Isaia
12 Ame ngöne la drai cili, tro hë eö a qaja ka hape:
“Iehova fe, oleti,
Ke ngacama hnei nyipëti hna wesitr koi ni,
Ngo patre trootro hë la elëhni i nyipë, nge hnei nyipëti hna aupunyi ni.
2 Akötresieti la atre amele ni.
Tro ni a mejiun, nge tha tro kö ni a xou;
Ke Ia* Iehova la trengecatreng me meneng,
Nge nyidrëti la atre amele ni.”
3 Tro epuni a tha tim cememine la madrin,
Qa ngöne la itre qeqe ne mel.*
4 Nge ame ngöne la drai cili, tro epuni a qaja ka hape:
“Olene jë koi Iehova, nge atrune* jë la ëje i nyidrë,
Amamane jë la itre huliwa i nyidrë ka tru nyipine la itre nöj!
Atrune jë la esisitriane la ëje i nyidrë.
5 Nyima* jë koi Iehova, ke hnei nyidrëti hna kuca la itre ewekë ka mingöming.
Qaja amamane jë e cailo fen.
6 Sue jë nge madrine jë eö atre lapa* e Ziona,
Ke ka sisitria la Atre Ka Hmitrötr e Isaraela, lo atre lapa nyipi ö.”