Salamo
Thatraqane la atre jumi traem. Salamo i Dravita.
109 Iehova fe, nyipëti la hnenge hna atrun, the lapa thaupu kö.
2 Ke itre atr ka ngazo me itre ka iaö, a fe la që i angatr troa icilekeu me eni.
Angatr a qeje ni memine la itre thinem ka thoi;
3 Angatr a kanothi ni hnei itre trengewekë ne imethinë,
Angatr a isi me eni, nge pë pe nyipi kepin.
4 Angatr a të la ihniming hnene la icilekeu;
Ngo ame ni, eni pala hi a thith.
5 Angatr a të la loi hnei ngazo
Me ihnim hnei imethinë.
6 Acile jë la ketre atr ka ngazo hune la ithupëjiang;
Loi e troa hetre ka icilekeu* ngöne la götrane maca i angeic.
7 Nge ame hë la kola ameköti angeic, loi e troa upe zö angeic;*
Loi e troa goeëne la thith i angeic tune la ketre ngazo.
8 Loi e troa xalaithe la itre drai i angeic;
Loi e tro la ketre a xome la hnëqa i angeic ne atre thup.
9 Loi e tro la itre nekö* i angeic a tune la itre nekön hna mecitrij hnei kem,
Nge troa sine föe la föi angeic.
10 Loi e tro la itre nekö* i angeic a tune la itre ka nyinyape menu me sipo,
Nge loi e tro angatr a tro ananyine la hnalapa i angatr ka hnyiqetr matre thele xen.
11 Loi e tro la hna sipone then,* a thapa asë la hnei angeic hna hetreny,
Nge loi e tro la itre trenyiwa a atrekënö la itre mo i angeic.
12 Loi e tha tro kö la ketre atr a hetre ihnimi nyipici koi angeic,
Nge loi e tha tro kö a utipine la itre nekö i angeic hna mecitrij.
13 Loi e troa apatrene trije la itre matra i angeic;
Loi e troa köletrije la ëje i angatr ngöne hi la ca xötre atr.
14 Loi e tha tro kö Iehova a thëthëhmine la ngazo ne la itre qaaqaa i angeic,
Nge loi e tha tro kö a köletrije la ngazo ne la thine i angeic.
15 Loi e tro pala hi Iehova a goeëne hnyawa la hnei angatr hna kuca;
Loi e tro nyidrëti a köletrije* la ëje i angatr qa la fen.
16 Ke tha mekune hmaca kö la atre cili troa amamane la ihnimi nyipici,
Ngo hnei angeic pala hi hna weje huzune la atr hna axösisin, nge ka pë ewekë, nge ka hni ka akötr
Matre humuthi angeic.
17 Ajane catre angeic troa ieji, ame hna traqa la hnëjine koi angeic;
Tha aja i angeice kö troa amanathithin, matre pëkö ca manathith hnei angeic hna kapa.
18 Hnei angeic hna heetrëne la hnëjin tune la ketre iheetr.
Nge hnene ej hna lapane la ngönetrei i angeic tune la tim,
Me itre june i angeic tune la oel.
19 Loi e tro la itre hnëjine cili a tune la ketre iheetr hnei angeic hna heetrën
Me tune la beletr hnei angeic hna otreëne lapaan.
20 Celë hi aqane tro Iehova a nyithupene kowe la ka icilekeu me eni
Me itre ka qeje ni.
21 Ngo ame nyipë Iehova Joxu Ka Sisitria,
Amele ni jë pine la ëje i nyipë.
Xatua ni jë, ke lolo la ihnimi nyipici i nyipë.
22 Ke pëkö ka isigöli ni, nge pëhë ewekëng,
Nge hna jaqane la hning.
23 Eni a tro tune la iahnu ka patre trootro;
Kola jumejumi ni tune la sipa.
24 Kola genyi la lue iwatingönecang pine ni tha xen;
Kola ae la ngöneng nge eni a fitre* trootro.
25 Eni hë la hna hnyima fë hnei angatr.
Ame la angatr a öhnyi ni, angatr a nangenang.
26 Iehova Akötresinge fe, xatua ni jë;
Amele ni jë hnene la ihnimi nyipici i nyipë.
27 Loi e tro angatr a atre laka, hnene la lue ime i nyipë,
Matre hnei nyipë Iehova fe hna amele ni.
28 Qanyi angatr troa ieji, ngo ame nyipë, tro nyipëti a amanathithin.
Loi e tro angatr a icilekeu me eni, ngo tro ha ahmahmanyi angatr,
Ngo loi e tro la hlue i nyipë a madrin.
29 Loi e tro la itre ka icilekeu me eni a heetrëne la hmahma;
Loi e tro angatr a heetrëne la hmahma tune la ketre ikootr.*
30 Tro ni a catre atrunyi Iehova hnene la qëng;
Tro ni a atrunyi nyidrë qëmekene la ka ala nyim.
31 Ke tro nyidrëti a cil ngöne la götrane maca ne la ka pë mo
Matre troa amele angeic qaathene la itre ka upe zö angeic.