Itre Edromë
4 Itre nekönge fe, drenge ju la ini qaathene la kem;
Drenge hnyawa ju, matre inamacane jë epun,
2 Ke tro ni a hamë epuni la itre ini ka sisitria;
The thipetrije kö la hnenge hna ini* epun.
3 Ketre nekönatr ka loi thiina ni ekö koi kaka
Nge hna hnime catrën hnei nenë.
4 Hnei nyidrëti hna ini ni me hape: “Epi tro la hni i ö a thupëne la itre trengewekëng.
Drengethenge ju la itre hnenge hna amekötin, matre mele pi ö.
5 Thele jë la inamacan, thele jë la trotrohnin.
The thëthëhmine kö la hnenge hna qaja, nge the ananyine kö.
6 The nuetrije kö ej, nge tro hë ej a thupë eö.
Hnine* ju ej, nge tro hë ej a hmekë eö.
7 Ame la ka nyipiewekë* catr ke inamacan, haawe isine jë troa inamacan,
Nge nyixane jë fe la hnei eö hna atre, hnene la trotrohnin.
8 Wangatrun eje jë, nge tro hë ej a adraië eö.
Tro hë ej a atrunyi ö, ke hnei eö hna xolouthe catrën ej.
9 Tro ej a atë hune la he i ö la itrapetre iengen ka mingöming;
Tro ej a thaipi ö hnene la ketre korona ka lolo.”
10 Neköng drenge ju, nge kapa hnyawane ju la itre trengewekëng,
Matre tro eö a mel koi nyimu macatre.
11 Tro ni a ini eö la jë ne la inamacan;
Tro ni a tro sai ö ngöne la itre hmene gojenyi ne la meköt.
12 Pëkö ka troa ajolë eö la eö a tro;
Nge pëkö ka troa akeinyi ö la eö a nyinyap.
13 Xolouthe catrëne ju la ihaji;* nge the nue eje kö.
Thupën ju la ihaji, nge tro hë ej a hamë eö la mel.
14 The xome kö la hmene gojeny ne la itre ka ngazo,
Nge the tro kö ngöne la gojeny ne la itre ka iakötrë.
15 Jea pi, nge the trongëne kö;
Ananyin eje pi, nge the cile trootro kö.
16 Ke thatreine kö angatre meköl, e tha hna pane kuca kö la ngazo.
Tha pi meköle kö angatr, e tha hnei angatre kö hna akeinyi ketre.
17 Angatr a xeni la falawa ne iakötrë,
Me iji la waina ne la isi.
18 Ngo ceitune la jë ne la itre ka meköt, memine la lai ka hudrum e hmahmakany
Kola lai trootro uti hë la kola cicinyi la jö.
19 Ceitune la jë ne la itre ka ngazo memine la gaa mit;
Thatre kö angatr la ka akeinyi angatr.
20 Neköng, drenge hnyawa ju la itre trengewekëng;
Hnangenyëne hnyawa ju la itre hnenge hna qaja.
21 Tha tro kö itre ej a patr qa ngöne la mekuna i ö;
Thupëne hnyawa ju e kuhu hni i ö,
22 Ke tro lai a amelen la itre ka öhne itre ej
Me aegöcatrene la itre ngönetrei* i angatr.
23 Hune la nöjei ewekë asë, thupëne hnyawa ju la hni i ö,
Ke kola xulu qa cili la itre qeqe ne mel.
24 Ananyine pi qaathei ö la itre trengathoi,
Nge ananyine pi qaathei ö la itre trengewekë ka iaö.
25 Tro hi la luemeke i ö a goeën qëmekei ö,
Eje hi, goeën hutine ju la ka ej qëmekei ö.
26 Amekötine jë* la gojeny hna xötrëne hnene la lue ca i ö,
Matre troa tro loi la itre jë i ö asë.
27 The jea kö kowe la götrane maca me mi.
Ananyine pi la lue ca i ö qa ngöne la ngazo.