Isaia
35 Tro ha sue madrin la hnapapa memine la gaa qaqacil,
Nge tro ha madrine la itre hnapapa me tiqa hnei iengen.
2 Eje hi, tro hë ej a eng;
Tro hë ej a madrin atraqatr me sue madrin.
Tro ha hamëne kow ej la lolo ne Lebanona,
Memine la emingömingön ne Karemela me Sarona.
Tro sa öhne la lolo i Iehova, lo emingömingöne la Akötresi së.
3 Aegöcatrene jë la itre ime ka kucakuca,
Nge acatrene jë la itre iwatingöneca ka hmengöhmengön.
4 Qaja jë kowe la itre ka hnehengazo* ka hape:
“Catre pi, nge the xou kö.
Goeën! Tro la Akötresi epuni a traqa troa nyithupen,
Tro Akötresieti a traqa fë la pun* koi angatr.
Tro nyidrëti a traqa troa amele epun.”
5 Ame ngöne la ijine cili, tro ha fe la luemekene la itre timek,
Memine la lue hnangenyë ne la itre ka sim.
6 Ame ngöne la ijine cili, tro la genyi ca a sesë draië tune la drube,
Nge tro la thineme ne la hum a sue madrin.
Ke tro ha kaca la tim ngöne la hnapapa,
Nge tro ha xulu la itre tim ka neni catr ngöne la gaa qaqacil.
7 Tro pena a saze la ihnadro ka qaqacil koi tim hna haöthe hnei rozo,
Nge tro ha saze la dro ka catr koi qeqe ne tim.
Ame lo hna lapa ne la itre kuli wael,
Ke tro pena a hetre haö, me itre rozo me hnënge hainy.*
8 Nge tro ha hetre gojenyi ka tru e cili,
Eje hi, ketre gojenyi hna troa ati ëjen ka hape, Gojenyi ka hmitrötr.
Tha tro kö a trongën ej hnene la atr ka pui ngazo.
Hna hnëkëne hmekuje hi kowe la itre ka ijij troa trongën;
Pë fe kö hmo ka troa hane tro e cili.
9 Ngöne la gojenyi cili, pëkö liona,
Nge pëkö ca öni wael ka ihej.
Tha tro kö sa öhne itre ej e cili;
Ngo tro hmekuje hi a trongën ej hnene la itre hna itön.
10 Tro la itre hna itön* hnei Iehova a bëeke hmaca me lö e Ziona me sue madrin.
Tro ha thaipine la itre he i angatr hnene la madrin ka epine palua.
Tro ha madrin atraqatr me madrin la hni i angatr,
Nge tro ha patr la hleuhleu me akötr.