Itre Edromë
6 Neköng, maine hnei ö hna sisiny troa të la gufa i ketre,
Maine hnei ö hna sisiny* kowe la trenyiwa,
2 Maine jötre hë eö ngöne la hnei ö hna sisiny,
Nge hna othi ö hnene la itre trengewekë ne la që i ö,
3 Kuca jë la, neköng, matre mele pi ö,
Ke kei hë eö ngöne la ime ne la atre lapa easenyi ö:
Tro jë troa wai angeic, ipië ju, nge upe iele angeice jë.
4 The nue kö la luemeke i ö troa meköl,
Memine la lue alameke i ö troa meek.
5 Kötre mele pi tune la gazel* qa ngöne la lue ime ne la atre weje öni,
Me tune la waco qa ngöne la lue ime ne la ka pehna waco.
6 Atr ka genyi fe, tro jë troa wange la xejë;
Goeëne ju la aqane ujë i nyën nge inamacane pi.
7 Ngacama pëkö ka musinë nyën, me tane huliwa i nyën, me ka elemeke i nyën,
8 Ngo nyën a hnëkë xen ngöne la ijine hedredrei,
Me xawa kemej ngöne la ijine menu.
9 Atr ka genyi fe, uti hë eu la tro eö a saaju?
Eu la tro eö a mejë qa hna meköl?
10 Pane meköle jë kö, nge pi nyimeke ju kö,
Sile jë kö la lue ime i ö matre mano,
11 Nge tro ha aca tro pë ewekë i ö tune la kola traqa la atrekënö,
Me tune la kola thapa la itre ewekë i ö hnene la atr ka hetre jia ne isi.
12 Ame la atr ka pë hnënyöngön nge ka iakötrë, angeic a tro menu me qaja trongëne la itre trengathoi;
13 Angeic a isamekë me nyihatr hnei iwanakoim me waca.
14 Pi tro catre la hni i angeic a kuca la ngazo,
Tha mano kö angeic thel troa iakötrë me aciane la zikoziko.
15 Celë hi matre, troa asesëkötrë angeic hnene la akötr;
Tro hë la atre cili a aca tro kei, nge pëkö nyin koi angeic.
16 Hetrenyi la 6 lao ewekë hnei Iehova hna sisin;
Eje hi, 7 lao ewekë hnei nyidrëti hna methinën:
17 Ene la luemek ka pi tru, me thinem ka thoi, me lue im ka humuthe la itre atr ka pë ngazon,
18 Memine la hni ka thele troa iakötrë, me lue ca ka canga nyinyap troa kuca la ngazo,
19 Memine la temoë ka thoi lapaa tune la angeic a mano,
Memine la atre aciane la iwesitrë thene la itre trejin.
20 Neköng, drengethenge ju la itre hna amekötin hnei keme i ö,
Nge the trije kö la itre ini* hna hamën hnei thine i ö.
21 Sile kanothe ju itre ej ngöne la hni i ö;
Hnöthe jë itre ej ngöne la nyinawa i ö.
22 Ame hë la eö a tro, ke tro itre ej a köja gojenyi ö;
Ame hë la eö a troa meköl, ke tro itre ej a thupë eö;
Nge ame hë la eö a hlë, ke tro itre ej a ithanata* koi ö.
23 Ke ceitune la hna amekötin memine la laam,
Nge ceitune la wathebo memine la lai,
Nge ceitune la itre ihaji memine la gojenyi kowe la mel.
24 Tro itre ej a thupë eö qa ngöne la föe ka ngazo,
Memine la thinem ka iahmo ne la föe ka kuci ngazo.*
25 The piine kö la emingömingö i angeic e kuhu hni i ö
Nge the hmo kö pine la luemeke i angeic ka iahmo,
26 Ke zö ne la föe ne gojeny matre sine falawa pe hi la hna hetreny hnene la trahmanyi cili,
Ngo maine föe ka faipoipo hë, ke zö i angeic la kola luzi la mele ne la ketre atr.
27 Ijije kö tro la trahmany a atë la eë hune la imano i angeic, nge tha tro kö a mel la itre iheetre i angeic?
28 Maine tro pena angeic a tro hune la itre wanalep ka mel, nge tha tro kö a dreuthe la lue waca i angeic?
29 Ceitune hi lai memine la atr ka ce meköl memine la föe ne la atre lapa easenyi angeic;
Ame la ka ketri eahlo, tro kö angeic a xeni pun.
30 Tha tro kö a methinëne la atrekënö
E angeic a atrekënö hnei mecijiin.
31 Ame pe, e traqa ju ee angeic, tro hmaca kö angeic a a 7 lao të;
Tro angeic a hamën asë la itre ewekë ka tru thupen ngöne la uma i angeic.
32 Ame la atre nyixetë memine la ketre föe, ke ka pë wangatrehmekun;*
Ame la atre kuca lai, angeic a aluzi angeice kö.
33 Akötre me hmahma la hnei angeic hna troa kapa,
Nge tha tro kö a patre la hmahma i angeic.
34 Ke tro la zalu a jel la trengehni ne la atrekë föen;
Pëkö utipine i nyidrë la nyidrëti a troa të.
35 Ame koi nyidrë, pëkö thupen* ka ijij;
Ngacama hamëne ju hë eö la nöjei pengöne ahnahna, ngo tha tro jë kö a puj la elëhni i nyidrë.