Ezekiela

34 Hnei Iehova hmaca hna ithanata koi ni, me hape: 2 “Nekö i atr, perofetane jë la akötr ka troa traqa kowe la itre ka thupë mamoe e Isaraela. Perofetane jë nge hape jë koi angatr: ‘Hane hi la hna qaja hnei Iehova Joxu Ka Sisitria: “Ekölöhini la itre ka thupë mamoe e Isaraela, ke angatre hi a mekun troa ithua i angatre kö! Ngo hapeu, tha itre öni kö lo nyine tro angatr a ithuan? 3 Epuni a öni la giris, me heetrë pene mamoe, me humuthe la öni ka girisi catr. Ngo tha ithuane pe epun la hnënge öni! 4 Tha ase kö epuni aegöcatren la neköi mamoe ka kucakuca, me aloine la ka wezipo, me badën la ka eatr, me bëeke fë la ka tro menu, me thel la ka patr. Ngo catre pe la aqane musi epun koi angatr me aqane folosa angatr. 5 Ame hnei angatr hna isa tro, ke pëkö atre thupën; isaije hë angatr, matre angatre pë hë la tha ne la itre öni wael. 6 Hnene la itre mamoeng hna tro menu hune la itre wetr me itre sasala ka draië. Isaije hë la itre mamoeng e cailo fen, nge pëkö ka thele angatr me sikusiku angatr.

7 “‘“Qa ngöne lai, drenge ju la hnei Iehova hna qaja koi epun, itre ka thupë mamoe: 8 ‘“Maine nyipici laka, ka mele ni,” öni Iehova Joxu Ka Sisitria, “hnene pë hë la itre mamoeng hna nyi tha ne la itre öni wael, ke pëkö ka thupë angatr. Nge ame pena la itretre thupë mamoeng, ke tha hnei angatre kö hna thele nyudren. Hnei angatre hi hna mekun troa sipu ithua i angatr, ngo tha ithuane pe la itre mamoeng.”’ 9 Qa ngöne lai, drenge ju la hnei Iehova hna qaja koi epun, itre ka thupë mamoe. 10 Hane hi la hna qaja hnei Iehova Joxu Ka Sisitria: ‘Tro ni a cil kowe la itretre thupë mamoe, me ihnyingë me angatr pine la aqane thupën angatr la itre mamoeng.* Tha tro hmaca kö ni a upi angatr troa ithuane* la hnënge mamoeng, matre thatreine hë angatre lai troa sipu ithua i angatr. Tro ni a thapa la hnënge mamoeng qa ngöne la që i angatr, nge tha tro hmaca kö nyudreni a nyi a i angatr.’”

11 “‘Ke hane hi la hna qaja hnei Iehova Joxu Ka Sisitria: “Eni hi la! Tro kö ni a sipu thel me thupëne la hnënge mamoeng. 12 Tro ni a kuca hnyawan la hnënge mamoeng, tune la atre thup ka öhne hmaca me ithuan la hnënge mamoe i angeic ka isaije. Tro ni a thepe angatr qa ngöne la nöjei götran hna aisaije angatre kow, lo drai ne kola tru hnei iaw me miti catr. 13 Eje hi, tro ni a tro xomi angatr qa ngöne la itre nöj, me acasi angatr qa ngöne la itre nöj e cailo fen. Tro ni a tro sai angatr kowe la nöje i angatr, me ithua i angatr hune la itre wetre Isaraela, ezine la itre tim me itre hnë lapa ne la nöj. 14 Tro ni a ithua i angatr ngöne la hna axö öni ka lolo, nge tro angatr a xeni trootro hune la itre wetr ne Isaraela. Tro hë angatr a meköl e cili ngöne la itre götran gaa tru hnei haö, me xeni trootro ngöne la itre götran gaa sisitria ne la itre wetr ne Isaraela.”

15 “‘“Tro kö ni a ithuane la hnënge mamoeng, nge eni kö la ka troa ameköle angatr,” öni Iehova Joxu Ka Sisitria. 16 “Tro ni a thele la mamoe ka patr, me bëeke fë la ka tro menu, me badën la ka eatr, me aegöcatren la ka kucakuca. Ngo ame kö la ka kökötr me ka egöcatr, ke tro ni a apatrenyi angeic. Tro ni a ithua i angeic hnene la iameköti.”

17 “‘Ngo ame kö epun itre mamoeng, drenge ju la hna qaja hnei Iehova Joxu Ka Sisitria: “Eni hë la a troa amekötin la ketre mamoe me ketre mamoe, me itre mamoe trahmany me itre nani trahmany. 18 Hapeu, tha ijiji epuni kö troa xen ngöne la itre götran gaa sisitria? Nga hnauëne kö la epuni a tro waja la haö ngöne la itre hna axö öni i epun? Nge hnauëne la epuni a siën me adron la tim hnei epuni hna ij? 19 Tro kö la hnënge mamoeng a xen ngöne la itre hna axö öni hnei epuni hna wajawaja? Me ije la tim hnei epuni hna adrone la epuni a si?”

20 “‘Matre hane hi la hna qaja koi angatr hnei Iehova Joxu Ka Sisitria: “Eni hi la! Tro kö ni a amekötin la mamoe ka giris memine la ka wegeju, 21 ke ame lo itre ka wezipo, hnei epuni hna penyi angatr hnei wengesisila me iap. Hnei epuni lo hna uku angatr hnene la itre jian i epun, uti hë la angatr a isaije a tro gaa nany. 22 Eje hi, tro ni a amelen la hnënge mamoeng, nge tha tro hmaca kö angatr a nyi tha. Nge tro ni a amekötin la ketre mamoe me ketre mamoe. 23 Tro ni a hamë angatr la ca atre thup, ene Dravita hlueng, nge tro angeic a ithua i angatr. Angeice hi la ka troa ithua i angatr, nge tro hë angeic a thupë angatr. 24 Tro hë ni Iehova a Akötresi angatr, nge tro Dravita hlueng a tane i angatr. Eni Iehova la ka qaja lai.

25 “‘“Nge tro ni a kuca la isisinyikeu ne tingeting me angatr. Tro ni a apatrene la itre öni wael ngöne la nöj, matre tro angatr a mele tingeting ngöne la itre hnitr, me meköl ngöne la itre hnaxulu. 26 Tro ni a amanathithin la itre mamoeng me itre götran xötreithe la sasalang, nge tro ni a axulune la mani ngöne la nyipi ijin. Tro la itre manathith a trotro tune la mani. 27 Tro ha wa wen la itre sinöe ne la hlapa, nge tro la ihnadro a ham, nge tro ha mele tingeting e cili la itre atrene la nöjeng. Nge tro hë angatr a atre laka, Iehova ni, ngöne la eni a hutra la itre nyine isilekeu angatr, me thepe angatr qaathene la itre ka folosa angatr. 28 Tha tro hmaca kö angatr a nyi tha ne la itre xaa nöj; tha tro kö la itre öni wael a öni hatrë angatr, nge tro hë angatr a mele tingeting, pëkö ka troa axouenyi angatr.

29 “‘“Tro ni a acian koi angatr la ketre hlapa ka troa hlemu.* Nge tha tro hmaca kö angatr a mecijiin ngöne la nöj, nge tha tro hmaca kö a thaipië angatr hnene la itre xaa nöj. 30 ‘Tro hë la nöje Isaraela a atre e cili laka, ce eni Iehova Akötresie me angatr, nge angatre hë la nöjeng,’ öni Iehova Joxu Ka Sisitria.”’

31 “‘Nge ame pena epun hnënge mamoeng, itre mamoe hnenge hna thupën, itre atre hi epun, ngo eni la Akötresi epun,’ öni Iehova Joxu Ka Sisitria.”