Hagai
2 Ame ngöne la drai 21 ne la hna 7 ne treu, hnei Hagai perofeta hna tro fë la trengewekë i Iehova, me hape: 2 “Pane hnyingëne jë koi Zerubabela gavena ne Iudra, nekö i Sealetiela, me koi Iosua atre huuj ka sisitria, nekö i Iehozadaka, me kowe la itre atrene la nöj ka hape: 3 ‘Drei thei epun la ka öhn la emingömingöne lo uma* hnapan? Nge tune kaa ha enehila? Hapeu, tha ka mingöminge kö lo uma hnapan hune la uma celë?’
4 “‘Ngo enehila, catre pi Zerubabela,’ öni Iehova, ‘nge catre pi Iosua atre huuj ka sisitria, nekö i Iehozadaka.’
“‘Catre pi fe epun, itre atrene la nöj,’ öni Iehova, ‘nge huliwa jë hë.’
“‘Ke ce eni me epun,’ öni Iehova joxu ne la itre trongene isi e hnengödrai. 5 ‘Mekune kö lo hnenge hna thingehnaeane koi epun, lo epuni a tro qa Aigupito. Ketre, thei epuni pala hi la uang.* Haawe, the xou kö.’”
6 “Ke hane hi la hna qaja hnei Iehova, joxu ne la itre trongene isi e hnengödrai: ‘Easenyi hë matre tro hmaca ni a jumejume la hnengödrai, memine la fen, me hnagejë, me ihnadro.’
7 “‘Eje hi, tro ni a jumejume la nöjei nöj, nge tro la itre ewekë ka mingöming* ne la itre nöje cili, a traqa kowe la uma celë. Nge tro ni a atiqan ej hnei lolo,’ öni Iehova joxu ne la itre trongene isi e hnengödrai.
8 “‘Ewekëng la sileva, ewekëng la gool,’ öni Iehova joxu ne la itre trongene isi e hnengödrai.
9 “‘Tro hmaca kö elany a mingöminge catr la uma celë hune lo hnapan,’ öni Iehova joxu ne la itre trongene isi e hnengödrai.
“‘Nge tro ni a acile la tingeting e cili,’ öni Iehova joxu ne la itre trongene isi e hnengödrai.”
10 Ame ngöne la drai 24 ne la hna 9 ne treu, ngöne la hnaaluene macatre ne mus i Dariu, hna traqa koi Hagai perofeta la trengewekë i Iehova, ka hape: 11 “Hane hi la hna qaja hnei Iehova joxu ne la itre trongene isi e hnengödrai: ‘Pane hnyingëne jë kowe la itretre huuj göne la wathebo: 12 “Maine tro la ketre atr a amë la sine mitr hna ahmitrötrën ngöne la iheetre i angeic, nge tro la iheetre i angeic a ketr la falawa, maine ketre xen hna hnëkën, maine waina, maine oel, maine ketre nyine xen pena, hapeu, tro kö la xeni cili a hmitrötr?”’”
Önine jë hi la itre atre huuj: “Waea!”
13 Thupene lai, öni Hagai jë hi: “Maine tro la atr a puingazo pine angeic ketr la ka mec, me ketr la ketre xen, hapeu, tha tro kö la xeni cili a puingazo?”
Önine jë hi la itre atre huuj: “Tro lai a pui ngazo.”
14 Matre öni Hagai: “‘Celë hi pengö i angatr, celë hi pengöne la nöje ce qëmekeng,’ öni Iehova, ‘nge celë hi pengöne la itre huliwa ne la lue ime i angatr; ka pui ngazo asë hi la itre hnei angatr hna huujën.’
15 “‘Ngo qan enehila, eni a sipo, pane mekune hnyawa jë* la: Qëmekene la hna iatëkeun la itre etë ngöne la uma ne hmi i Iehova, 16 ke nemene lo ewekë ka traqa? Ame lo kola tro kowe la ketre ta wene feja ka 20 lao tulu, ke 10 pe hi. Ame lo kola tro troa jöe la 50 lao tulu waina ngöne la tono, ke 20 pe hi. 17 Ase hë ni lepi epun me itre huliwa ne la lue ime i epun, hnene la hna aqaqacilën la itre wene feja, me thinith,* me axulun la wene manie ka catr, ngo pëkö ala cas thei epun ka hane ujë koi ni,’ öni Iehova.
18 “‘Eni a sipo, pane mekune hnyawa jë* la, qane enehila, drai 24 ne la hna 9 ne treu, hna ami trepene la uma ne hmi i Iehova; pane mekune hnyawa jë la: 19 Hapeu, hetre feja pala kö ngöne la hna ami wene feja?* Nge tune kaa lo ivin, me iwacua, me igrenad, me ioliv, tha wa pala kö? Qaane enehila, tro hë ni a amanathithi epun.’”
20 Ame hnei Iehova hna ithanata hmaca koi Hagai perofeta, ngöne la drai 24 ne la treu cili. Öni nyidrë: 21 “Qaja jë koi Zerubabela gavena ne Iudra ka hape: ‘Tro ni a jumejume la hnengödrai me ihnadro. 22 Tro ni a qene ipiëne la therone ne la itre baselaia, me apatrene la trengecatrene la itre baselaia ne la itre nöj; tro ni a ukapiëne la itre ikariota me itretre tith; tro ha kei la itre hos me itre ka tith, hnene la itre taua ne la itre trejin me angatr.’”
23 “‘Ngöne la drai cili,’ öni Iehova joxu ne la itre trongene isi e hnengödrai, ‘tro ni a xomi ö Zerubabela hlueng nekö i Sealetiela,’ öni Iehova, ‘me kuca matre tro eö a tune la otrene wanakoime nyine pelehatren, ke eö hi la hnenge hna iën,’ öni Iehova joxu ne la itre trongene isi e hnengödrai.”