Salamo
Nyima. Salamo ne la itre nekö i Kora. Thatraqane la atre jumi traem; Nyine nyima ngöne Maalath,* ketre thupei ketre. Masekil* i Hemana atre Ezera.
88 Iehova fe, Akötresing me atre amele ni,
Eni a hë koi nyipëti e lai,
Nge eni a cil qëmekei nyipëti e jidr.
2 Epi tro la thithing a elë koi nyipë,
Nge epi tro nyipëti a thil me dreng la eni a sipo ixatua.
3 Ke tiqa ha la meleng hnei akötr,
Nge easenyi hë tro ni a uti koi Hua.
4 Kolo fe hë a e ni memine la itre ka troa uti koi hnaop;
Kösë eni la ketre atr ka pë trengecatr,
5 Hna nuetrij nyipine la itre ka mec
Tune la itre hna humuth ka meköl hnine la hua,
Lo itre atr hnei nyipëti hna thëthëhmin
Nge hna sawa troa kapa la itre ixatua* i nyipë.
6 Ase hë nyipëti ami ni ngöne la hua ka jui catre kö,
Me ngöne la itre gaa mit, ketre hnaop ka thatrehmekun.
7 Hace catre koi ni la nyipëti a elëhni,
Nge nyipëti a heti ni hnene la itre hoke ne gejë i nyipëti ka catr. (Sela)
8 Hnei nyipëti hna ananyin qaatheng la itre hnenge hna atre;
Hnei nyipëti hna kuca matre troa sisi ni hnei angatr.
Jötre hë ni ngöne la hnö, nge thatreine hmaca kö ni kötr.
9 Kucakuca ha la luemekeng, ke hleuhleu catre ni.
Iehova fe, eni a hë nyipëti o drai;
Eni a xejë draië la lue imeng koi nyipë.
10 Hapeu, tro kö nyipëti a kuca la itre nyine hain thatraqane la itre ka mec?
Atreine kö la itre ka pë trengecatr ngöne la mec troa cil me atrunyi nyipë? (Sela)
11 Tro kö a qaja trongën la ihnimi nyipici i nyipë ngöne la hua?
Memine la nyipici i nyipë ngöne la hnë apatren?*
12 Hapeu, tro kö a atre la itre nyine haine i nyipë ngöne la gaa mit?
Memine la meköt i nyipë ngöne la nöj ne thëthëhmi?
13 Ngo ame pe Iehova fe, eni pala hi a sipo ixatua koi nyipë,
Kola elë koi nyipëti la thithing e nöjei hmakany.
14 Iehova fe, hnauëne laka, nyipëti a nuetriji ni?
Hnauëne laka, xele hë nyipëti ma wai ni?
15 Qaane lo eni a co,
Hna akötrë ni nge hnenge hna easenyine la mec;
Kucakuca catre ni pine la itre akötr hnei nyipëti hna nue koi ni.
16 Kola kaca tranyi ni hnene la trenge elëhni i nyipë;
Kola apatrenyi ni hnene la itre nyine xouen qaathei nyipë.
17 Itre ej a kanothi ni e nöjei drai tune la itre tim;
Itre ej a thingi jëng qa ngöne la nöjei götran.*
18 Hnei nyipëti hna ananyin qaatheng la itre sineeng me itre sinatrongeng;
Jidri pe hi la sinatrongeng.