Nehemia
5 Ngo hnene la itre trahmanyi me itre föi angatr hna eetre catr pine la itre trejin me angatr, lo angetre Iudra. 2 Önine la itre xan ka hape: “Ala nyimu catre la itre nekö hun, trahmanyi me jajiny, nge tha ijije kö la itre wene feja, matre tro huni asë a mel.” 3 Nge önine la itre xan ka hape: “Kola jiinë xen, matre hne huni hna hamëne la itre hlapa hun, me itre hlapa vin, me itre uma* hun, matre hetre wene feja nyine xen.” 4 Nge öni itre xan hmaca: “Hne huni hna hamëne la itre hlapa hun, me itre hlapa vin matre hetre mani, nyine kuiëne la mani hna athip hnei joxu. 5 Nge ngacama casi hi la madra* huni me itre trejin me eahun, nge ame la itre nekö hun, ke kösë itre nekö i angatre fe, ngo tro huni a salemëne la itre nekö hun, trahmanyi me jajiny troa nyi hlu. Nge ame fe la itre xa nekö huni jajiny, ke angatre fe hë a nyi hlu. Ngo pëkö hne huni hna atreine kuca, ke ewekë i itre xane pë hë la itre hlapa me itre vine i eahun.”
6 Matre ame hë la eni a drenge la aqane eetre i angatr, memine la hnei angatre hna qaja, elëhni catr jë hi ni. 7 Matre eni a mekune hnyawa ju la itre jole cili, me köjane la itre atre ka draië me itre ka isenyin, nge öning: “Epuni a hë thupen* kowe la itre sipu trejin me epun!” Thupene lai, hnenge hna hnëkë icasikeu ka tru thatraqai angatr. 8 Nge öninge hmaca koi angatr ka hape: “Hne së lo hna isine troa itöne la itre trejin me easë, lo angetre Iudra hna salemën kowe la itre xa nöj. Nge enehila, epuni a pi salemëne la itre sipu trejin me epun? Nge hapeu, tro hmaca kö sa itö angatr e thupen?” Pëkö trene mej, ke thatreine kö angatre sa. 9 Nge öninge hmaca: “Tha ka loi kö la hnei epuni hna kuca. Hapeu, tha hnëqa i epuni kö troa mele thenge la xoue Akötresie, matre tha tro kö la itre xa nöj, itre ithupëjia me easë a qeje së? 10 Ngo ame fe ni, me itre trejin me eni, me itre ka xatua ni, tha eahuni fe kö a hamë mani me wene feja göi thupen. Matre loi ju hë hna hamëne göi thupen. 11 Nge qaan enehila, hamëne hmaca pi koi angatre la itre hlapa i angatr, me itre hlapa vine i angatr, me itre hlapa oliv* i angatr, me itre uma i angatr, memine la mani* hna nyixan, me qitr, me waina ka hnyipixe, me oel, lo hnei epuni hna athipi thupen koi angatr.”
12 Matre önine la itre atre cili ka hape: “Tro huni a bëeke fë la itre ewekë cili koi angatr, nge tha tro kö huni a athipi thupen. Tro huni a trongëne hnyawa la hnei ö hna qaja.” Ame hnenge hna hëne la itre atre huuj, me upe la itre atre cili troa sisiny me trongëne la hnei angatre hna qaja. 13 Nge eni a jumejume pi la ipoos* ne la iheetreng* uti hë la pë alien, nge öning: “Ame la atre ka tha eatrëne la hna sisiny, tro la nyipi Akötresie a hane jumi angeic tröne la hnalapa i angeic, me itre ewekë i angeic. Loi e troa jumi angeice tun, me apë ewekën.” Ame hnene la icasikeu asë hna sa ka hape: “Amen!”* Nge hnene la nöj hna atrunyi Iehova, me trongëne la hna sisiny.
14 Ketre, qaane lo drai ne Aretaseta joxu a acili ni troa gavena ne Iudra, ngöne lo kola 20 lao macatre ne mus i nyidrë uti hë la kola 32 lao macatre, ke traqa koi 12 lao macatre ne tha xeni kö ni me itre trejine me eni, lo xeni hna hnëkën kowe la gavena. 15 Hnene lo itre gavena ka tro pa hna qanangazone la nöj. Hnei angatr hna kapa e nöjei drai, la 40 sekele* sileva göi falawa me waina. Nge hnene fe lo itre ka xatua angatr, hna qanangazone la nöj. Ngo tha hnenge fe kö hna hane ujë tun, ke eni a xoue Akötresie.
16 Ketre, hnenge fe hna ixatua troa xupi ihag, nge pëkö ca hlapa hne huni hna itön. Nge ame la itre ka xatua ni, hnei angatre fe hna ce wanakoimëne la huliwa. 17 Nge traqa koi 150 lao atre Iudra, me itre ka isenyin ka xeni ngöne la laulaung, nge the qaja pala ha la itre atrene la itre xa nöj hne huni hna kapa. 18 Matre e nöjei drai, eni la ka thue xen, ca kau hna atron, me 6 lao mamoe ka lolo, me itre waco. Nge thupene la 10 lao drai, hetrenyi huni la nöjei pengöne waina ka nyimutre. Ngo tha hnenge kö hna sipone lo xeni hna hnëkën kowe la gavena, ke tru hë la huliwa* hna athip kowe la nöj. 19 “Haawe Akötresinge fe, the thëthëhmi ni kö, nge pane amanathithine* ju la itre huliwang thatraqane la nöje ce!”