Itre Edromë
11 Methi Iehova la itre itulu ka tria,
Ngo ka amadrinë nyidrë la wene tulu* ka meköt.
2 E traqa ha la pi tru, ke kola ixötrethenge la hmahma,
Ngo ame la inamacan, ke thene la itre atr ka atre la itre ifego i angatr.
3 Ame la aqane mele nyipici ne la itre atr ka meköt, ke eje hi la ka eatrongë angeic,
Ngo tro ha luzi la itre ka huliwa thoi pine la itre nyinyithiina i angatr.
4 Ka gufa la troa trenamo* ngöne la drai ne elëhni,
Ngo ame la troa meköt, celë hi ka troa amelene la atr qa ngöne la mec.
5 Tro la emekötine la atr ka mele nyipici, a amekötine la jë i angeic,
Ngo tro la atr ka ngazo a kei pine la aqane iakötrë i angeic.
6 Tro la emekötine la itre atr ka meköt, a amele angatr,
Ngo tro la itre ka mele thoi a jötr ngöne la itre sipu aja i angatr.
7 E meci hë la atr ka ngazo, kolo fe a patre la mejiune i angeic;
Nge ame fe la hnei angeic hna mekune troa kuca hnene la trengecatre i angeic, ke tro fe a patr.
8 Kola amelene la atr ka meköt qa ngöne la akötr,
Nge kolo pena a nyihna i angeic hnene la atr ka ngazo.
9 Ame la që ne la atr ka tha metrötrë* Akötresieti kö, ke kola akötrëne la atre lapa easenyi angeic,
Ngo kola amelen la itre atr ka meköt hnene la atrehmekun.
10 Kola madrine la traon hnene la itre huliwa ka loi ne la itre atr ka meköt,
Nge ej a sue madrin la kola mec la itre ka iakötrë.
11 Jëne la manathith ne la itre atr ka meköt, kola trenamo* la traon,
Ngo kola apatren ej, hnene la që ne la itre ka iakötrë.
12 Ame la atr ka pë wangatrehmekun,* angeic a thaipiëne la atre lapa easenyi angeic,
Ngo kola lapa thaup la atr ka atreine waiewekë.
13 Ame la atre silitrengathoi, ke angeic a kötre fë ithanata,
Ngo ame la atr hna mejiune kow,* angeic a lapa fë la hna qaja.*
14 Kola akötre la nöj, e ngazo la aqane musi* koi angatr,
Ngo troa hetre thangane ka loi,* e ala nyimu la itre ka hamë eamo.
15 Ame la ka sisiny troa të la gufa ne la trenyiwa, ke troa traqa la itre jol koi angeic,
Ngo ame kö la ka xel* ma sisiny troa të la gufa i ketre, ke pëkö ka troa traqa koi angeic.
16 Ame la föe ka mingöming,* ke tro ha atrunyi angeic,
Ngo ame la itre atr ka pë utipin, ke angatr a thapa la itre trengamo.
17 Ame la atr ka lolo,* ke angeic a thele loi koi angeice kö,
Ngo ame kö la atre iaxösisi, ke angeic a thele ge.*
18 Ame la atr ka ngazo, ke ka pë alien la thupen hnei angeic hna kapa,
Ngo ame kö la atr ka meköt, ke tro angeic a kapa la nyipi thupen.
19 Ame la atre isigöline la meköt, ke angeic a tro kowe la mel,
Ngo ame kö la atre nyinyape thele la ngazo, ke angeic a tro kowe la mec.
20 Methi Iehova la itre hni ka iaö,
Ngo aja i nyidrë la itre atr ka mele nyipici.
21 Lapa atre ju laka, tro kö a xeni pun hnene la atr ka ngazo,
Ngo tha tro kö a hane traqa lai kowe la itre nekön ne la atr ka meköt.
22 Tune la otrene gool ngöne la hnafiji ne la puaka
Celë hi pengöne la föe ka mingöming, ngo ka pë wangatrehmekun.
23 Ame la aja ne la itre atr ka meköt, ke kola tro xom kowe la manathith,
Ngo ame kö la mejiun ne la atr ka ngazo, ke kola tro xom kowe la elëhni.
24 Ame la atr ka hamën atrun,* ke angeic hmaca kö a kapa atrun;*
Ame la atre cipan la nyine tro angeic a hamën, ke tro angeic a pë ewekë.
25 Ame la atre ham, ke tro angeic a trenamo,
Nge ame la atre thue imene la itre xan,* ke tro fe a hane thue ime i angeic.
26 Tro ha ejine la atre xawane la itre wene feja,
Ngo tro ha amanathithine la atre salemën.
27 Ame la atre isine troa kuca la loi, ke ka thele manathith,
Ngo ame la atre thele troa kuca la ngazo, ke tro hë angeic a hnëjin.
28 Tro ha kei la atre mejiun kowe la itre trengamo i angeic,
Ngo ame kö la atr ka meköt, tro angeic a kökötre lolo tune la sinöe ka cia hlöeë.
29 Tro la atre axulune la itre jol* kowe la fami i angeic, a menuëne la eny,
Nge tro la hmo a nyihluene la ka inamacan.
30 Ame la wene ne la atr ka meköt, ke sinöe ne mel,
Nge ka inamacane la atre amelene la itre xan.
31 Maine tro la atr ka meköt e celë fen a kepe thangane la itre huliwa i angeic,
Nga the qaja pala ha la ka iakötrë memine la atre kuca la ngazo!