Isaia
48 Drenge ju la, itre matra i Iakobo fe,
Epun itre ka xome la ëje i Isaraela
Nge epun itre ka tro* qa ngöne la itre tim e Iudra,
Itretre sisiny ngöne la ëje i Iehova
Me thith kowe la Akötresi Isaraela,
Ngo tha ngöne kö la nyipici me meköt.
2 Ke angatr a xome la ëje i angatr qa ngöne la traon ka hmitrötr
Me thele ixatua thene la Akötresi Isaraela,
Lo hna hëne ka hape, Iehova joxu ne la itre trongene isi e hnengödrai.
3 “Qaan ekö, hnenge hna thuemacanyi ö la itre ewekë hnapan.
Hnei itre ej hna tro qa ngöne la qëng,
Nge hnenge hna qaja amamane itre ej.
Ame hnenge hna kuca, matre eatre pi.
4 Ke atre kö ni laka, ka catre he eö
None fao la nyinawa i ö, nge kopa la göbadri i ö,
5 Ase hë ni qaja koi ö e cili lo.
Ase hë ni thuemacanyi ö qëmeken troa eatr,
Matre tha tro kö eö a qaja ka hape: ‘Hnene la hazeng hna kuca lai;
Hnene la idrolang hna tratraun memine la idrolang hna ahmun hna amekötine lai.’
6 Ase hë eö drenge me öhne la itre ewekë cili.
Hapeu, tha tro kö eö a ithanatan?
Qaan enehila, eni a thuemacanyi ö la itre ewekë ka hnyipixe,
Itre ewekë hna juetrën, lo hnei ö hna thatre petre kö.
7 Hna hnyipi xupe hi la itre ewekë cili, nge tha ka hekö catre kö,
Tha ase pala kö eö drenge lai uti hë la drai ce,
Matre thatreine kö eö troa qaja ka hape: ‘Atre hë ni.’
8 Waea, pëkö hnei ö hna dreng, nge pëkö hnei ö hna atre,
Nge ame ekö, tha hnei ö kö hna hnangenyën.
Ke atre hi ni laka, ka iaö catr eö,
Nge qaane lo kola hnaho eö, hna ati ëje i ö, icilekeu.
9 Ngo pine la ëjeng, tro ni a xomehnöthe la elëhning;
Pine la lolong, tro ni a xomihnin,
Nge tha tro kö ni a apatrenyi ö.
10 Goeën! Hnenge hna huliwa* eö, ngo tha tune kö la sileva.
Hnenge hna tupathi ö ngöne la ihueë ne akötr.
11 Tro ni a ujë tun thatraqai ni, eje hi, thatraqai ni kö,
Ke hnauëne laka, tro ni a nue la ketre troa tha metrötrë ni?
Tha eni kö a hamëne* la lolong koi ketre.
12 Drei ni ju Iakobo fe, me eö Isaraela, lo hnenge hna hën.
Tha saze kö ni. Eni la qaan, nge eni fe la pun.
13 Hnene la lue imenge hna ami trepene la ihnadro.
Nge hnene la ime macang hna seluthe la hnengödrai.
Ame la eni a hë, itre ej a icileny.
14 Icacaxenyi jë epuni asë, nge drenge ju.
Drei e angatr la ka qaja amamane lai?
Tro la hnimina i Iehova
A kuca koi Babulona la aja i nyidrë,
Nge tro la ime i angeic a lep la angetre Kaledaia.
15 Ase hë ni ithanata, me hë angeic.
Ase hë ni traqa sai angeic, nge tro hë angeic a eatrën la mekuna i angeic.
16 Easenyi jë koi ni, nge drenge ju.
Qaane lo xötrei, pëkö hnenge hna qaja juetrën.
Ngöne lo ijine kola eatrën itre ej, eni fe e cili.”
Nge ame enehila, hnei Iehova Joxu Ka Sisitria hna upi ni, memine la ua i nyidrë.
17 Hane hi la hna qaja hnei Iehova, Atre Itö Mele i ö, lo Atre Ka Hmitrötr e Isaraela:
“Iehova ni, Akötresi ö,
Lo atre ini ö nyine loi koi ö,
Lo atre iuji ö ngöne la gojenyi nyine tro eö a trongën.
18 Ekölöhini, maine drenge ju eö la itre wathebong!
Tro la tingetinge i ö a tune la hneopegejë
Nge tro la meköti ö a tune la itre hoke ne gejë.
19 Tro la itre matra* i ö a tune la ngöni
Nge tro ha nyimutre la itre matra i ö tune la itre wene ngöni.
Tha tro kö a köletrij* me apatrene la ëje i angatr qëmekeng.”
20 Tro pi qa Babulona!
Kötre pi qaathene la angetre Kaledaia!
Ithuemacanyine jë cememine la madrin! Nge cainöjëne jë!
Tro fë jë la maca uti hë la cane la fene hnengödrai.
Qaja jë ka hape: “Hnei Iehova hmaca hna itö Iakobo, hlue i nyidrë.
21 Goi tha pi ije fe angatr ngöne lo nyidrëti a eatrongë angatr ngöne la hnapapa.
Hnei nyidrëti hna anenine koi angatr la tim qa ngöne la git;
Hnei nyidrëti hna thë la git me akacane la tim.”
22 Öni Iehova: “Pëkö tingeting kowe la itre atr ka ngazo.”