Iosua
24 Ame hnei Iosua hna icasikeune la nöjei tribu ne Isaraela e Sekema, me hëne la itre qatr ne Isaraela, me itre tan, me itre atre amekötin, me itre tane huliwa; nge hnei angatr hna cil qëmekene la nyipi Akötresie. 2 Öni Iosua jë hi kowe la nöj asë: “Hane hi la hna qaja hnei Iehova Akötresi Isaraela: ‘Hnene lo itre qaaqaa i epun ekö hna mel ngöne la ketre götran ne la hneopegejë,* me nyihluene la itre xaa haze. Ce angatre lo me Tera keme i Aberahama me Nahora.
3 “‘Thupene lai, hnenge hna hë Aberahama qaaqaa i epun, ka lapa ngöne la ketre götran ne la hneopegejë, nge hnenge hna upi angeic troa trongëne la nöje Kanana. Hnenge hna kuca matre mana jë la itre matra i angeic, me hamë Isaaka koi angeic; 4 nge ame koi Isaaka, hnenge hna hamë Iakobo me Esau. E thupen, hnenge hna hamëne la wetre Seira koi Esau; nge ame pena Iakobo me itre nekö i angeic trahmany, ke hnei angatr hna uti a tro Aigupito. 5 Itre macatre thupen, hnenge hna upi Mose me Arona koi epun, me lepe la nöje Aigupito hnene la itre akötr, matre thepe epun qa ngöne la nöje cili. 6 Ame lo eni a lö fë la itre keme i epun qa Aigupito, me tro sai angatr kowe la hnagejë, hnene la angetre Aigupito hna wej la itre keme i epun, me itre ikaatr me itre ka ti hos, uti hë la Hnagejë Ka Palulu. 7 Nge hnene la itre keme i epun hna treije catre koi ni, eni Iehova. Matre hnenge* hna aisa epuni me angetre Aigupito jëne la melöhlem,* me axulune koi angatr la hnagejë matre heti angatr. Nge öhne hnyawa hi epun hnene la sipu luemeke i epun la hnenge hna kuca e Aigupito. Thupene lai, hnei epuni hna mele koi nyimu macatre* ngöne la hnapapa.
8 “‘Hnenge hna tro sai epun ngöne la nöje ne la angetre Amora, ka lapa ngöne la ketre götran* ne la hneopegejë Ioridrano, nge hnei angatr hna isi me epun. Ngo hnenge hna nue angatr koi epun, matre tro epuni a thapa la nöje i angatr, nge hnenge hna apatrenyi angatr lo epuni a lö kowe la nöj. 9 Thupene lai, hnei Balaka nekö i Zipora joxu ne Moaba, hna isi me Isaraela. Matre hnei angeic hna hë Balaama nekö i Beora, troa eji epun. 10 Ngo xele kö ni ma drei Balaama. Matre hnei angeice pena hna anyimua amanathithi epun, nge hnenge hna thepe epun qa ngöne la ime i angeic.
11 “‘Thupene lai, hnei epuni hna tro sasaith la hneopegejë Ioridrano, me traqa e Ieriko. Ame hnene la itre joxu* ne Ieriko, me angetre Amora, me Perizi, me Kanana, me Heth, me Girigasa, me Hivi, me Iebusi, hna isi me epun, ngo hnenge kö hna nue angatr kowe la ime i epun. 12 Matre hnenge hna upe qëmekei epun la kucakuca;* nge hnene ej hna helën la itre nöje cili qëmekei epun, tune lo ka traqa kowe lo lue joxu ne Amora. Ngo tha huliwa ne la itre taua i epuni kö, me itre tane pehna i epun. 13 Celë hi aqane kucang matre tro epuni a kapa gufane la nöj, ngacama tha hnei epuni kö hna huliwa meci kow, me kapa la itre traon, ngacama tha hnei epuni kö hna xup. Nge epuni fe a iji wene rezë me xeni wene oliv, ngo tha hnei epuni pe hna traan.’
14 “Haawe, xoue Iehova jë enehila, nyihlue i nyidrëti jë cememine la nyipici,* nge mele nyipici jë koi nyidrë. Apatrene pi la itre haze hna nyihluen hnene lo itre qaaqaa i epun ngöne la ketre götran ne la Hneopegejë me e Aigupito, nge nyihlue i Iehova jë. 15 Ngo maine xele kö epun ma nyihlue i Iehova, nga iëne jë hë la hnei epuni hna troa nyihluen ngöne la drai celë, ene lo itre haze hna nyihluen hnene lo itre qaaqaa i epun ngöne la ketre götran ne la Hneopegejë, maine itre haze i angetre Amora ngöne la nöj hnei epuni hna lapan. Ngo ame kö ni memine la faming, ke tro huni a nyihlue i Iehova.”
16 Ame hna sa hnene la nöj ka hape: “Thatreine kö hun troa nuetriji Iehova me nyihluene la itre xaa haze. 17 Iehova Akötresi hun la ka thepe huni qa Aigupito, lo nöj ka thahluë* hun me itre keme hun. Hnei nyidrëti hna kuca la itre iamamanyikeu* ka tru qëmeke hun, me thupë hun e cahu gojeny, me nyipine la itre nöj hne huni hna trongën. 18 Hnei Iehova hna helën ekö la itre atren la nöje celë, memine la angetre Amora. Celë hi kepin matre, tro fe huni a nyihlue i Iehova, ke nyidrëti hi la Akötresi hun.”
19 Matre öni Iosua jë hi kowe la nöj: “Tha ijiji epun kö troa nyihlue i Iehova, ke Akötresie ka hmitrötre nyidrë; aja i nyidrëti tro hmekuje hi* a nyihlue i nyidrë. Tha nyidrëti kö a nue la itre tria* i epun, me itre ngazo i epun. 20 Maine tro epuni a nuetriji Iehova matre nyihluene pena la itre haze trenyiwa, tro fe nyidrëti lai a thaujë me apatrenyi epun, ngacama hnei nyidrëti ju hë ekö hna kuca la loi koi epun.”
21 Sa jë hi la nöj koi Iosua ka hape: “Ngo Iehova hi la nyine tro huni a nyihluen!” 22 Matre öni Iosua kowe la nöj ka hape: “Eni hë la a acili epun troa temoë, matre anyipicin laka, epuni kö la ka sipu iën troa nyihlue i Iehova.” Ame hnei angatr hna sa ka hape: “Eahuni la itre temoë.”
23 “Nga apatrene pi hö la itre haze trenyiwa nyipi epun, nge qale catre jë koi Iehova Akötresi Isaraela, hnene la hni i epuni ka pexej.” 24 Matre önine la nöj koi Iosua: “Tro huni a nyihlue i Iehova Akötresi hun, nge tro huni a drengethenge nyidrë!”
25 Ngöne la drai cili, hnei Iosua hna isisinyikeu memine la nöj e Sekema, nge hnei angeic hna acil la wathebo cili memine la hna axeciën. 26 Thupene lai, hnei Iosua hna cinyianyine la itre trengewekë cili ngöne la itusi Wathebo i Akötresie. Hnei angeic hna xom la ketre etë atraqatr, me acil fene la sinöe ka tru ezine la hnë hmi i Iehova.
27 Öni Iosua hmaca jë hi kowe la nöj: “Goeën! Tro la etë celë a tune la ketre temoë ka troa qejeqeje epun, ke hnene ej hna dreng asë la hnei Iehova hna qaja koi epun. Tro ej a hmekë epun, matre tha tro kö epuni a nuetrij la Akötresi epun.” 28 Thupene lai, hnei Iosua hna nue la nöj troa bëeke hmaca kowe la isa zi i angatr.
29 Thupene la itre ewekë cili, hna meci hnei Iosua nekö i Nuna, lo hlue i Iehova; traqa koi 110 hë lao macatre i angeic. 30 Ame hna kelemi angeic ngöne la zi i angeic e Timena-Sera, ngöne la itre wetr e Eferaima, e kolopi ne la wetre Gasa. 31 Ame hnene la angetre Isaraela hna nyihlue i Iehova ngöne la ijine mele Iosua, memine la itre qatr ka mec thupei angeic. Hnene la itre qatre cili hna öhn asë lo itre huliwa hnei Iehova hna kuca thatraqai Isaraela.
32 Ame la itrapa june i Iosefa, lo hna xom hnene la angetre Isaraela qa Aigupito, ke hna keleme pë hë e Sekema ngöne la hnepadro hnei Iakobo hna itön koi 100 lao pies sileva qaathene la itre nekö i Hamora, lo keme i Sekema; nge hna hamën pë hë la hnepadro cili kowe la itre nekö i Iosefa.
33 Nge meci jë fe hi Eleazara nekö i Arona. Hna kelemi angeic ngöne la sasala i Fineasa nekö i angeic, lo sasala hna hamëne koi Fineasa ngöne la itre wetr e Eferaima.