Zakaria
8 Hnei Iehova joxu ne la itre trongene isi e hnengödrai hna ithanata hmaca koi ni, me hape: 2 “Hane hi la hna qaja hnei Iehova joxu ne la itre trongene isi e hnengödrai: ‘Tro ni a isigöli Ziona hnene la aja ka catr. Tro ha tru la elëhning, nge tro ni a isigöli angeic.’”
3 “Hane hi la hna qaja hnei Iehova: ‘Tro ni a bëek a tro Ziona, me lapa e Ierusalema. Tro ha hë Ierusalema ka hape, traon ne la nyipici;* nge tro ha hëne la wetre i Iehova joxu ne la itre trongene isi e hnengödrai ka hape, wetr ka hmitrötr.’”
4 “Hane hi la hna qaja hnei Iehova joxu ne la itre trongene isi e hnengödrai: ‘Tro la itre qatr me qatre föe a lapa fë sine tö ngöne la itre gaa tru atr e Ierusalema, ke qatre catre hë angatr.* 5 Nge tro ha tiqa hnei itre nekönatr, trahmanyi me jajiny, ka elo ngöne la itre gaa tru atr ne la traon.’”
6 “Hane hi la hna qaja hnei Iehova joxu ne la itre trongene isi e hnengödrai: ‘Maine jë, tro la itre atrene la nöje ce ka lapa pe a mekun laka, tha tro kö lai a eatr, ngo hapeu, tha ijijinge kö troa eatrën?’ öni Iehova joxu ne la itre trongene isi e hnengödrai.”
7 “Hane hi la hna qaja hnei Iehova joxu ne la itre trongene isi e hnengödrai: ‘Tro ni a amelene la nöjeng qaathene la itre nöj e koië me itre nöj e kuë. 8 Tro ni a tro sai angatr a tro Ierusalema, matre tro angatr a lapa e cili. Tro angatr a nöjeng, nge tro ni a Akötresi angatr, ka nyipici* me meköt.’”
9 “Hane hi la hna qaja hnei Iehova joxu ne la itre trongene isi e hnengödrai: ‘Catre pi* epun itre ka drenge lo hna qaja hnene la itre perofeta, lo hna qaja ngöne lo kola ami trepene la uma ne hmi, lo uma i Iehova joxu ne la itre trongene isi e hnengödrai. 10 Ke eje hi, tha hna nyithupene kö ekö lo itre atr me itre öni. Nge xou i angatre ma tro me bëek pine la itre ithupëjia, ke hnenge lo hna ukunekeune la itre atr troa imethinë.’
11 “‘Ngo qaane enehila, tha tro hmaca kö ni a amekötine la itre atrene la nöje ce ka lapa pe, tune lo aqane kucang ekö,’ öni Iehova joxu ne la itre trongene isi e hnengödrai. 12 ‘Eje hi, tro ha jume la itre itine tingeting. Tro ha wa la ivin, tro la ihnadro a hamë xen, nge tro la hnengödrai a axulune la wene lepany. Tro ni a hamëne la itre ewekë cili nyine edrö ne la nöje ce ka lapa pe. 13 Nöje Iudra me Isaraela fe, tune lo kola qeje epun hnene la itre nöj lo angatr a ieji, ketre tun, tro hë angatr a qeje epun troa iamanathithi, pine eni amele epun. Haawe, the xou kö! Nge catre pi!’*
14 “Ke hane hi la hna qaja hnei Iehova joxu ne la itre trongene isi e hnengödrai: ‘“Tune lo eni a mekun troa akötrë epun, ke hnene la itre qaaqa i epun hna jele la trenge hning matre pëkö utipineng,” öni Iehova joxu ne la itre trongene isi e hnengödrai, 15 “ketre tun, ase hë ni mekun enehila troa kuca la loi koi Ierusalema me koi Iudra. Haawe, the xou kö!”’
16 “‘Hane hi la itre ewekë nyine tro epuni a kuca: Iqajakeune jë la nyipici, nge qaja jë ngöne la qëhnelö ne la itre traone i epun, la itre hna amekötin ka acian la nyipici me tingeting. 17 The mekune kö e kuhu hni i epun troa akötrë ketre, nge the hniine kö la itre hna sisinyi thoi, ke methinge la itre ewekë cili,’ öni Iehova.”
18 Hnei Iehova joxu ne la itre trongene isi e hnengödrai hna ithanata hmaca koi ni. Öni nyidrë: 19 “Hane hi la hna qaja hnei Iehova joxu ne la itre trongene isi e hnengödrai: ‘Ame la nöje Iudra a tha xen ngöne la hna 4, me hna 5, me hna 7, me hna 10 ne treu, ke itre ijine madrine lai me feet koi angatr. Haawe, hniine ju la nyipici me tingeting.’
20 “Hane hi la hna qaja hnei Iehova joxu ne la itre trongene isi e hnengödrai: ‘Tro ha traqa la ijine tro la itre nöj me itre atrene la itre traon ka nyimutre a traqa. 21 Tro la itre atrene la ketre traon a tro kowe la ketre, me hape: “Jë fe matre tro sa xëwe koi Iehova troa kepe* së. Jë fe matre tro sa thele Iehova joxu ne la itre trongene isi e hnengödrai. Eahuni hë la a tro.” 22 Tro la itre nöje ka nyimutre me itre nöje ka catr a traqa e Ierusalema troa thele Iehova joxu ne la itre trongene isi e hnengödrai, me sipo Iehova troa kepe* angatr.’
23 “Hane hi la hna qaja hnei Iehova joxu ne la itre trongene isi e hnengödrai: ‘Ngöne la ijine cili, tro la 10 lao trahmany ka xulu qa ngöne la itre qene hlapa ne la itre nöj, a ea la pune iheetre ne la atre Iudra, eje hi, tro angatr a ea catrën ej me hape: “Pi tro huni a ce tro me epun, ke drenge hë hun laka, ce Akötresieti me epun.”’”