Salamo
104 Eni a ajan troa atrunyi Iehova.
Iehova Akötresinge fe, ka draië catre nyipë.
Nyipëti a heetrëne la nyine iatruny me lolo.
2 Nyipëti a heetrën la lai tune la ketre iheetr;
Nyipëti a seluthe la hnengödrai tune la imaano ne la itat.
3 Nyidrëti a atë la itre agö ne la itre hnahag e koho, ngöne la itre tim e caha,*
Nge nyidrëti a xome la itre iaw nyine ikatr,
Me të hune la itre iapen ne la eny.
4 Nyidrëti a kuca matre, itre u ka men la itre angela i nyidrë,
Nge eë ka catrehnin la itre hlue i nyidrë.
5 Hnei nyidrë hna acil la ihnadro ngöne la itre trepen ej;
Tha tro jë kö a fej* qa ngöne la göhnen ej epin, epine palua.
6 Hnei nyipë hna heetrën ej hnene la itre tim ka jui, tune la ketre iheetr.
Hnene la itre tim hna lapa hune la itre wetr.
7 Ame la nyipëti a catrëne la itre tim, itre ej a kötr;
Ame ngöne la mejene la hedrenge i nyipë, itre ej a isa kötre hmohmo
8 Kowe la göhnë hnei nyipëti hna acil thatraqane itre ej
Ame hna mejë draië la itre wetr me kuje la itre hnathup.
9 Hnei nyipëti hna acile la ifego matre tha tro kö itre ej a sasaith,
Nge matre tha tro kö itre ej a hakuthe la fen.
10 Nyidrëti a upe la itre qeqe ne tim hnine la itre hnathup;
Itre ej a neni nyipine la itre wetr.
11 Itre ej a hamë tim kowe la itre öni ne hnitr;
Itre ej a thue imene la itre boliko wael ka meci hnei pi ij.
12 E hune itre ej, kola të la itre waco ne hnengödrai;
Ume ej a ho nyipine la itre dröne hnitr.
13 Qa ngöne la itre hnahag e koho, nyipëti a thue imene la itre wetr.
Meji hë la ihnadro hnene la wene ne la itre huliwa i nyipë.
14 Nyipëti a aciane la haö thatraqane la itre öni
Me itre hnitr thatraqane la itre atr,
Matre tro la ihnadro a hamëne la xen
15 Ene la waina ka amadrinëne la hni ne la atr,
Memine la oel ka amelemelene la iqëmek,
Memine la falawa ka aegöcatrene la hni ne la atr.
16 Meji hë la itre sinöe i Iehova,
Lo itre arasi ne Lebanona hnei nyidrë hna traan,
17 E cili, itre waco a kuca la itre trengene waco.
Hnine la itre göti la uma i sigony.
18 Ame la itre wetre ka draië, ke thatraqane la itre nani ne wetr;
Ame la itre git, ke hnë zae ne la itre neköi öni.
19 Hnei nyidrë hna kuca la treu matre nyi hatrene la itre hneijin;
Atre hnyawa hi la jö la ijine tro ej a meköl.
20 Nyipëti a axulune la jidr, ame hna miti pi,
Ijine kola nyi mejene la itre öni ne hnitr.
21 Itre neköi liona a ho kowe la tha i angatr
Me sipo xen koi Akötresie.
22 Ame hë la kola fetra la jö,
Angatr a bëeke kowe la itre uma i angatr, lo hnei angatr hna meköl.
23 Kola tro la atr troa huliwa,
Nge angeic a huliwa mec uti hë e hej.
24 Iehova fe, nyimutre catre la itre huliwa i nyipë!
Hnei nyipëti hna kuca asë itre ej cememine la inamacan.
Tiqa ha la ihnadro hnene la itre huliwa i nyipë.
25 Hetrenyi la hnagejë atraqatr nge ka isaisa,
Nge ka tiqa hnei itre öni ka co me ka tru.
26 E cili la hna kötr la itre he,
Memine fe la Leviathana,* lo hnei nyipëti hna xup troa elo.
27 Angatr asë a mejiune koi nyipë
Matre kapa la a i angatr ngöne la nyipi ijin.
28 Ame la hnei nyipëti hna hamëne koi angatr, ke angatr a hlem.
Nyipëti a fe la ime i nyipë, nge meji asë hë angatr hnene la itre ewekë ka lolo.
29 Ame la nyipëti a saze hna goe, angatr a hnehengazo.
Maine tro nyipëti a xome hmaca la mano ne mel, tro angatr a mec me bëeke hmaca kowe la xaxau.
30 Maine tro nyipëti a upe la ua i nyipë, tro ha xup itre ej,
Nge tro nyipëti a ahnyipixene hmaca la ihnadro.
31 Tro la lolo i Iehova a cile hut epine palua.
Tro Iehova a madrine la itre huliwa i nyidrë.
32 Nyidrëti a goeëne la ihnadro, nge ej a hmengöhmengön;
Nyidrëti a ketr la itre wetr, nge itre ej a so.
33 Eni a ajan troa nyima* koi Iehova e nöjei drai ne mele ni;
Tro ni a nyiman la nyine iatruny kowe la Akötresing e mele pala kö ni.
34 Epi tro la itre mekunang a amadrinë nyidrë.*
Tro hë ni a madrin pi Iehova.
35 Tro ha patre la itre ka kuca la ngazo qa celë fen,
Me apatrene trije la itre atr ka iakötrë.
Pi tro ni a atrunyi Iehova. Atrunyi Ia jë!*