Esodro

9 Ame hnei Iehova hna qaja koi Mose ka hape: “Tro jë eö koi Farao me hape, ‘Hane hi la hna qaja hnei Iehova, Akötresi angetre heberu, “Nue pi la nöjeng, matre tro angatr a nyihlueng. 2 Ngo e xele kö eö, nge e tro pala kö eö a cipa angatr, 3 tro hë eö a öhne la ime i Iehova a lepe la itre öni eö ngöne la itre hlapa. Nge tro la ketre mec ka catrehnin a tithe la itre hos, me itre boliko, me itre kamela, me itre öni ka tru, me itre öni ka co. 4 Tro Iehova a kuca matre tro kö a isa mama la itre si angetre Isaraela, me itre si angetre Aigupito. Tha tro kö la ketre si ne la angetre Isaraela a hane mec.”’” 5 Ketre, ase hë Iehova sa la ijin, öni nyidrë: “Elany, tro ni Iehova a kuca lai kowe la nöj.”

6 Nge elanyi ju kö, hnei Iehova hna eatrëne la ewekë cili. Meci asë hë la itre öni hna axöj hnene la angetre Aigupito, ngo pëkö ca öni ka mec thene la itre hna axöj ne la angetre Isaraela. 7 Farao a ithele jë, nge hna qaja koi nyidrë ka hape, pëkö ca öni ka mec ngöne la itre hna axöj hnene la angetre Isaraela. Ame pe, ka xeti pala hi la hni Farao, nge tha nue kö nyidrëti la nöj.

8 Nge öni Iehova koi Mose me Arona ka hape: “Atiqane jë la lue ime i epon hnei hnatresij, ngöne la hna eë, nge tro Mose a jume draië qëmeke i Farao. 9 Nge tro ej a so ngöne la nöje Aigupito. Nge tro ej a lapane la itre öni, me itre atrene la nöj asë, me nyi theweke ka si trenge pi.”

10 Matre nyidroti a xome jë la hnatresij qa ngöne la hna eë, me lö koi Farao. Nge hnei Mose hna kuiëne draiëne la hnatresij, ame hna nyi thewek ka si trenge pi hune la itre atr, me itre öni. 11 Thatreine kö la itre atre huuj ka kuci haze troa tro koi Mose, ke hna tithi angatre fe me itre xa atre Aigupito hnene la itre ithewek. 12 Ngo hnei Iehova pala hi hna nu troa axetine la hni Farao. Matre tha drei Mose kö me Arona hnei Farao, tune lo hnei Iehova hna qaja koi Mose.

13 Nge öni Iehova jë hi koi Mose ka hape: “Canga ilë jë e hmahmakany, nge lö jë koi Farao, nge hape jë, ‘Hane hi la hna qaja hnene la Akötresi angetre Heberu, “Nue pi la nöjeng, matre tro angatr a nyihlueng. 14 Ke qaane enehila, tro hmekuje hi ni a nu asë la itre akötr koi eö, me itre hlue i eö, memine la nöje i eö, matre atre jë eö ka hape, pëkö ka tung e cailo fen. 15 Ke maine ju, ijiji ni troa xejë la imeng matre troa lepi eö, me nöje i eö hnene la meci ka catrehnin, nge tro hë eö a patre* qa la fen. 16 Ngo hnenge hna nue eö troa mel, matre tro eö a öhne la meneng, nge matre troa hlemu la ëjeng ngöne la fene hnengödrai asë. 17 Ngo eö a pi tru kowe la nöjeng la eö a cipa angatr. 18 Matre elany, ngöne la hawa ce, tro hë ni a axulune la wene mani ka catr, laka, tha hna öhne pala kö e Aigupito qaane lo kola acil ej. 19 Haawe, iupe jë troa alön asë la itre si eö, me nöjei ewekë i eö ngöne la itre hlapa kowe la hnë zae. Nge ame la nöjei atr me öni ka lapa pe ngöne la itre hlapa, tro hë angatre lai a mec hna tran hnene la wene mani ka catr.

20 Ame la itre hlue i Farao ka wangatrune la trengewekë i Iehova, hnei angatr hna canga kötre fë la itre hlue i angatr, me itre si angatr. 21 Ngo ame lo itre ka wangacone la trengewekë i Iehova, hnei angatr hna nue la itre hlue i angatr, me itre si angatr ngöne la itre hlapa.

22 Nge hnei Iehova hna qaja koi Mose ka hape: “Li ime jë, matre trotro pi la wene mani ka catr hui Aigupito asë, hune la itre atr, me itre öni, me nöjei feja ngöne la itre hlapa e Aigupito.” 23 Mose a xejë jë la sine tö i angeic, nge Iehova a axulune pi la hedreng me wene mani ka catr, matre hna trotro la eë* kowe la ihnadro. Ame hnei Iehova hna upe la wene mani ka catr e Aigupito. 24 Hetre wene mani ka catr, nge ame e kuhu hnine ej, kola mel la eë. Ngazo catre la wene mani cili, nge kolo petre hi a hane öhnyi wene mani ka tun e Aigupito, qaane lo kola xötrei lapan. 25 Nge hna lep asë la nöjei ewekë ngöne la itre hlapa, itre atr, me itre öni e Aigupito. Hna angazone fe la nöjei feja, me hutra la nöjei sinöe. 26 Ngo pë fe kö wene mani ka catr e Gosena, götrane hna lapan hnei angetre Isaraela.

27 Ame hnei Farao hna iupe troa hë Mose me Arona, nge öni nyidrë: “Ase hë ni ngazo, nge meköti Iehova, ngo ame ni me nöjeng, ase hë huni ngazo. 28 Xëwe jë koi Iehova matre upu ju la hedreng, me pë pi wene mani ka catr. Nge tro hë ni a nue epuni troa tro, nge tha tro hmaca kö epuni a lapa e celë.” 29 Matre öni Mose ka hape: “E tro hë ni qa ngöne la traon, tro ni a li ime koi Iehova. Nge tro ha pë hedreng, nge tha tro hmaca kö a trotro la wene mani ka catr. Nge tro hë nyipëti a atre laka, Iehova la atrekë ewekëne la ihnadro. 30 Ngo atre hi ni laka, ngöne la ijine cili, tha tro kö nyipë me itre hlue i nyipë, a xoue Iehova Akötresie.”

31 Hna lepe la lino me bali. Ke ame lo bali, ej a wa, nge ame lo lino, eje a eng. 32 Ngo mele pe kö la qitr me kesem, ke lue ka cia hmitr.* 33 Mose a tro pi qaathei Farao, me tro qa ngöne la traon, me li ime draië koi Iehova. Ame hna patre pi la hedreng me wene mani ka catr, nge tha trotro hë la mani. 34 Nge ame hë la Farao a öhne laka, tha mani hë, nge patre hë la wene mani ka catr, me hedreng, nyidrëti hmaca a ngazo koi Akötresie, me axetine la hni i nyidrë, nyidrë me itre hlue i nyidrë. 35 Hnei Farao pala hi hna axetine la hni i nyidrë, nge tha nue kö nyidrëti la angetre Isaraela, tune lo hna qaja hnei Iehova jëne Mose.