Hagai
1 Ame ngöne la hnaaluene macatre ne mus i Dariu, ngöne la pane drai ne la hna 6 ne treu, hnei Hagai* perofeta hna tro fë la trengewekë i Iehova koi Zerubabela gavena ne Iudra, nekö i Sealetiela, me koi Iosua atre huuj ka sisitria, nekö i Iehozadaka. Öni angeic:
2 “Hane hi la hna qaja hnei Iehova joxu ne la itre trongene isi e hnengödrai: ‘Öni angatre la: “Tha ijine pala kö troa xupe* la uma* i Iehova.”’”
3 Nge hnei Hagai perofeta pala hi hna tro fë la trengewekë i Iehova, me hape: 4 “Hapeu, ijine tro kö la a lapane la itre uma i epun hna kuca hnei nyipi sinöe, ngo tra etë pe la uma ce? 5 Ngo enehila, hane hi la hna qaja hnei Iehova, joxu ne la itre trongene isi e hnengödrai: ‘Mekune hnyawa ju la itre aqane mele i epun.* 6 Hnei epuni hna jum atruny, ngo co hi la hnei epuni hna menuën. Epuni a xen, ngo tha meji kö epun. Epuni a ij, ngo epuni pala kö a pi ij. Epuni a heetr, ngo tha keukawa kö epun. Ame la atr ka huliwa troa kepe mani, ke angeic a amë la manie i angeic ngöne la ketre itrengene ka xulu.’”
7 “Hane hi la hna qaja hnei Iehova joxu ne la itre trongene isi e hnengödrai: ‘Mekune hnyawa ju la itre aqane mele i epun.’
8 “‘Elë jë hune la wetr, eö sinöe jë, nge acile jë la uma, matre tro ni a madrin nge troa atrunyi ni,’ öni Iehova.”
9 “‘Tru catre lo itre hnei epuni hna lapa treqen, ngo co hi la hnei epuni hna kapa; nge ame lo itre hnei epuni hna bëeke fë koi hnalapa, ke hnenge hna ufetrij. Pine nemen?’ öni Iehova joxu ne la itre trongene isi e hnengödrai. ‘Pine laka, kola hnyeqetr la umang, nge epuni pe kö a isa nyenyap troa kuca hnyawan la itre uma i epun. 10 Celë hi matre, hnene la hnengödrai hna thingi jën la wene lepany, nge hnene la ihnadro hna cipane la itre xenin ej. 11 Hnenge hna hëne la qaqacil kowe la ihnadro, me itre wetr, me itre wene feja, me waina ka hnyipixe, me oel, me kowe la itre xeni ne la dro, me itre atr, me itre öni, me kowe la nöjei huliwa ne la lue ime i epun.’”
12 Ame hnei Zerubabela nekö i Sealetiela, me Iosua atre huuj ka sisitria, nekö i Iehozadaka, me itre atrene la nöj, hna drei Iehova Akötresi angatr memine la trengewekë i Hagai perofeta, ke Iehova Akötresi angatr la ka upi angeic. Nge hnene la nöj hna nyiqane xoue Iehova.
13 Matre hnei Hagai, lo atre tro fë maca i Iehova hna qaja kowe la nöj, tune lo hna upi angeic hnei Iehova, ka hape: “‘Ce eni hë me epun,’ öni Iehova.”
14 Thupene lai, hnei Iehova hna enijëne la hni i Zerubabela gavena ne Iudra, nekö i Sealetiela, memine la hni i Iosua atre huuj ka sisitria, nekö i Iehozadaka, memine la hni ne la itre atrene la nöj. Nge hnei angatr hna nyiqane huliwa ngöne la uma i Iehova joxu ne la itre trongene isi e hnengödrai, lo Akötresi angatr. 15 Hna traqa lai ngöne la drai 24 ne la hna 6 ne treu, ne la hnaaluene macatre ne mus i Dariu.