manase e kolopi, ke kola tro uti hë e Asera, nge ame la götrane i angeic e koië, ke kola tro uti hë e Isakara.

11 Ame ngöne la itre götrane i Isakara me Asera, hnei Manase hna kapa la itre götrane celë: Bethe-Seana me itre traon ezin, me Ibeleama me itre traon ezin, me Dora me itre traon ezin, me itre ka lapa e cili, me Eni-Dora me itre traon ezin, me itre ka lapa e cili, me Tanaka me itre traon ezin, me itre ka lapa e cili, me Megido me itre traon ezin, me itre ka lapa e cili, lo köni gaa draië.

12 Ngo thatreine ju kö la itre matra i Manase troa thapa la itre traone cili; xele kö la angetre Kanana ma mejë qa lai. 13 Matre ame ju hi la kola catr la nöje Isaraela, hnei angatr hna thahluën la angetre Kanana, ngo tha helë angatre pe.

14 Ame hnene la itre matra i Iosefa hna wai Iosua me hape: “Hnauëne laka, casi hi la götran hnei ö hna uthidrönegötiën* koi hun? Nöje ka ala nyimu huni la, ke hnei Iehova hna amanathithi hun uti hë enehila!” 15 Matre sa jë hi Iosua ka hape: “Maine ala nyimu epun, elë jë ngöne la hnaxulu, nge qeuthe jë la ketre götrane thatraqai epun ngöne la nöje Perizi me Refai, ke tha ijiji epuni kö la itre wetr ne Eferaima.” 16 Önine jë hi la itre matra i Iosefa: “Tha ijije kö la itre wetr koi hun, nge ame asë hi la angetre Kanana ka lapa ngöne la hnathup, lo itre ka lapa e Bethe-Seana me itre traon ezin, me ngöne la hnathup e Iezerela, ke hetre ikatre i angatr, nge hna acatrene la itre fao ka ixöj ngöne la itre wiil.*” 17 Matre öni Iosua jë hi kowe la itre matra i Iosefa, ene la tribu i Eferaima me Manase: “Ka ala nyimu catr epun, nge ka catr epun. Tha tro hmekuje kö a uthidrönegötiën* la ketre götrane koi epun, 18 ngo tro fe a hamë epun la itre wetr. Maine nyipici laka, hnaxulu, ngo tro pe epuni a qeuth alain, nge tro hë ej a nyi ifegone la götrane i epun. Eje hi, tro kö epuni a helëne la angetre Kanana, ngacama nöje ka catre ju hë angatr, nge hetre ikatre i angatr ka trene wiil ka ixöj.”