Mika

4 Ame ngöne la itre drai ne la pun,*

Tro ha acile hutine la wetre ne la uma i Iehova

Hune la itre he ne wetr,

Tro ej a sasaithe la itre sasala,

Nge tro la nöjei nöj a elë kow ej.

“Jë fe, matre elë jë së kowe la wetre i Iehova

Me kowe la uma ne la Akötresi i Iakobo.

Tro nyidrëti a ini së la itre gojeny i nyidrë,

Nge tro sa trongëne la itre jë i nyidrë.”

Ke troa xulu la wathebo* qa Ziona,

Memine la trengewekë i Iehova qa Ierusalema.

 3 Tro nyidrëti a amekötine la nöjei atr ka ala nyimu

Me hajine la nöjei nöj ka catr e gaa nany.

Tro angatr a lepelepe la itre taua i angatr, matre nyine uja dro

Me itre jo i angatr, matre nyine hele* ne xötre vin.

Tha tro kö la ketre nöj a xejë la taua kowe la ketre nöj,

Nge tha tro hmaca kö angatr a inine isi.

 4 Tro angatr a isa lapa* fene la itre vin me itre iwacua i angatr,

Nge pëkö ka troa axouenyi angatr,

Ke ase hë qaja lai hnei Iehova joxu ne la itre trongene isi e hnengödrai.

 5 Tro la itre nöj a isa tro ngöne la ëjene la itre haze i angatr,

Ngo ame kö së, tro sa tro ngöne la ëje i Iehova Akötresi së, uti hë epine palua.

 6 “Ngöne la drai cili,” öni Iehova,

“Tro ni a acasine lo itre ka peje ca,

Nge tro ni a acasine lo itre hna ijen,

Memine lo hnenge hna akötrën.

 7 Tro ni a kuca matre tro la itre ka peje ca a mele pe,

Nge tro la itre hna trij e gaa nany a nöje ka catr;

Tro ni, Iehova a musi koi angatr hune la wetre Ziona,

Qaane enehila nge uti hë epine palua.

 8 Ngo ame pena eö, ita ne thup ne la hnënge öni,

Gaa draië ne la nekö jajinyi ne Ziona,

Tro ha bëeke koi ö la pane* mus, eje hi, tro hmaca kö ej a bëek,

Ene la hnanyijoxu ne la nekö jajinyi ne Ierusalema.

Pëkö joxu i ö?

Maine meci pena ha la atresi ö,

Matre eö a hokötr tune la föe ka hnaho?

10 Nekö jajinyi ne Ziona, qali jë hnei akötr nge hokötre jë,

Tune la föe ka hnaho,

Ke tro hë eö a trotrije la traon matre lapane la itre hlapa.

Tro eö a tro Babulona,

Nge e cili, tro ha amele eö;

Tro Iehova e cili a thepe eö qa ngöne la ime ne la ithupëjia.

11 Tro hë la itre nöj ka nyimutre a ce cile koi ö;

Tro angatr a hape: ‘Loi e troa ahmahmanyi* angeic,

Nge epi tro la luemeke së a goeëne la ka traqa koi Ziona.’

12 Ngo thatre kö angatre la itre mekuna i Iehova,

Nge tha trotrohnine kö angatre la aja* i nyidrë;

Ke tro nyidrëti a acasi angatr ngöne la hnë lepe qitr, tune la xötre qitre hna hnyipi thupa.

13 Nekö jajinyi ne Ziona, cile jë nge lepelepe jë la itre wene feja tune la kola lepelepe qitr;

Ke tro ni a saze la itre jiane i ö koi fao,

Me itre ihnatrapaca i ö koi kopa,

Nge tro hë eö a lep anyilanyilane la itre nöj ka nyimutre.

Tro eö a amë thatraqai Iehova la itre mo i angatr qa ngöne la hna qenatrekënö,

Me itre trengamo i angatr thatraqane la nyipi Joxu ne la ihnadro.”