Deuteronomi

26 “E traqa ha eö ngöne la nöj hnei Iehova Akötresi ö hna troa hamën nyine edrö i ö, nge e ase hë eö thapa me lapan la nöj, 2 qa i ö troa xome la sin ne la itre pane wen hnei ö hna troa menuën ngöne la nöj hnei Iehova Akötresi ö hna hamë eö, me qatreng ngöne la ketre treng, matre tro fë kowe la götran hnei Iehova Akötresi ö hna iën troa acile la ëje i nyidrë. 3 Qa i ö troa tro kowe la atre huuj ka huliwa ngöne la ijine cili me hape: ‘Ame enehila, eni a qaja koi Iehova Akötresi ö laka, traqa ha ni ngöne la nöj hnei Iehova hna sisiny kowe la itre qaaqaa së troa hamë së.’

4 “E cili, tro la atre huuj a xome la treng qaathei ö, me amë qëmekene la ita ne huuje i Iehova Akötresi ö. 5 Thupene lai, tro eö a qaja qëmekei Iehova Akötresi ö ka hape: ‘Atre Arama la kemeng, nge ka feke trootro* nyidrë. Hnei nyidrëti hna uti a tro Aigupito me mele trenyiwa e cili, nge xalaithe hi lo itre ka ce tro me nyidrë. Qane ju hi lai, ketre nöj ka tru hë nyidrë, me ka catr, nge ka ala nyim. 6 Ngo hnene la angetre Aigupito hna qanangazo hun, me axösisi hun, me thahluë hun. 7 Ame hne huni hna treije koi Iehova Akötresie ne lo itre qaaqaa hun, nge hnei Iehova hna drei hun, me goeëne la itre hace hun, me itre akötr, me aqane axösisi hun. 8 Matre hnei Iehova hna thepe hun qa Aigupito hnene la iwanakoime ka catr, me ime ka catre* i nyidrë, me jëne la itre ewekë hna xouen, me itre hatren, me itre iamamanyikeu. 9 Thupene lai, hnei nyidrëti hna tro sai hun kowe la götrane ce, me hamë hun la nöje ce, nöje gaa neni gala hnei melek me miel. 10 Nge ame enehila, eni a traqa fë la itre pane wen ne la ihnadro hnei Iehova hna hamë ni.’

“Qa i ö troa amë la treng qëmekei Iehova Akötresi ö, me thil qëmekei Iehova Akötresi ö. 11 Nge tro hë eö a madrine la nöjei manathith hnei Iehova Akötresi ö hna troa hamë eö, memine la itre atrene la hnalapa i ö, memine fe la atre Levi, memine la trenyiwa ka lapa thei ö.

12 “Ame hë la eö a ase xome la hna 10 ne la itre ewekë i ö, ngöne la hnaakönine macatre, lo macatre ne hamëne la hna 10, qa i ö troa hamën kowe la atre Levi, me kowe la trenyiwa ka lapa thei ö, me kowe la nekön hna mecitrij hnei kem, me kowe la sine föe, nge tro hë angatr a xeni mej ngöne la itre traone* i ö. 13 Thupene lai, tro eö a qaja qëmekei Iehova Akötresi ö ka hape: ‘Ase hë ni apatren qaatheng la itre ewekë ka hmitrötr, me hamën kowe la atre Levi, me kowe la trenyiwa ka lapa theng, me kowe la nekön hna mecitrij hnei kem, me kowe la sine föe, tune lo hnei nyipëti hna amekötin koi ni. Tha hnenge kö hna ena me thëthëhmine la itre wathebo i nyipë. 14 Tha xen kö ni la itre ewekë cili ngöne lo eni a hnëmec, nge tha xometrije kö ni la ketre ewekë qa ngöne la itre ewekë cili ngöne lo eni a pui ngazo, nge goi pë fe hnenge hna hamën kowe la itre ka mec. Ngo hnenge pe hna drengethenge Iehova Akötresing, me kuca asë lo hnei nyipëti hna ahnithe koi ni. 15 Ame enehila, qa ngöne la hnalapa ka hmitrötre i nyipë e koho hnengödrai, epi tro nyipëti a goeëne me amanathithi Isaraela nöje i nyipë, memine la nöj hnei nyipëti hna hamë hun, tune lo hnei nyipëti hna sisiny kowe la itre qaaqaa hun, ene lo nöj gaa neni gala hnei melek me miel.’

16 “Ame ngöne la drai celë, Iehova Akötresi ö a upi ö troa trongëne la itre hna ahnith, me itre wathebo i nyidrë. Nge qa i ö troa xötrethenge me trongën itre ej hnene la hni i ö ka pexej, me mele i ö ka pexej. 17 Ame enehila, Iehova a hamë eö la mejiune celë: tro nyidrëti a Akötresi ö, ngo qa i ö troa trongëne la itre jë i nyidrë, me trongëne la itre hna ahnith, me itre hna amekötin, me itre wathebo i nyidrë, me drenge la trengewekë i nyidrë. 18 Nge enehila, ase hë eö sisinyi koi Iehova laka: tro hë eö a nöje i nyidrë me atu ka co* i nyidrë, tune lo hnei nyidrëti hna sisiny koi ö, nge tro eö a trongën asë la itre hnei nyidrëti hna amekötin. 19 Qa ngöne lai, tro hë nyidrëti a acili ö hune la nöjei nöj hnei nyidrëti hna xup, nge tro ha atrunyi ö, nge tro ha hlemu la ëje i ö me lolo, nge tro hë eö a nöje ka hmitrötr thatraqai Iehova Akötresi ö, tune lo hnei nyidrëti hna sisiny.”