Isaia
65 “Hnenge hna nue troa easenyi ni hnene la itre atr ka tha sipon troa ithanata me ni;
Hnenge hna mama kowe la itre ka tha thele ni kö.
Öning kowe la nöj ka tha hëne la ëjeng: ‘Eni hi la, eni hi la.’
2 Drai ka pexej, eni a saathe la lue imeng kowe la nöj ka tha idrei,
Itre ka trongëne la gojenyi ka ngazo,
Ka isa kuci mekun;
3 Ketre nöj ka kuca amaman la itre ewekë ka akötrë ni,
La kola tro fë huuj ngöne la itre hlapa, me huhajin la itre huuj hune la itre etë dro.
4 Angatr a lapa nyipine la itre hua,
Me meköl e jidr ngöne la itre hnë zae,*
Angatr a öni puaka,
Nge ngöne la itre trengene tim i angatr, hetre zan ka pi.*
5 Angatr a qaja ka hape: ‘Lapa ju kö e cili, nge the easenyi ni kö,
Ke ka hmitrötre kö ni hui eö.’*
Ceitui angatr me hajine eë ngöne la hnafijing, me ketre eë ka mele lapaa ngöne la drai ka pexej.
6 Goeën! Ase hë cinyianyin qëmekeng;
Tha tro kö ni a lapa thaup,
Ngo tro kö ni a nyithupene koi angatr,
Tro ni a nyithupene hnyawa* koi angatr
7 Pine la itre ngazo i angatr, memine la itre ngazo ne la itre qaaqaa i angatr,” öni Iehova.
“Pine angatr huhajin la itre huuje i angatr hune la itre wetr
Me ahmahmanyi ni hune la itre sasala,
Tro hë ni a nyiqaane hamëne la thupe i angatr ka pexej.”
8 Hane hi la hna qaja hnei Iehova:
“Tune la kola hetre wene rezë, nge ijije hë troa kuci waina ka hnyipixe
Tro la ketre atr a qaja ka hape: ‘The satrije kö, ke hetre ewekë ka loi* e kuhu hnin,’
Tro fe ni a kuca tune lai kowe la itre hlueng;
Tha tro kö ni a apatrenyi angatr asë.
9 Eje hi, tro ni a axulune la ketre matran* qaathei Iakobo,
Me axulun qa Iudra la atr ka troa lapane la itre wetreng;
Tro la itre hnenge hna iën a hetrenyi la nöj,
Nge tro la itre hlueng a lapa e cili.
10 Thatraqane la nöjeng ka thele ni
Tro la Sarona a nyi götrane hnë xeni kowe la itre mamoe,
Nge tro la hnathupe i Akora a nyi hnë mano kowe la itre kau.
11 Ngo ame epun, epun la itre ka nuetriji Iehova,
Me thëthëhmine la wetrenge ka hmitrötr me hnëkëne la laulau,
Thatraqane la haze ne Lasas,
Nge ka atiqane la trepe waina hna ithuenyiköne kowe la haze ka musinëne la Itre Drai Elany.
12 Haawe, tro ni a nue epuni kowe la taua,
Nge tro epuni asë a sa iwatingöneca, matre troa humuthi epun,
Ke hnenge hna hë, ngo tha hnei epuni kö hna sa,
Hnenge hna ewekë, ngo tha hnei epuni kö hna dreng;
Hnei epuni pala hi hna kuca la ngazo qëmekeng,
Nge hnei epuni hna iëne la hnenge hna methinën.”
13 Qa ngöne lai, hane hi la hna qaja hnei Iehova Joxu Ka Sisitria:
“Goeën! Tro la itre hlueng a xen, ngo tro pë hë epuni a mecijiin.
Tro la itre hlueng a ij, ngo tro pë hë epuni a meci hnei pi ij.
Tro la itre hlueng a madrin, ngo tro pë hë epuni a hmahma.
14 Goeën! Tro la itre hlueng a sue madrin, ke lolo la hni i angatr,
Ngo tro pe epuni a treij, ke kola akötr la itre hni i epun
Nge tro epuni a hokötr, ke tha loi kö la itre mekuna i epun.
15 E patre hë epun, tro la itre hnenge hna iën a xome la ëje i epun nyine ieji,
Nge tro Iehova Joxu Ka Sisitria a humuthi epun asë,
Ngo tro nyidrëti a ati ëjene la itre hlue i nyidrë hnene la ketre ëj;
16 Matre ame la atre thele manathith e celë fen
Ke tro ha amanathithin hnene la Akötresie ka nyipici,*
Nge ame la atre sisinyi e celë fen
Tro ha sisinyi jëne la Akötresieti ka nyipici.*
Ke tro ha thëthëhmine la itre akötre* hnapan;
Tha tro kö a öhne itre ej hnene la luemekeng.
17 Ke goeën! Eni a xupe la hnengödrai ka hnyipixe me fene hnengödrai ka hnyipixe;
Tha tro hmaca kö a mekune la itre ewekë hnapan,
Tha tro hmaca kö itre ej a ajolëne la hni.
18 Madrine jë nge sue madrine jë o drai göne la itre ewekë hnenge hna xup.
Ke goeën! Eni a xupi Ierusalema matre jëne madrin
Memine la itre atren matre sue madrin.
19 Nge tro ni a madrin göi Ierusalema, me sue madrin kowe la itre atren ej;
Tha tro hmaca kö a drenge la kola treij me awe.”
20 “Pë hmaca kö medreng ka troa mel e cili koi hnepe drai,
Me itre qatr ka tha traqa kö ngöne la pune la mele i angatr.
Ke ame la atre mec nge ka 100 lao macatre, ke kösë nekö trahmanyi angeic,
Nge tro ha ejin la atr ka ngazo, ngacama 100 hë lao macatre i angeic.*
21 Tro ha xupe la itre uma me lapan itre ej,
Nge tro ha eënyi vin me ije la itre wen ej.
22 Tha tro kö a xupi uma matre tro la ketre atr a lapan,
Tha tro kö a eëny matre tro la ketre atr a xen.
Ke ame la itre drai ne la nöjeng, tro ha tune la itre drai ne la ketre sinöe,
Nge ame la itre hnenge hna iën, ke tro angatr a madrin kowe la huliwa ne la lue ime i angatr.
23 Tha tro kö angatr a huliwa* gufa,*
Tha tro kö angatr a hnaho nekönatr me öhnyi nyudren e akötr,
Ke angatr me itre nekö* i angatr
La itre matran hna amanathithin hnei Iehova.
24 Qëmekene tro angatr a hë, tro ni a sa koi angatr;
Angatre pala kö a ithanata, nge tro fe hë ni a eatrën.
25 Tro la luko a ce xeni memine la nekö i mamoe,
Tro la liona a xeni jez tune la kau,
Nge tro la un a xeni la xaxau.
Tha tro kö a angazon me apatren ngöne la wetreng ka hmitrötr,” öni Iehova.