Atre Cainöj

4 Hnenge hmaca hna goeën la itre aqane iakötrë hna kuca fene la jö. Hnenge hna öhn la kola treije la itre hna akötrën, nge pëkö ka aupunyi angatr. Kola musinë angatr hnene la itre ka iakötrë, nge pëkö ka aupunyi angatr. 2 Nge hnenge hna qaja aloine la itre ka meci hë hune la itre ka mele pala kö. 3 Ngo loi ju kö la atr hna tha hnahone pala kö, hune la itre ka meci hë me ka mel, ke tha öhne kö angeic la itre huliwa ne iakötrë hna kuca fene la jö.

4 Nge hnenge hna öhne la trengecatr* me aqane iwajahuj ne la itre atr ngöne la hna huliwa; ketre ka gufa fe lai, kösë kola nyinyape thenge la eny.

5 Kola sili lue ime la atr ka hmo, nge kola ethitre* la ngönetrei i angeic.

6 Ka loi ju kö la troa nango mano, hune la troa huliwa mec me nyinyape thenge la eny.

7 Hnenge fe hna goeëne la ketre ewekë ka gufa fene la jö: 8 Ene la trahmany ka mele cas nge pëkö sinee i angeic; angeic a huliwa mec ngo pëkö nekö i angeic trahmany me trejin me angeic. Tha mano kö la luemeke i angeic thele mani. Ngo hapeu, angeice kö a hane hnying ka hape: “Eni a huliwa mec koi drei? Nge pi drei matre eni a xelene la itre ewekë ka loi? Ka gufa fe la ewekë cili, nge ka pë alien.

9 Ka loi ju kö la ala lu hune la ala cas, ke hetre thupen* la hnei nyidroti hna catre huliwa. 10 Ke maine troa kei la ketre, ijije hi troa amejën hnei ketre. Ngo nemene ju hë la ka troa traqa kowe la atr ka kei, nge pëkö ka amejë angeice hmaca?

11 Ketre, maine troa ce meköl la ala lu, ke tro hë nyidroti a keukawa. Ngo troa keukawa tune kaa hnene la ala cas? 12 Troa canga ngaane la ala cas, ngo tro pe a cile catr la ala lu. Ketre, tha ka canga xecie* kö la eno ka köni wanaeamo.

13 Ka loi ju kö la nekönatr ka pë ewekë ngo ka inamacan, hune la joxu ka qatre hë ngo ka hmo pe, nge ka pë atrehmekun troa kapa la ihaji. 14 Ke hnei nyën* hna tro qa ngöne la kalabus matre troa joxu, ngacama ka pë ewekë nyën ngöne lo ijine nyidrëti* a mus. 15 Hnenge hna goeëne la nöjei ka mel ka tro me bëek fene la jö, memine la itre ewekë ka traqa kowe la nekö trahmany ka nyihnai joxu. 16 Ngacama tru ju hë hnei ka nyixölë angeic, ngo tro la itre ka traqa e thupen a eetre pi angeic. Ka gufa fe la ewekë cili, kösë kola nyinyape thenge la eny.