Salamo
Göi Solomona.
72 Akötresieti fe, hamëne pi kowe la joxu la itre hnei nyipëti hna amekötin,
Nge ahnithe jë la meköt i nyipë kowe la nekö i joxu.
2 Epi tro angeic a isigöline la nöje i nyipë cememine la meköt,
Me itre ka ipië cememine la thiina ka meköt.
3 Epi tro la itre wetr a traqa fë la tingeting kowe la nöj,
Nge epi tro la itre sasala a traqa fë la meköt.
4 Epi tro angeic a cilëgöline* la itre ka ipië ngöne la nöj,
Me amelene la itre neköne la ka pë ewekë,
Nge epi tro angeic a waja trane la atr ka qenatrekënö.
5 Tro pala hi angatr a xoue nyipë
E tro pala hi a mama la jö me treu e koho hnengödrai,
Uti hë la itre xötre atr epin.
6 Tro hë angeic a tune la mani ka trotro kowe la haö hna thupa,
Me tune la kola hlupi la mani hune la ihnadro.
7 Fene la mus i angeic, tro ha eng* la itre atr ka meköt,
Nge tro ha tru la tingeting uti hë la troa patre la treu.
8 Tro hë angeic a musi qa ngöne la ketre hnagejë uti hë la ketre hnagejë
Me qa ngöne la Hneopegejë* uti hë la itre cane la fene hnengödrai.
9 Tro ha thili qëmekei angeic hnene la itre ka lapa ngöne la hnapapa,
Nge tro la itre ithupëjia me angeic a xeni la so ne dro.
10 Tro hë la itre joxu ne Tasesa me itre hnapet a tro fë hotr.
Tro la itre joxu ne Sheba me Seba a tro fë ahnahna.
11 Tro la nöjei joxu a thil qëmekei angeic,
Nge tro la nöjei nöj asë a nyihlue i angeic.
12 Ke tro angeic a amelene la ka pë ewekë ka sipo ixatua,
Memine la ka co, me nöjei atr ka pë atre xatuan.
13 Tro angeic a utipine la ka co memine la ka pë ewekë,
Nge tro angeic a amelene la itre ka pë ewekë.
14 Tro hë angeic a amele angatr qa ngöne la iangazo me isi,
Nge tro ha nyipiewekë la madra i angatr qëmekei angeic.
15 Epi tro angeic a mel, nge troa hamë angeic la gool ne Sheba.
Epi tro angatr a thithi sai angeic o drai,
Nge tro pala hi a amanathithi angeic.
16 Tro ha mana la qitr ngöne la ihnadro;
Hune la he ne la itre wetr, tro itre ej a xötr.
Tro ha mana la itre xeni ne dro i joxu, tun e Lebanona,
Nge ngöne la itre traon, tro ha tiqa hnei atr tune la haö ka cia hune la ihnadro.
17 Epi tro la ëje i angeic a lapa epine palua,
Nge tro ej a cile hut tune la jö.
Loi e tro la itre atr a kepe manathith jëne la joxu;
Tro la nöjei nöj a qaja aloinyi angeic.
18 Atrunyi Iehova Akötresieti jë, lo Akötresi Isaraela,
Ke nyidrëti hmekuje hi la atre kuca la itre huliwa nyine hain.
19 Epi atrune la ëje i nyidrëti ka lolo uti hë epine palua,
Nge epi tiqa pi la fene hnengödrai asë hnene la lolo i nyidrë.
Amen me Amen.
20 E celë hi la hna nyipune la itre thithi Dravita, nekö i Iese.