Numera

5 Öni Iehova hmaca koi Mose ka hape: 2 “Amekötine jë kowe la angetre Isaraela troa up qa ngöne la lapa, la nöjei atr ka lepera, me itre ka neni zane ngönetrei, me nöjei atr ka pui ngazo, ke hna ketr la ka mec. 3 Tro epuni a upi angatr, trahmanyi ju hë maine föe. Tro epuni a upi angatr tröne la lapa, matre tha tro kö a xötre la mec ngöne la itre lapa hnenge hna lapa ngön.” 4 Celë hi hna kuca hnene la angetre Isaraela. Hnei angatr hna upe la itre atre cili tröne la lapa. Hnei angatre hna kuca tune lo hnei Iehova hna amekötin koi Mose.

5 Nge öni Iehova hmaca jë hi koi Mose: 6 “Qaja jë kowe la angetre Isaraela ka hape: ‘Maine tro la ketre trahmanyi maine föe a kuca la ketre ngazo hna majemine kuca hnene la itre atr, nge tha mele nyipici hë angeice koi Iehova, hetre zö i angeice hë. 7 Nge qa i angeic* troa qajaqaja la ngazo hnei angeice* hna kuca, me hamëne la thupene la ngazo i angeic, me nyixan hnene la hna 5 ne la thupen hna athip; Nge tro angeic a hamën kowe la atr hnei angeice hna ngazo kow. 8 Ngo maine pëkö fami ne la atr hna akötrën ka troa kapa la thupen, tro pë hë a hamëne koi Iehova, nge thatraqane pë hë la atre huuj. Ngo tha tro kö a hamëne la mamoe trahmany, lo nyine troa huujën nyine huuj ne ialoinekeun* thatraqane la atr ka kuca la ngazo.

9 “‘Ame asë hi la itre ewekë ka hmitrötr hna hamën hnene la angetre Isaraela, ke thatraqane la atre huuj ka kapa la ahnahna. 10 Nge thatraqai angeic la itre ewekë ka hmitrötr hna hamën hnene la itre atr. Ame la hna hamën kowe la atre huuj, ke thatraqane la atre huuj.’”

11 Nge öni Iehova hmaca jë hi koi Mose: 12 “Qaja jë kowe la angetre Isaraela ka hape: ‘Hane hi la hna troa kuca kowe la föe ne la trahmanyi ka tha kuca la loi, nge ka tha mele nyipici kowe la trahmany. 13 Maine tro la föe a nyixetë me ketre trahmany, ngo thatre kö la föi angeic, nge hna juetrën, matre pui ngazo hë angeic, nge pëkö atr ka atreine troa anyipicin, maine ka öhn, 14 nge maine tro la trahmanyi a zalu me mekuhnine la föi angeic, nge e hnene la föe hna apui ngazonyi angeic maine waea, 15 qa ne la trahmanyi troa tro fë la föi angeic kowe la atre huuj, memine la huuj kowe la föi angeic, ene la ca omera* ne farin ne bali. Tha tro kö angeic a nei oel kow, maine ami libanu* e koho hun, ke ketre huuj ne wene feja ne zalu. Huuj ne wene feja nyine amekunëne la ngazo.

16 “‘Tro la atre huuj a hëne la föe matre cile qëmekei Iehova. 17 Nge tro la atre huuj a xome la tim ka hmitrötr ngöne la trengen hna kuca hnei dro, me xom la xaxau hnine la uma maano. Nge tro angeic a kuiën ngöne la tim. 18 Nge tro la atre huuj a acilëne la föe qëmekei Iehova, me senge la itre pene he i angeic, me amë ngöne la hnatrapaime i angeic la huuj ne wene feja nyine amekunën, ene la huuj ne wene feja ne zalu. Nge tro la atre huuj a kapa la tim ka haitr, nge ka axulune la hnëjin.

19 “‘Nge tro la atre huuj a upe la föe troa sisinyi me hape: “Maine pëkö trahmanyi ka ce meköl me eö, nge eö hë fene la musi ne la föi ö, nge e tha hnei ö kö hna trotrije la loi, me pui ngazo, haawe tha tro kö a hetre thangane koi ö la tim ka haitr, nge ka axulune la hnëjin. 20 Ngo maine hnei ö hna trotrije la loi, nge pui ngazo hë eö, nge eö pala kö fene la musi ne la föi ö, nge hnei ö hna ce meköl memine la ketre trahmanyi kö...” 21 Tro hë la atre huuj a upe la föe troa qaja la itre trengewekë ne ieji, me hape: “Tro Iehova a kuca matre meci* pi la itrepë* i ö, me acipan la hni i ö. Nge tro Iehova a kuca matre, tro fe la nöj a hane qeje eö, la angatr a ieji me ihaji. 22 Nge tro la timi celë ka axulune la hnëjin a lapane la trenge xele i ö, me acipan la hni i ö, me amecine la itrepë i ö.” Nge tro la föe a sa ka hape: “Amen! Amen!’”*

23 “‘Nge tro la atre huuj a cinyanyine la itre ieji cili ngöne la tus, me apatrenetrij ngöne la tim ka haitr. 24 Thupene lai, tro angeic a thue imene la föe la tim ka haitr, nge ka axulune la hnëjin, nge tro la tim ka axulune la hnëjin a löthe lai föe, me ahaitrëne la mele i angeic. 25 Nge tro la atre huuj a xome la huuj ne wene feja ne zalu qa ngöne la iwanakoime ne la föe, me jumejume la huuj ne wene feja qëmekei Iehova, me easenyine la ita ne huuj. 26 Nge tro la atre huuj a xome la ca hnatrapaimë huuj ne wene feja, nyine hatren la huuj, me huhajin* ej hune la ita ne huuj; thupene lai, tro angeic a thue imene la föe hnene la tim. 27 Ame la kola thue imene la föe, nge pui ngazo hë angeic pine angeice tha mele nyipici kowe la föe hmunë, tro la tim ka axulune la hnëjin a löthi angeic, nge tro ej a haitr e kuhu hni i angeic. Nge tro hë la hni i angeic a cipa, nge troa ae la itrepë i angeic. Nge tro hë la nöje i angeic a qeje angeic ngöne la itre ieji. 28 Ngo maine tha ka pui ngazo kö lai föe, nge ka pë engazon, pëkö troa hetre pune koi angeic. Nge ijiji angeice hi troa upune, me hnaho nekönatr.

29 “‘Hane hi la wathebo göne la zalu: maine tro la föe a trotrije la loi me pui ngazo, nge angeic fene la musi ne la föi angeic, 30 maine pena, tro la trahmanyi a zalu me mekuhnine la föi angeic ka hape, kola nyixetë, qa ne la trahmanyi troa acilëne la föe qëmekei Iehova. Nge tro hë la atre huuj a xötrethenge la wathebo celë. 31 Haawe, pëkö ngazo ne la trahmany, ngo föe la atrekë zön.’”