Deuteronomi

27 Ame hnei Mose me itre qatr ne Isaraela hna amekötin kowe la nöj ka hape: “Drenge ju la itre wathebo asë hnenge hna hamëne koi ö ngöne la drai celë. 2 Nge ngöne la drai ne tro eö a sasaithe la Ioridrano, me lö kowe la nöj hnei Iehova Akötresi ö hna troa hamë eö, qa i ö troa acil me pele haon la itre etë ka tru. 3 E ase hë eö sasaithe la Ioridrano, qa i ö troa cinyianyin hun itre ej la itre trengewekë ne la Wathebo celë, matre tro eö a lö kowe la nöj hnei Iehova Akötresi ö hna hamë eö, ketre nöj gaa neni gala hnei melek me miel, tune lo hnei Iehova Akötresi ne la itre qaaqaa i epun, hna sisinyi koi epun. 4 Nge e ase hë eö sasaithe la Ioridrano, qa i ö troa acil me pele haon la itre etë hune la wetre Ebala, tune lo hnenge hna ahnithe koi ö ngöne la drai ce. 5 Ngöne la götrane cili, tro eö a xupe koi Iehova Akötresi ö la ketre ita ne huuj hna kuca hnei etë. Tha tro kö eö a thë la itre etë hnene la itre jia ne huliwa hna kuca hnei fao. 6 Ngo tro pe eö a xupe la ita ne huuj koi Iehova Akötresi ö memine la itre etë hna hlem, nge tro hë eö a huujën hun ej la itre huuj ne dreuth asë thatraqai Iehova Akötresi ö. 7 Qa i ö troa huujëne me xen la itre huuj ne tingeting* e cili, nge tro hë eö a madrin qëmekei Iehova Akötresi ö. 8 Nge cinyianyine hnyawane ju hune la itre etë cili, la nöjei trengewekë ne la Wathebo celë.”

9 Thupene lai, öni Mose me itre atre huuj ne la tribu i Levi, koi Isaraela ka hape: “Isaraela fe, the nyi mejene kö, nge drenge ju! Ame enehila, eö hë la nöje i Iehova Akötresi ö. 10 Qa i ö troa drenge la aqane ewekë i Iehova Akötresi ö, me trongëne la itre hna amekötin, me itre hna ahnith hnenge hna hamë eö ngöne la drai celë.”

11 Ngöne la drai cili, hnei Mose hna amekötin kowe la nöj ka hape: 12 “E ase hë epuni sasaithe la Ioridrano, tro la itre tribu celë a cil hune la wetre Garezim matre amanathithine la nöj: ene la tribu i Simeona, me Levi, me Iudra, me Isakara, me Iosefa, me Beniamina. 13 Nge tro pë hë la itre tribu celë a cil hune la wetre Ebala matre troa ieji: ene la tribu i Reubena, me Gada, me Asera, me Zebulona, me Dana, me Nafetali. 14 Nge tro hë la angetre Levi a qaja catrën kowe la itre trahmany ne Isaraela asë ka hape:

15 “‘Hnëjine hë la atre tratraun maine xupe* la ketre idrola, ke methi Iehova la huliwa ne la lue ime i angeic,* nge ka juetrën ej.’ (Nge tro hë la nöj a sa ka hape: ‘Amen!’)*

16 “‘Hnëjine hë la atr ka tha metrötrë kem me thin.’ (Nge tro hë la nöj a sa ka hape: ‘Amen!’)

17 “‘Hnëjine hë la atre ahuëne la ifego ne la atre lapa ezi angeic.’ (Nge tro hë la nöj a sa ka hape: ‘Amen!’)

18 “‘Hnëjine hë la atre amenune la timek e cahu gojeny.’ (Nge tro hë la nöj a sa ka hape: ‘Amen!’)

19 “‘Hnëjine hë la atre atriane la aqane amekötine la trenyiwa ka lapa thei angeic, memine la nekön hna mecitrij hnei kem, memine la sine föe.’ (Nge tro hë la nöj a sa ka hape: ‘Amen!’)

20 “‘Hnëjine hë la atre ce meköl memine la föe ne la keme i angeic, ke angeice hi lai a ahmahmane la keme i angeic.’ (Nge tro hë la nöj a sa ka hape: ‘Amen!’)

21 “‘Hnëjine hë la atre ce meköl memine la nöjei pengöne öni.’ (Nge tro hë la nöj a sa ka hape: ‘Amen!’)

22 “‘Hnëjine hë la atre ce meköl memine la xa i angeic, ene la nekön ne la keme i angeic, maine nekön ne la thine i angeic.’ (Nge tro hë la nöj a sa ka hape: ‘Amen!’)

23 “‘Hnëjine hë la atre ce meköl memine la thinene la föi angeic.’ (Nge tro hë la nöj a sa ka hape: ‘Amen!’)

24 “‘Hnëjine hë la ka zae treqene la atre lapa ezi angeic matre troa humuth.’ (Nge tro hë la nöj a sa ka hape: ‘Amen!’)

25 “‘Hnëjine hë la atre kepe mani juetrë göi troa humuthe* la atr ka pë engazon.’ (Nge tro hë la nöj a sa ka hape: ‘Amen!’)

26 “‘Hnëjine hë la atr ka tha trongëne la itre trengewekë ne la Wathebo celë.’ (Nge tro hë la nöj a sa ka hape: ‘Amen!’)