Deuteronomi

6 Hane hi la itre hna amekötin, me itre hna ahnith, me itre wathebo hnei Iehova Akötresi epun hna hamën nyine ini epun, matre tro epuni a trongën ngöne la nöj hnei epun hna troa thapa, thupene la epuni a ase sasaithe la hneopegejë Ioridrano. 2 Tro hë epun, me itre nekö i epun, me itre api i epun a xoue Iehova Akötresi epun. Nge e nöjei drai ne mele epun, tro hë epuni a trongëne la itre hna ahnith, me itre hna amekötin hnenge hna hamë epun, matre tro epuni a mel aqeany. 3 Ngo Isaraela fe, qa i epun troa dreng me trongëne hnyawan itre ej, matre tro epuni a mele ka loi me mana ngöne la nöj gaa neni gala la melek me miel, tune lo hnei Iehova Akötresi ne la itre qaaqaa i epun, hna sisinyi koi epun.

4 “Isaraela fe, drenge ju! Ame Iehova Akötresi së, ke ka casi hi Iehova. 5 Qa i ö troa hnimi Iehova Akötresi ö hnene la hni i ö ka pexej, me mele i ö ka pexej, me trengecatre* i ö ka pexej. 6 Ame la itre ithanata hnenge hna hamën koi ö enehila, ke tro itre ej a mel e kuhu hni i ö. 7 Nge qa i ö troa inin* itre ej kowe la itre nekö i ö trahmany, me ithanatan itre ej ngöne la eö a lapa hnine la uma i ö, me ngöne la eö a tro e cahu gojeny, me ngöne la eö a meköl me mejë hmaca. 8 Tro itre ej a tune la hatrene hna hnöth kowe la ime i ö, me tune la otren hune la göbadri* i ö. 9 Cinyianyine jë itre ej hune la itre hune qëhnelö ne la uma i ö, me hune la itre qëhnelö* i ö.

10 “Nge ame hë la kola thepe epun hnei Iehova Akötresi epun ngöne la nöj hnei nyidrëti hna sisiny troa hamëne kowe la itre qaaqaa i epun, ene Aberahama, me Isaaka, me Iakobo—lo nöj gaa hetre traon ka mingöming nge ka tru, ngo tha hnei epuni kö hna xup, 11 me itre hnalapa ka tiqa hnei nöjei pengöne ewekë ka lolo, ngo tha hnei epuni kö hna xawan, me itre hnë tha tim, ngo tha hnei epuni kö hna kuj, me itre hlapa vin me ioliv,* ngo tha hnei epuni kö hna traan. Nge e ase hë epuni xeni mej, 12 wai epuni kö, wanga thëthëhmi Iehova pi epun, lo atre thepe epun qa Aigupito, lo nöje hna thahluë* epuni ngön. 13 Iehova Akötresi epun la nyine tro epuni a xouen, nge nyidrëti hi la nyine tro epuni a nyihluen, nge tro epuni a sisiny ngöne la ëje i nyidrë. 14 Tha tro kö epuni a xötrethenge la itre xaa haze, ene la itre haze ne la itre nöj ka lapa xötreithi epun, 15 wanga tro Iehova Akötresi epun a elëhni me apatrenyi epun qa celë fen. Ke ame Iehova Akötresi epun, lo ka lapa nyipi epun, Akötresie ka ajan troa hnimi nyidrë hmekuje* hi.

16 “Tha tro kö epuni a tupathi Iehova Akötresi epun, tune lo epuni a tupathi nyidrëti e Masa. 17 Ngo qa i epun troa trongëne hnyawan la itre hna amekötin hnei Iehova Akötresi epun, me drenge la itre ihaji i nyidrë, me itre hnei nyidrëti hna ahnithe koi epun. 18 Nge qa i epun troa kuca la loi memine la meköt qëmekei Iehova, matre tro epuni a mele ka loi, me thapa la nöje ka lolo hnei Iehova hna sisiny troa hamëne kowe la itre qaaqaa i epun, 19 ene la troa helëne la itre ithupëjia me epun, tune la hnei Iehova hna sisiny.

20 “Nge ame elany, maine tro la itre nekö i epun a hnying ka hape: ‘Hnauëne laka, hnei Iehova Akötresi së hna hamëne la itre ihaji, me itre hna amekötin, me itre wathebo celë?’ 21 Tro hë epuni a sa koi angatre ka hape: ‘Hna thahluë hun hnei Farao e Aigupito, ngo hnei Iehova hna thepe hun qa Aigupito, jëne la ime ka catre i nyidrë. 22 Nge e cili, hnei Iehova pala hi hna amamane qëmekei eahun la itre hatren, me itre iamamanyikeu ka tru nge hnamecin koi Farao, me itre atrene la hnalapa i angeic. 23 Nge hnei nyidrëti hna thepe hun qa cili, me xomi huni a tro celë, matre troa hamëne koi hun la nöj, tune lo hnei nyidrëti hna sisiny kowe la itre qaaqaa hun. 24 Thupene lai, hnei Iehova hna upi hun troa trongën asë la itre hna amekötine celë, matre tro pala hi sa mel, me mele ka loi, tun enehila. 25 Tro ha jelemeköti së, e tro sa thupën troa trongën asë la itre wathebo, matre tro sa drei Iehova Akötresi së, tune lo hnei nyidrëti hna upi së.’