Hnaaluene Tusi Itre Joxu
21 Traqa koi 12 lao macatre i Manase lo kola acili joxu nyidrë. Hnei nyidrë hna musi koi 55 lao macatre e Ierusalema. Nge Hefeziba la ëjene la thine i nyidrë. 2 Nyidrëti a kuca la ngazo koi Iehova, me xome la itre thiina ka sis ne la itre xa nöj, lo hnei Iehova hna helën qa ngöne la zi angatr, me hamë angetre Isaraela. 3 Hnei nyidrëti hna xupe hmaca la itre hnë hmi gaa hmitrötr hna apatren hnei Hezekia keme i nyidrë, me acile la itre ita ne huuj koi Baala, memine la sine feni ka hmitrötr, tune lo aqane kuca i Ahaba joxu ne Isaraela ekö. Nge nyidrëti a thili ju qëmekene la itre ewekë ne hnengödrai,* me nyihluen itre ej. 4 Nge nyidrëti a xupe ju fe la itre xa ita ne huuj hnine la uma ne hmi Iehova, lo hnei Iehova hna qaja ka hape: “Tro ni a amë la ëjeng e Ierusalema.” 5 Nge ngöne la lue götrane gaa pë ihakun hnine la uma ne hmi i Iehova, hnei Manase hna xupe la itre ita ne huuj thatraqane la itre ewekë ne hnengödrai. 6 Hnei nyidrëti fe hna dreuthe la sipu nekö i nyidrë trahmany, me kuci haze, me thele la itre hatrene loi. Nge hnei nyidrëti fe hna acil la itre ka ithanata me itre ka mec, me itre ka qajaqaja la drai elany. Nyimutre catre la itre ngazo hnei Manase hna kuca qëmeke i Iehova, matre jele la trenge hni nyidrë.
7 Hnei nyidrëti hna alön la idrola hnine la uma ne hmi, memine la sine feni ka hmitrötr hnei nyidrëti hna kuca. Ngo ame kowe la uma ne hmi, hnei Iehova lo hna qaja koi Dravita, me koi Solomona nekö i Dravita ka hape: “Tro pala hi ni a amë la ëjeng hune la uma celë, me e Ierusalema, lo traon hnenge hna iën nyipine la nöjei tribu ne Isaraela. 8 Nge maine tro pala hi angatr a metrötrëne hnyawa la itre hnenge hna amekötin, memine la nöjei Wathebo hnei Mose hlueng hna upi angatr troa trongën, tha tro hmaca kö ni a helëne la angetre Isaraela qa ngöne la nöj hnenge hna hamën kowe la itre qaaqaa i angatr.” 9 Ngo tha drenge kö angatr, nge hnei Manase pala hi hna huli angatr troa kuca catrëne la ngazo, matre co pë hë la ngazo ne la itre nöj hnei Iehova hna apatren qëmekene la angetre Isaraela, lo angatr a thapa la nöj.
10 Ame hnei Iehova hna qaja jëne la itre perofeta, itre hlue i nyidrë ka hape: 11 “Hnei Manase joxu hna kuca la itre huliwa ka sisi celë, nge ngazo catre kö angeic hune la angetre Amora ka tro pa hui angeic. Hnei angeic hna huli Iudra kowe la ngazo, hnene la itre idrola i angeic ka sis.* 12 Celë hi matre eni, Iehova Akötresi Isaraela, a qaja ka hape, ‘Tha ka co kö la akötr hnenge hna troa axulun koi Ierusalema me Iudra, matre tro la itre ka dreng a isa sesëkötr.* 13 Tro ni a seluthe la eno nyine tuluth* hui Ierusalema, lo hna huliwane hë koi Samaria. Nge tro ni a huliwane la nivo hna huliwan kowe la fami i Ahaba. Nge tro ni a wasi Ierusalema, tune la kap hna wasin, me qeneipiën. 14 Tro ni a nuaxöje la munëne la nöjeng, nge tro ni a nue angatr kowe la itre ithupëjia me angatr. Nge tro la itre ithupëjia a kötre sai angatr me atrekënö angatr, 15 ke hnei angatr hna kuca la ngazo koi ni, me amejëne la trenge hning, qaane lo drai ne thapa la itre qaaqaa i angatr qa Aigupito.’”
16 Nge hnei Manase fe hna anenin atrun la madra ne la itre ka pë engazon, uti hë la Ierusalema a tiqa hnei madra, qaane la ketre can uti hë la ketre. Kolo hi lai a nyixane la itre ngazo i nyidrë, lo nyidrëti a uku Iudra troa ngazo koi Iehova. 17 Nge ame la mele i Manase me nöjei huliwa i nyidrë, me itre ngazo hnei nyidrëti hna kuca, hna fejan asë hnine la itusi ne la mele ne la itre joxu ne Iudra. 18 Ame hnei Manase hna meköl me itre qaaqaa i nyidrë ngöne la mec, nge hna kelemi nyidrë ngöne la hnepadro ne la hnalapa i nyidrë, lo hnepadro i Uza. Nge hna acili joxu Amona nekö i nyidrë, troa nyihna i nyidrë.
19 Traqa koi 22 lao macatre i Amona lo kola acili joxu nyidrë. Hnei nyidrëti hna musi koi lue macatre e Ierusalema. Mezulemeth la ëjene la thine i nyidrë. Nge eahlo la nekö i Haruza qa Iotebath. 20 Amona a kuca la ngazo koi Iehova, tune lo aqane ujë i Manase keme i nyidrë. 21 Hnei nyidrëti hna nyitipune la tulu* ka ngazo ne la keme i nyidrë, me nyihluene la itre idrola ka sis hna nyihluen me thili kow hnene la keme i nyidrë. 22 Qa ngöne lai, hnei nyidrëti hna nuetriji Iehova, Akötresi ne la itre qaaqaa i nyidrë. Nge tha kuca kö nyidrë la hnei Iehova hna qaja.* 23 Ngöne la ketre drai, hnene la itre hlue i Amona hna thele troa humuthi nyidrë, matre angatr a humuthi nyidrëti pi hnine la uma i nyidrë. 24 Ngo hnene la itre atrene la nöj hna humuthe la itre ka humuthi Amona joxu. Ame hnei angatr hna acili Iosea nekö i nyidrë, troa nyihna i nyidrë. 25 Nge ame la mele i Amona me nöjei huliwa i nyidrë, hna fejan asë hnine la itusi ne la mele ne la itre joxu ne Iudra. 26 Ame hna kelemi Amona hnine la hua i nyidrë, ngöne la hnepadro i Uza. Nge hna acili joxu Iosea nekö i nyidrë, troa nyihna i nyidrë.