Koi Filemona
1 Eni Paulo hna akalabusine pi Iesu Keriso, me Timoteo trejin me easë, koi Filemona trejine hnimina nge sine huliwa së, 2 me koi Afia xa i easë, me Arekipo sinee isi së, memine la ekalesia ka icasikeu thei nyipunie.
3 Epi ce me nyipunie la ihnimi gufa me tingetinge qaathei Akötresie Keme së, me Iesu Keriso Joxu së.
4 Eni pala hi a olene koi Akötresie la eni a qeje eö ngöne la itre thithing, 5 ke eni pala hi a drei mejene la lapaune me ihnimi eö koi Iesu Joxu, me ange ka hmitrötr asë. 6 Eni a thithi matre tro la lapaune ka eje thei eö me itre xan, a upi eö troa atrehmekune la nöjei lolo hne së hna kapa jëne Keriso. 7 Nge hna amadrinë ni me akeukawanyi ni la eni a drenge la ihnimi eö, ke hnei eö trejin, hna akeukawane la hni* ne la ange ka hmitrötr.
8 Matre, ngacama ijijinge hi troa upi eö troa kuca la loi, ke aposetolo i Keriso ni, 9 ngo eni pe a sipo eö me mejiune kowe la ihnimi eö, eni Paulo, ketre qatr, nge hna akalabusine pi Keriso Iesu. 10 Eni a sipo eö göne la neköng, Onesimo, lo hnenge hna nyi kemen la kola akalabusi ni.* 11 Ame ekö, tha nyipiewekë kö angeice koi eö, ngo enehila, nyipiewekë hë angeice koi eö, me koi ni. 12 Eni a upi angeice hmaca koi eö, angeic, lo atu ka cong.
13 Eni a aja angeic e celë, matre nyihna i eö troa huliwa koi ni la kola akalabusi ni pine la maca ka loi. 14 Ngo tha ajane kö ni troa kuca la ketre ewekë nge tha hna pane sipo eö, matre tro eö a ajan me sipu kuca la loi, ngo tha hnei hna musinën. 15 Maine jë, ame la nyipi kepin matre kötre* eö jë hnei angeic, tre göi troa bëeke palua koi eö, 16 a tha hlue hmaca kö, ke sisitria ha hune la hlu, ngo ketre trejine hë nge hna hnim. Eni a hnimi angeic ngo the qaja pala ha eö, ke hlue i eö nge trejin me eö. 17 Haawe, maine sinee* i eö ni, nga kepe angeice hnyawa ju tune la aqane tro eö a kepe ni. 18 Nge e hetre ngazo maine gufa i angeice koi eö, qanyinge pë hë të. 19 Eni Paulo, a sipu cinyihane la tusi celë: Eni a sisinyi koi eö troa të la gufa i angeic—ngo mekune kö laka, tru kö la gufa i eö koi ni. 20 Trejine fe, epi tro ni a kepe ixatua qaathei eö ngöne la ëje i Joxu; matre keukawa jë la hning* ngöne la ëje i Keriso.
21 Eni a cinyianyi koi eö ke mejiune ni laka, tro kö eö a kapa la sipong, me hamën atrune hmaca kö. 22 Nge hane ju fe hnëkë göhneng, ke eni a mejiune laka, jëne la itre thith i nyipunie, tro ha nuamacanyi ni me aijijë ni troa wai nyipunie.
23 Epafera lo hna ce akalabusin me eni pi Keriso Iesu, a upe la ibozu i angeic koi eö, 24 me Mareko, me Aritako, me Dema, me Luka, itre sine huliwang.
25 Haawe, epi troa amanathithine la aqane waiewekë i nyipunie hnene la ihnimi gufa i Iesu Keriso Joxu.