Ieremia
10 Nöje Isaraela fe, drenge ju la iameköti i Iehova. 2 Hane hi la hna qaja hnei Iehova:
“The xötrethenge kö la qenenöj ne la itre xaa nöj,
Nge the xouene kö la itre hatrene qaa hnengödraiPine hi laka, itre xaa nöj a xouene lai.
3 Ke ka pë alien* la qenenöj ne la itre atr.
Kola sa sinöe ngöne la hnaxulu,
Nge jëne la jia ne huliwa,* kola tratrau idrola hnene la atr ka atrein.
4 Thupene lai, kola amingömingön ej hnei sileva me gool
Me acatrene ej hnei hama me fao, matre cile tha enij.
5 Tune la nyine axouenyi öni ngöne la hlapa kokob, thatreine kö ithanata hnene la itre idrola cili;
Loi e troa ajönyi angatr, ke thatreine kö angatre tro.
The xoue angatre kö, ke thatreine kö angatr iakötrë,
Nge goi thatreine fe angatr kuca la loi.”
6 Iehova fe, pëkö ka tui nyipë.
Ka draië catre nyipë, ka draië me men la ëje i nyipë.
7 Joxu ne la nöjei nöje fe, hapeu, tha hnëqa huni kö troa xoue nyipë? Tha nyipëti kö la ka ijij troa kapa lai?
Eje hi, ame thene la itre ka inamacan ne la itre nöj me nöjei baselaia i angatr,
Pëkö ka tui nyipë.
8 Ume ka xeti he asë hi angatr, ka tha huliwan la mekuna i angatr.
Ka hmo* la atre nue la sinöe troa ini angeic.
9 Kola traqa fë sileva qa Tasesa me gool qa Ufaz,
Matre troa huliwan hnene la atr ka atrein, memine la lue ime ne la atre dreu fao.
Hna cane la itre iheetre ne la itre idrola hnei thenyi ka bulu, me drela ka madra.
Hna kuca asë la itre idrola cili hnene la lue ime ne la ka atreine huliwa.
10 Ngo ame Iehova, nyidrëti hi la nyipi Akötresie.
Nyidrëti hi la Akötresieti ka mel, me Joxu ka epine palua.
Tro ha hmengöhmengöne la ihnadro hnene la elëhni i nyidrë,
Nge pëkö nöje ka troa atreine xomihnine la elëhni i nyidrë.
11 * Hane hi la hnei epuni hna troa qaja koi angatr:
“Ame la itre haze ka tha hane kö xupe la hnengödrai me ihnadro
Ke tro hë angatr a patr qa la fen, me fene la hnengödrai celë.”
12 Nyidrëti hi la ka xupe la fen hnene la trengecatre i nyidrë,
Nyidrëti hi la ka acile hutine la ihnadro ka ham hnene la inamacan i nyidrë
Me seluthe la hnengödrai hnene la atreine i nyidrë.
13 Ame la nyidrëti a ithanata,
Kola enienije la itre tim e hnengödrai,
Nge nyidrëti a aelëne la itre iaw* qa ngöne la itre cane la fene hnengödrai;
Nyidrëti a ce upe la samek me mani;*
Nyidrëti a upe pi la eny qa ngöne la itre hnë ami ewekë i nyidrë.
14 Ame asë hi la nöjei atr, ke ka huliwa menu nge ka pë atrehmekun.
Ame asë hi la nöjei atre dreu fao, tro angatr a hmahma pine la idrola hnei angatr hna kuca;
Ke trengathoi la idrola fao* i angatr,
Nge tha ka mele kö.*
15 Ka pë aliene* lai, nge itre huliwa lai nyine hnyima fë.
Ngöne la ijine troa ameköti angatr, tro hë angatr a patr.
16 Isa pengöne kö la edrö i Iakobo memine la itre ewekë cili,
Ke nyidrëti la ka xup asë,
Nge Isaraela la sine tö ne la edrö i nyidrë.
Iehova joxu ne la itre trongene isi e hnengödrai la ëje i nyidrë.
17 Hleme jë la trengetrenge i ö,
Föe hna cile kanoth.
18 Ke hane hi la hna qaja hnei Iehova:
“Enehila, tro ni a hnatrije* la itre atr tröne la nöj,
Nge tro ni a axulune la akötr koi angatr.”
19 Ekölöhini, ke wezipo* hë ni!
Pëkö nyin la eatreng.
Matre öning: “Mecinge hë lai, nge loi e tro ni a atreine xomihnin.
20 Hna akein la itateng nge xeci asë hë la itre eno.
Ase hë trotriji ni hnei itre neköng trahmany, nge patre hë angatr.
Matre pë hmaca kö ka troa acile la itateng me seluthe la itre imaanong.
21 Ke hnene la itre ka thupë mamoe hna huliwa menu,
Nge tha hnei angatre kö hna hnyinge koi Iehova.
Celë hi matre, tha ka inamacane kö la aqane ujë i angatr,
Nge isa ije hë la hnënge mamoe i angatr.”
22 Drenge hë eö la ewekë ka traqa?
Hetre mejen atraqatr qa ngöne la nöj e kolopi,
Matre troa pë alien la itre traon e Iudra, hnë lapa ne la itre kuli wael.
23 Iehova fe, atre hi ni laka, tha qanyine kö la atr troa öhne casine la jë i angeic.
Tha qanyine kö la atr ka tro, troa amekötin la hnei angeic hna feke ca.
24 Iehova fe, haji ni jë thenge la meköt i nyipë,
Ngo tha hnei elëhni kö, wanga lep apatrenyi ni pi hnei nyipë.
25 Nenge pi la elëhni i nyipë kowe la itre nöje ka tha nyipiewekë nyipëti kö
Me kowe la itre fami ka tha hëne kö la ëje i nyipë.
Ke hnei angatr hna hej angazo Iakobo,
Eje hi, hnei angatr hna hej angazo angeic uti hë la angeic a patr,
Nge hnei angatr hna angazone la nöje i angeic.