Pane Tusi Itre Joxu
18 Thupene la itre hnepe ijin, hmekune la hnaakönine macatre ne qaqacile la nöj, öni Iehova koi Elia: “Tro jë wai Ahaba, ke tro ni a axulune la mani kowe la nöj.” 2 Elia a tro ju troa wai Ahaba. Nge hna lepe hnyawa la nöje Samaria hnei jiin.
3 Nge ngöne la ijine cili, hnei Ahaba hna hë Obadia, lo atre thupëne la hnalapa i joxu. (Ketre atre ka xoue Iehova catr. 4 Ame lo Iezebela a iup troa humuthe la itre perofeta i Iehova, hnei Obadia hna xome la 100 lao perofeta, me thewe gurup ne 50, me juetrën hnine la itre ngönemenyi. Hnei angeice fe hna thue falawa me tim koi angatr.) 5 Öni Ahaba koi Obadia ka hape: “Tro nyiso a trongëne la nöj, me wange la itre tim me itre hnathup, ma tro jë nyiso a öhnyi haö nyine thuane la itre hos, me boliko, wanga meci pi la itre öni së. ” 6 Nyidroti a thawa pi la nöj. Nge Ahaba a tro casi ju ngöne la ketre gojeny, nge Obadia a tro casi ju ngöne la ketre gojeny.
7 Obadia pala kö a tro, nge traqa pi hi Elia koi angeic. Hna canga wangatrehmekunyi Elia hnei Obadia, matre angeic a sa iwatingöneca ju, me hape: “Elia, nyipëti hi joxung?” 8 Sa jë hi Elia ka hape: “Eni hi, ngo tro ja thuemacane la joxu i ö ka hape, eni hë la.” 9 Ngo sa jë hi Obadia ka hape: “Nemene la ngazong? E tro ni a kuca la hnei nyipëti hna qaja, tro hë Ahaba a humuthi ni. 10 Ke qëmeke i Iehova Akötresi nyipë ka mel, hnene la masetang hna iup troa thel agö nyipë ngöne la nöjei nöj, me nöjei baselaia. Nge e qaja jë itre atrene la ketre nöj, maine ketre baselaia ka hape, ‘Patre kö nyidrë,’ Ahaba a upi angatr troa sisinyi laka, tha hnei angatre kö hna öhnyi nyipë. 11 Ngo enehila, nyipëti a upi ni troa qaja kowe la masetange ka hape, nyipëti hë la. 12 Nge e tro ni a trotriji nyipë, tro hë la ua i Iehova a xomi nyipë kowe la ketre götran hnenge hna thatre, ngo ase pena ni qaja koi Ahaba, nge tha tro kö nyidrëti a öhnyi nyipë. Haawe, tro hë nyidrëti lai a humuthi ni, ngo ka xoue Iehova ni, qaane lo eni a co. 13 Tha drei mejene kö nyipë la hnenge hna kuca, lo Iezebela a humuthe la itre perofeta i Iehova? Thatre kö nyipë laka, hnenge hna juetrëne la 100 lao perofeta i Iehova, me thewe gurup ne 50, matre juetrë angatr hnine la itre ngönemenyi, me thue falawa me timi koi angatr? 14 Ngo enehila, nyipëti a upi ni troa qaja kowe la masetange ka hape, nyipëti hë la. Nga tro hë nyidrëti lai a humuthi ni.” 15 Ngo öni Elia: “Qëmeke i Iehova Akötresie ka mel, lo joxu ne la itre trongene isi e hnengödrai hnenge hna nyihluen,* tro ni a wai joxu la drai ce.”
16 Ame hnei Obadia hna tro koi Ahaba, me qaja asë la ewekë ka traqa, nge Ahaba a tro ju troa wai Elia.
17 Ame ju hi la Ahaba a öhnyi Elia, öni nyidrë: “Haawe, eö hi la, lo ka axulune la itre hulö koi Isaraela.”
18 Ngo sa jë hi Elia ka hape: “Tha zönge kö la Isaraela a akötr, ngo zö i nyipëti pe, me fami ne la keme i nyipë, ke hnei epuni hna nuetrije la itre wathebo i Iehova, me nyihluene la itre Baala. 19 Enehila, icasikeu Isaraela jë koi ni hune la wetre Karemela. Nge hëne jë fe la 450 lao perofeta i Baala, memine la 400 lao perofeta ka nyihluene la itre sine feni ka hmitrötr, itre ka xeni ngöne la laulau i Iezebela.” 20 Ame hnei Ahaba hna iupi fë maca kowe la angetre Isaraela asë, nge nyidrëti a icasinekeune jë la nöjei perofeta hune la wetre Karemela.
21 Elia a ewekë jë kowe la nöj me hape: “Tro nyipunie a luelu uti hë eu? Maine Iehova la nyipi Akötresie, nga nyihlue i nyidrëti jë, ngo maine Baala, nga nyihlue i angeice jë.” Ngo pëkö hna sa hnene la nöj. 22 Thupene lai, öni Elia: “Eni pe hi la perofeta i Iehova, ngo ala 450 lao perofeta i Baala. 23 Traqa fë pi la lue neköi kau, nge tro la itre perofeta i Baala a iëne la ketre, me thë me amë la itre sine mitr hune la hu sinöe, ngo tha tro kö angatr a amelene la eë. Nge ame ni, tro ni a hnëkëne la ketre neköi kau, nge tro ni a atë hune la hu sinöe, ngo tha tro kö ni a amelene la eë. 24 Thupene lai, tro la itre perofeta a thithi kowe la haze i angatr, nge tro ni a thithi* koi Iehova. Nge ame la Akötresie ka troa sa, me dreuthe la huuj, nyidrëti hi la nyipi Akötresie.” Matre önine jë hi la nöj ka hape: “Ka loi.”
25 Öni Elia jë hi kowe la itre perofeta i Baala: “Ala nyimu kö epun, matre iëne jë la ketre neköi kau, nge hnëkëne jë. Thupene lai, thithi jë kowe la haze i epun, ngo tha tro kö epuni a amelene la huuj.” 26 Angatr a xome jë la neköi kau hna iën, me hnëkën, me thithi koi Baala qaan e hmakany uti hë e midi. Öni angatr: “Baala, sa jë koi hun.” Ngo pëkö ca mejen, nge pëkö ka sa koi angatr. Ngo angatre pala hi a peje trootro xötreithe la ita ne huuj i angatr. 27 Matre ame hë e midi, hnei Elia hna nyiqaane hnyimasai angatr me hape: “Hë catre jë, ke haze lai, ma tru hnei mekun i angeic! Nge ma angeic a troagö!* Maine pena, ka meköle pala kö, nge loi e troa ahlën!” 28 Matre angatr a hë catre jë, me isa xöji angatr hnei itre neköi hele me itre jo, thenge lo aqane kuca i angatr, uti hë la kola si madra asë la ngönetrei angatr. 29 Fenesi hë la midi, nge angatr pala hi a enienije menu, uti hë la hawa ne tro fë la itre huuj ne wene feja e hej. Ngo pë pala hi ka ewekë, pëkö ka sa koi angatr, me nyipiewekë angatr.
30 Thupene lai, öni Elia kowe la nöj: “Alemi jë.” Matre angatr a tro ju koi Elia, nge nyidrëti a acile hmaca ju lo ita ne huuj i Iehova, lo hna thëtrij. 31 Elia a xome pi la 12 lao etë, thenge lo etrune la itre tribu ne la itre nekö i Iakobo, lo hnei Iehova hna qaja ka hape: “Tro ha hë eö Isaraela.” 32 Nge angeic a xome jë la itre etë troa acile hmaca la ketre ita ne huuj thatraqane la ëje i Iehova. Nge hnei angeic a si hnaope xötreithe la ita ne huuj. Nge ame la hnaop cili, ijije troa tran e hnin la lue sea* ne itine feja. 33 Thupene lai, angeic a ati sinöe jë hune la ita ne huuj, me thë la neköi kau, me atë la mitr hune la hu sinöe. Nge öni Elia: “Nyialiene jë la foa lao trengene tim atraqatr, nge fie pi la huuj hna troa dreuth, memine la itre sinöe.” 34 Thupene lai, öni angeic: “Fie hmaca pi.” Matre angatr a alua fie jë. Nge öni Elia: “Pana acasi hmaca.” Matre angatr a akönia fie jë. 35 Ame hna di asë xötreithe la ita ne huuj, nge hnei Elia hna upi angatr troa nyialiene la hnaop hnei tim.
36 Matre ame hë ngöne la hawa ne tro fë la itre huuj ne wene feja e hej, hnei Elia hna easenyine la ita ne huuj me hape: “Iehova fe, Akötresi Aberahama, me Isaaka me Isaraela, epi troa mama enehila laka, nyipëti la Akötresie e Isaraela, nge eni la hlue i nyipë, nge hnenge hna kuca la nöjei ewekë cili, ke nyipëti la ka upi ni. 37 Sa jë koi ni Iehova! Sa jë koi ni, matre tro la nöje ce a atre laka, ame nyipë Iehova, nyipëti hi la nyipi Akötresie, nge aja i nyipë tro hmaca angatr a bëeke koi nyipë.”
38 Ame hna mala pi qa hnengödrai la eë qaathei Iehova. Nge ej a dreuthe asë jë la huuj me itre sinöe, me itre etë, me xaxau, nge goi qaqacile fe la tim hnine lai hnaop. 39 Ame hë la kola öhne lai hnene la nöj, hnei angatr asë hna sa iwatingöneca, me thil me hape: “Iehova la nyipi Akötresie! Iehova la nyipi Akötresie!” 40 Nge öni Elia kowe la nöj: “Xolouthe ju la itre perofeta i Baala! Nge wange kö kötre pi la ala cas!” Matre hnene la nöj hna canga xolouthe la itre perofeta, nge Elia a autinyi angatre pi kowe la hneopegejë e Kisona, me humuthi angatr.
41 Nge öni Elia jë hi koi Ahaba: “Elë hmaca jë nyipë, nge xeni jë nge iji jë, ke drenge hë së la mejene mani atraqatr.” 42 Ame hnei Ahaba hna elë troa xeni me ij. Nge ame Elia, angeic a elë jë hune la wetre Karemela, me thil e kuhu hnadro, me amë la he i angeic akawane la lue iwatingöneca. 43 Nge öni angeic kowe la hlue i angeic: “Pane elë jë, nge goeëne ju la hnagejë.” Matre hnene lai hlu hna elë, me goeën, nge öni angeic: “Pëkö hnenge hna öhn.” Matre hnei Elia hna a 7 lao upi angeic me hape: “Elë hmaca jë.” 44 Nge thupene la hna 7 ne tro, önine lai hlu ka hape: “Hetre neköi iaw hnenge hna öhn, kösë hnatrapaime i atr, kola elë qa ngöne la hnagejë.” Matre öni Elia: “Tro ja qaja koi Ahaba ka hape, ‘Hnëkëne jë la ikatre i nyipë! Nge uti pi qëmekene troa hlupi lai mani, wanga jole pi tro nyipëti a bëek!’” 45 Ame hna xulu pi la itre iaw, nge miti ju hi la hnengödrai, nge hna nyiqane hnahna la eny, me hlupi la mani ka catr. Nge Ahaba pala hi a nyinyap hune ikatr a tro Iezerela. 46 Ame hnene la ime i Iehova hna hamë men koi Elia, matre hnei angeic hna sile göne la iheetre ka qea i angeic, me nyinyape qëmeke i Ahaba uti hë Iezerela.