Daniela

2 Ngöne la hnaaluene macatre ne mus i Nebukaneza, tru catre la itre pu i nyidrë, nge tha meköle hë nyidrë, ke jole hë la mekuna i nyidrë. 2 Matre hnei nyidrëti hna hën la itre atre huuj ka kuci iöni, me itre ka ithanata me itre u, me itre trene iöni, me angetre Kaledaia,* matre tro angatr a qejepengöne la itre pu i nyidrë. Ame hnei angatre hna lö koi nyidrë. 3 Nge öni nyidrëti jë hi: “Hnenge hna pu, nge tha lapa hnyawa ha ni,* ke eni a pi atre la alien.” 4 Matre hnene la angetre Kaledaia hna sa koi joxu qene Arama* ka hape: “Joxu fe, epi tro nyipëti a mel uti hë epine palua. Pane qaja jë koi huni la pu i nyipë, nge tro pë hë huni a qejepengön.”

5 Matre öni joxu kowe la angetre Kaledaia: “Hane hi la hnenge hna axeciën: maine tha tro kö epuni a qaja la pung memine la alien ej, ke tro ni a theatrij la ngönetrei i epun, me nyi kabine* koi nöjei atr la itre uma i epun. 6 Ngo maine tro epuni a qaja la pung memine la alien ej, ke tro hë ni a hamë ahnahna koi epun, me itre edrö, nge tro ha atrunyi epun. Haawe, qaja jë la pung nge qejepengöne jë hë.”

7 Ame hnei angatre hmaca hna qaja ka hape: “Epi tro la joxu a qaja la pu i nyidrë, nge tro pë hë huni a qejepengön.”

8 Nge sa jë hi joxu ka hape: “Öhne hi ni laka, epuni a hunyinyi, ke atre hi epun ka hape, tha tro kö ni a saze mekun. 9 Maine tha qaja kö epuni lo hnenge hna puj, ke casi hi la pun koi epuni asë. Hnei epuni hna ce thë troa thoi koi ni, me qene xeti he ni matre treqen troa loi hmaca. Haawe, qaja jë hë la pung, matre atre jë ni laka, atreine hi epun troa qejepengön.”

10 Matre önine jë hi la angetre Kaledaia: “Pë fe kö ca atr e celë fen ka atreine kuca la hnei joxu hna sipon. Ke eje hi, pëkö ca joxu ka tru maine gavena ka hane sipone lai kowe la ketre atre huuj ka kuci iöni, me itre ka ithanata me itre u, maine ketre atre Kaledaia. 11 Ka jole catr la hnei joxu hna sipon, ke pëkö atr ka atreine eatrëne lai, ngo itre haze hmekuje hi, lo itre ka tha mele kö nyipine la itre atr ka tro asë hi a mec.”*

12 Ame hë la kola drenge lai hnei joxu, elë jë hi la trengehni i nyidrë, nge nyidrëti pë hë a amekötine ju troa humuth asë la itre ka inamacan e Babulona. 13 Ase jë hi amekötine lai, hna hane fe thele Daniela me itre sinatronge i angeic matre troa humuthi angatr.

14 Ame hë e cili, hnei Daniela hna thupën la aqane ithanata i angeic, me sa amenyiken koi Arioka, tane la itre ka thupë joxu, nge hna up troa humuth la itre ka inamacan e Babulona. 15 Öni angeic koi Arioka, tane la itre ka thupë joxu: “Hnauëne laka, ka catre pi hë la hna amekötin hnei joxu?” Ame hnei Arioka hna qejepengöne hnyawa la jol koi Daniela. 16 Matre hnei Daniela hna tro troa wai joxu, me sipo nyidrë troa pane nue ijin koi angeic troa qejepengöne la pu.

17 Thupene lai, hnei Daniela hna bëeke kowe hnalapa i angeic, troa ithuemacanyine la jol kowe la itre sinatronge i angeic, ene Hanania, me Misaela, me Azaria. 18 Hnei Daniela hna sipo angatre troa thithi kowe la Akötresie ne hnengödrai göne la pu, matre tha tro kö a ce humuthi angeic me itre sinatronge i angeic, me itre xaa ka inamacan e Babulona.

19 Ame hna mama koi Daniela la pu i joxu jëne la ketre hna meköle goeën e jidr. Nge hnei Daniela pë hë hna atrune la Akötresie ne hnengödrai. 20 Öni angeic:

24 Thupene lai, hnei Daniela hna lö koi Arioka, lo hna upe hnei joxu troa humuth asë la itre ka inamacan e Babulona, nge öni angeic: “The humuthe kö la ketre ka inamacan e Babulona. Ngo lö sai ni jë pe koi joxu, nge tro hë ni a qejepengöne la pu koi nyidrë.”

25 Ame hnei Arioka hna canga lö sai Daniela kowe la joxu, me hape: “Öhne hë ni thene la itre hna kötre fë qa Iudra, la ketre trahmany ka atreine qejepengöne la pu i joxu.” 26 Matre hnene la joxu hna hnyingë Daniela, lo hna hape, Beletisaza, ka hape: “Nyipici kö laka, atreine hi ö troa qaja la pung me qejepengön ej?” 27 Ame hnei Daniela hna sa ka hape: “Pë fe kö ka atreine qejepengöne koi joxu la hnei nyidrëti hna pi atre, nge goi thatreine fe la itre ka inamacan, me itre atre huuj ka trene iöni, me itre ka goeën la itre wëtresij, me itre ka ithanata me itre u. 28 Ngo hetre Akötresie e hnengödrai, ka atreine amamane la itre ewekë hna juetrën. Hnei nyidrëti hna amaman koi Nebukaneza joxu la ewekë ka troa traqa ngöne la itre drai ne la pun. Hane hi la hnei nyipëti hna puj hune la ili i nyipë, me itre hnei nyipëti hna meköle goeën:

29 “Joxu fe, hune la ili i nyipë, hnei nyipëti hna mekun la itre ewekë ka troa traqa elany. Nge hnene la Atre amamane la itre ewekë hna juetrën, hna amamai nyipë la itre ewekë ka troa traqa. 30 Nge ame pena ni, tha hnene kö laka, ka inamacane catre kö ni, matre atre jë ni la hnei nyipëti hna puj; ngo hna traqa lai, matre troa qejepengön ej koi joxu, nge tro nyipëti a atre la itre mekun ka ajolën la hni i nyipë.

31 “Hnei nyipëti joxu hna öhne me goeën la ketre hnasaatr atraqatr.* Atraqatre catre lai hnasaatr, nge ej a melemel me cile qëmekei nyipë, nge ka iaxoueny. 32 Hna kuca hnei nyipi gool la he ne la hnasaatr, nge sileva la imano me lue im, nge kopa la hni me lue itrepën ej, 33 nge fao la lue ca. Nge ame pena la lue wacan, ke hna kuca hnei fao me dro ka fedr.* 34 Nyipëti pala kö a goeën, nge feke pi hi la ketre etë atraqatr, ngo tha hna hna kö hnei iwanakoim; hnene ej hna nyinyape catr kowe la lue waca hna kuca hnei fao me dro ka fedr, me lep anyilanyilan. 35 Ame hna aca tro nyilanyila la fao, me dro ka fedr, me kopa, me sileva, me gool. Nge ej a tune la kupeine qitr* hna ufe hnei enyi ngöne la hna lepelepe qitr* e ijine hedredrei, nge hna ufetrij uti hnyawa ha la kola patr. Nge ame pena lo etë ka lepe lai hnasaatr, ke hnene ej hna saze troa ketre wetr atraqatr ka nyialiene la fen asë.

36 “Celë hi la hnei nyipëti hna puj. Ngo tro hë huni a qejepengön ej koi joxu. 37 Ame nyipë joxu, joxu ne la itre joxu, lo hnei Akötresie e hnengödrai hna ahnithe kow la mus, me men, me catr, me lolo, 38 me acil hune la itre atr ngöne la nöjei götran hnei angatr hna mele ngön, me itre öni ngöne la itre hlapa, me itre waco e hnengödrai, nyipë lo hnei nyidrëti hna acili joxun hui angatr asë, ke nyipëti hi la he gool.

39 “Thupei nyipë, tro ha cile la ketre baselaia, ngo ka nango puje kö hui nyipë. Nge troa hetre hnaakönine baselaia ka troa cil, lo hna nyihatren hnei kopa, tro ej a musi kowe la fen asë.

40 “Nge tro fe a mejë la hnaafoane baselaia ka troa catre tune la fao. Ke tune la fao, tro ej a lep anyilanyilan asë. Eje hi, tune la fao, tro ej a lep amudromudron, me waja fica, me lep anyilanyilane la nöjei baselaia celë.

41 “Ngo pine laka, hnei nyipëti hna öhne la lue waca me hene wanakoca laka, hna kuca hnei dro ka fedr* me fao, kolo lai a hape, tro ha thë la cas ne la baselaia; ame pe, tro kö ej a catre tune la fao, ke eje hi, hnei nyipëti hna öhne la fao hna ithuenyikön hnei dro ka fedr.* 42 Nge pine laka, hna ce xup hnei fao me dro ka fedr la itre hene wanakoca, tro la baselaia a catr nge tro fe ej a puje hnin. 43 Tune lo fao hnei nyipëti hna öhn, hna ithuenyikön hnei dro ka fedr,* ketre tun, tro fe angatr* a sine la itre atrene la nöj;* ngo tha tro kö angatr a cas, tune la fao me dro ka fedr ka thatreine ilöth.

44 “Ngöne la itre drai ne la itre joxu cili, tro la Akötresie ne hnengödrai a acile la ketre baselaia hna thatrein apatren. Nge tha tro kö a hamëne la baselaia cili kowe la itre xaa nöj. Tro ej a lep anyilanyilan me apatrene la itre baselaia cili, nge tro pe hi ej a cil epine palua. 45 Tro ha traqa la itre ewekë cili, ke hnei nyipëti hna öhn la etë atraqatr ka fek qa ngöne la wetr, ngo tha hna hna kö hnei iwanakoim, nge hnene ej hna lep anyilanyilan la fao, me kopa, me dro ka fedr, me sileva, me gool. Hnene la Akötresie Ka Draië hna amamane koi joxu la ewekë ka troa traqa elany. Ka nyipici la pu, nge tha nyine lueluëne kö la hna qejepengön.”

46 Ame hnei Nebukaneza joxu hna kei qe ipië qëmekei Daniela, me atrunyi angeic. Nge hnei nyidrëti hna amekötin troa hamë ahnahna koi angeic, me dreu ka pui loi koi angeic. 47 Önine la joxu koi Daniela: “Nyipici laka, Akötresie ne la itre akötresie la Akötresi epun, nge nyidrëti la Joxu ne la itre joxu, me Atre amamane la hna juetrën, ke hnei ö hna atreine qaja amamane la hnenge hna lapa fë.” 48 Ame hnene la joxu hna acili Daniela ngöne la ketre hnëqa ka tru, me hamë angeic la itre ahnahna ka nyimutre nge ka mingöming. Nge hnei nyidrëti hna acili angeic hune la provës ne Babulona asë, me acili angeic troa hen la itre ka inamacan e Babulona. 49 Nge hnei joxu hna kapa la sipo i Daniela me acili Saderaka, me Mesaka, me Abedenego troa cilën la provës ne Babulona. Nge ame Daniela, hnei angeic pë hë hna huliwa ngöne la hnanyijoxu.