Iobu
38 Ame hnei Iehova hna sa koi Iobu qa ngöne la wene, me hape:
2 “Drei la ka juetrën la eamong
Me ithanata ngo pë pe atrehmekun?
3 Pane hnëkë jë eö, nge hni ne trahmanyi jë;
Tro ni a hnyinge koi eö, nge tro hë eö a qejepengöne koi ni.
4 Ekaa eö lo eni a ami trepene la ihnadro?
Sa jë koi ni e ka inamacan eö.
5 Nge maine atre hi eö,
Drei la ka acili tulu ne la ihnadro, me athip hun ej la eno ne tulu?
6 Nge kola të hune nemen la itre trepen ej?
Drei la ka acil la etë ka sisitria,*
7 Ngöne la kola ce sue madrin la itre wëtresij ne hmakany,
Me ce madrin hnene la nöjei nekö i Akötresie? *
8 Drei la ka thingi qëhnelö ne la hnagejë
Ngöne la ej a kaca qa ngöne la qeqen ej,
9 Lo eni a heetrën ej hnene la itre iaw
Me atuth* ej hnene la melöhlem,
10 Ngöne lo eni a nyi ifegon ej
Me amë la itre qëhnelö me itre agö,
11 Me hape: ‘Ijiji ö hi troa tro uti hë la, ngo tha tro kö eö a sasaith;
Tro hi a cil e celë la itre hoke ne gejë i ö ka pi tru’?
12 Hapeu, hane fe kö eö* musinëne la hmakany
Me köjan kowe la kaqa ne lai la göhnen ej,
13 Matre tro ej a ea la itre cane la fene hnengödrai
Me jumejume la itre atre ka ngazo?
14 Ame la ihnadro, ej a saze tune la dro ka fedr hna hujan hnene la nyine pelehatren,
Nge kola mama la itre pengön ej, tune la itre nyine amingömingöi iheetr.
15 Ngo hna cipane la lai kowe la itre atre ka ngazo,
Matre xecie hë la ime i angatr ka draië.
16 Nge hapeu, hnei ö kö hna uti ngöne la itre qeqe ne hnagejë
Me waipengöne la itre gaa jui?
17 Hna amamane kö koi ö la itre qëhnelö ne la mec?
Nge hnei eö kö hna öhne la itre qanahag ne la melöhlem?*
18 Hnei eö kö hna öhne la etrune la ihnadro?
Haawe, maine atre asë hi eö lai, nga qaja jë koi ni.
19 Kola lapa ekaa la lai?
Nge kola lapa ekaa la jidr
20 Matre tro eö a tro sai angatr kowe la itre götrane i angatr
Me atre la jëne troa tro koi angatr?
21 Hapeu, ase hë hnaho eö matre atrepengöne jë eö lai?
Nge nyimutre catre kö la itre macatre* i ö?
22 Hnei ö kö hna lö ngöne la hnë ami kiona,
Me öhne la hna xawane la wene mani ka catr,
23 Lo hnenge hna hnëkën thatraqan la ijine akötr,
Me drai ne isi?
24 Kola fetra qa kaa la lai?*
Nge kola traqa qa kaa la enyi ne koië?
25 Drei la ka sine la jë i tim thatraqane la di atraqatr
Me nyi jëne la wene me itre iaw me hedreng,
26 Matre troa maniëne la itre götran gaa pë atren,
Memine la hnapapa gaa pë atre lapan,
27 Matre ithuane hmaca jë la ihnadro hna angazon
Nge matre cia hmaca jë la haö?
28 Hetre keme ne kö la mani
Nge drei la ka hnahone la itre wene lepany?
29 Kola fetra qa ngöne la hni drei la tim ka catr,
Nge hnei drei hna upunen la hnötr ka uti qa hnengödrai
30 Ngöne la kola lapane la itre tim tune la ketre etë atraqatr,
Nge kola catre la tim hune la gaa jui?
31 Nge hapeu, atreine kö eö troa othe la itre eno ne fini wëtresij ne Kima*
Me senge la itre otrene fini wëtresij ne Kesil?*
32 Atreine kö eö troa upe la ketre fini wëtresij* ngöne la ijin hna sa
Maine iujine la itre fini wëtresij ne Uresa* me itre nekön ej?
33 Atre kö eö la itre wathebo* ka ej e koho hnengödrai,
Maine atreine kö eö troa acile la itre wathebo cili kowe la ihnadro?
34 Atreine kö eö troa sue kowe la itre iaw
Matre sië eö hnene la mani atraqatr?
35 Atreine kö eö troa upe la itre samek?
Tro kö itre ej a traqa troa wai ö me hape: ‘Eahuni hë la!’
36 Drei la ka amë la inamacan ngöne la itre iaw*
Me hamë atrehmekun kowe la itre ewekë e koho hnengödrai?*
37 Drei la ka inamacan matre e la etrune la itre iaw?
Drei la ka atreine neng la itre trengene tim qa hnengödrai,
38 Ngöne la kola nyi trëtr la xaxau
Nge kola fedre la dro?
39 Atreine kö eö troa wej la ketre öni thatraqane la liona
Me amejine la itre neköi liona
40 Ngöne la angatr a zae ngöne la hnaope i angatr
Me wewë ngöne la hnë zae i angatr?
41 Nge drei la ka hnëkëne la ane la halo
Ngöne la kola treije koi Akötresie hnene la itre nekö i nyën
Nge itre ej a sesësesë agö ke pëkö a i angatr?