Salamo
71 Iehova fe, eni a zae thei nyipë.
Epi tha tro kö ni a hmahma.
2 Amele ni jë nge xatua ni jë hnene la meköt i nyipë.
Pane drei* ni ju nge amele ni jë.
3 Epi tro nyipëti a tune la git matre nyine hnapong ka catr
Hnë tro pala hi ni a kötre zae.
Amekötine jë troa amele ni,
Ke nyipëti la giting me hnapong.
4 Akötresinge fe, amele ni jë qa ngöne la ime ne la atr ka ngazo,
Me qa ngöne la ime ne la atre iaxösisi ka tha meköti kö.
5 Ke Iehova fe, Joxu Ka Sisitria, nyipëti la mejiuneng;
Hnenge hna mejiune koi nyipë,* qaane lo eni a nekö trahmany.
6 Qaane lo kola hnaho ni, hnenge hna lapa qale koi nyipë;
Ke nyipëti la ka xomi ni qa kuhu hni i nenë.
Eni pala hi a atrunyi nyipë.
7 Ame kowe la ka ala nyim, kösë eni la ketre iamamanyikeu,
Ngo nyipëti kö la hnë zaeng ka catr.
8 Tiqa ha la qëng hnene la itre nyine atrunyi nyipë;
O drai, eni a qaja lapaane la emingömingö i nyipë.
9 The nuetriji ni kö ngöne la eni a qatre trootro;
The nue ni kö ngöne la kola ae la trengecatreng.
10 Kola xöjetriji ni hnene la itre ithupëjiang,
Nge angatr a thele jëne troa thapa la meleng,
11 Me qaja ka hape: “Ase hë nuetriji angeic hnei Akötresie.
Weji angeice jë nge xolouthi angeice ju, ke pëkö ka troa amele angeic.”
12 Akötresieti fe, the ananyi ni kö.
Akötresinge fe, canga traqa pi troa xatua ni.
13 Epi tro la itre ka icilekeu me eni
A hmahma me patr.
Epi troa hmahma me thaipiën
La itre ka thele troa akötrë ni.
14 Ngo ame ni, tro pala kö ni a lapa treqen;
Tro hmaca kö ni a nyixane la nyine atrunyi nyipë.
15 Tro la qëng a qaja la emeköti nyipë,
Nge o drai, tro ej a qaja la itre huliwa ne iamele i nyipë,
Ngacama nyimutre catr nge thatreine kö troa e asë.
16 Tro kö ni a traqa troa qaja la itre huliwa ka mene i nyipë,
Iehova fe, Joxu Ka Sisitria;
Tro hmekuje hi ni a qaja la emeköti nyipë.
17 Akötresieti fe, hnei nyipëti hna ini ni qaane lo eni a nekö trahmany,
Nge uti hë enehila, eni a qaja trongëne la itre huliwa i nyipë nyine hain.
18 Akötresieti fe, ngacama qatre hë ni nge qia ha ni, ngo the nuetriji ni kö.
Pane nue ni pi troa qaja la trengecatre* i nyipë kowe la itre xötre atr elany
Memine la mene i nyipë kowe la itre hna troa hnahon elany.
19 Akötresieti fe, kola traqa kowe la itre gaa draië la meköt i nyipë;
Hnei nyipëti hna kuca la itre ewekë atraqatr;
Akötresieti fe, drei la ka tui nyipë?
20 Ngacama hnei nyipëti hna aijijë ni troa melëne la itre itupath me akötr,
Ngo hamëne hmaca pi koi ni la trengecatreng;
Xomi ni pi qa ngöne la itre gaa jui ne la fen.
21 Epi tro nyipëti a akökötrene la lolong
Me ekögölithi ni, me akeukawanyi ni.
22 Akötresinge fe, tro hë ni a atrunyi nyipë hnene la itre nyine elo miuzik ka hetre filen
Pine la aqane mele nyipici i nyipë.
Ka Hmitrötr e Isaraela fe,
Pi tro ni a elo arp me nyima* atrunyi nyipë.
23 Tro hë la ukeineqëng a sue madrin ngöne la eni a nyimane la itre nyine atrunyi nyipë,
Ke hnei nyipëti hna amele ni.
24 O drai asë, tro la thinemeng a qaja* la meköt i nyipë,
Ke tro ha hmahma me thaipiëne la itre ka thele troa apatrenyi ni.