Esodro
6 Nge öni Iehova koi Mose ka hape: “Ame enehila, tro hë eö a öhne la hnenge hna troa kuca koi Farao. Tro la imenge ka catr a upi angeic troa nue angatr, nge tro la imenge ka catr a upi angeice troa helë angatr qa ngöne la nöje i angeic.”
2 Thupene lai, öni Akötresie koi Mose ka hape: “Iehova ni. 3 Nge hnenge hna mama koi Aberahama me Isaaka me Iakobo, tune la Akötresie Ka Tru Trenge Men. Ngo ame göne la ëjeng, Iehova, tha hnenge kö hna qaja amamane koi angatr. 4 Nge asë hë ni isisinyikeu me angatr, matre hamë angatre la nöje Kanana, lo nöj hnei angatre hna lapa trenyiwa ngön. 5 Nge enehila, drenge hë ni la hna awe hnene la angetre Isaraela, lo hna axösisin hnei angetre Aigupito, nge eni hmaca a mekune lo hnenge hna sisiny.
6 “Celë hi matre, qaja jë kowe la angetre Isaraela ka hape, ‘Iehova ni, nge tro ni a thepe epun qa ngöne la itre huliwa ka hace, lo hna upi epun troa kuca hnei angetre Aigupito, nge tro ni a thepe epun qa ngöne la ithahluë. Tro ni a itö* epun hnene la imenge ka catr,* me itre iameköti ka catr. 7 Tro ni a kepe epun kösë nöjeng, nge tro ni a Akötresi epun, nge tro hë epuni lai a atre laka, eni Iehova la Akötresi epun, atre thepe epun qa ngöne la itre huliwa ka hace, lo hna upi epuni troa kuca e Aigupito. 8 Nge tro ni a lö sai epun kowe la nöje hnenge hna sisinyi* troa hamë Aberahama, me Isaaka me Iakobo. Tro ni a hamë epun, nge tro lai a nöje i epun. Iehova ni.’”
9 E thupen, Mose a qaja ju la maca cili koi angetre Isaraela, ngo tha drei Mose kö hnei angatr, ke kucakuca catre angatr, nge ngazo catre la aqane thahluë angatr.
10 Nge öni Iehova koi Mose ka hape: 11 “Lö jë koi Farao joxu ne Aigupito, nge qaja jë koi angeic troa nue la angetre Isaraela qa ngöne la nöje i angeic.” 12 Ngo öni Mose koi Iehova: “Xele kö la angetre Isaraela ma drei ni, matre tro pe kö Farao a drei ni tune kaa, ke thatreine hnyawa kö ni ithanata?”* 13 Ngo hnei Iehova hna qaja hmaca koi Mose me Arona, la itre hna amekötin nyine troa qaja koi angetre Isaraela, me koi Farao joxu ne Aigupito, göi troa thapa la angetre Isaraela qa Aigupito.
14 Hane hi la itre tixe ne lapa i angatr: Itre nekö i Reubena pane nekö i Isaraela: Enoka, me Palu, me Hezerona, me Karemi. Itre matra i Reubena lai.
15 Itre nekö i Simeona: Nemuela, me Iamina, me Iarib, me Zera, me Saulo nekö ne la föe ne Kanana. Itre matra i Simeona lai.
16 Hane hi la itre ëjene la itre nekö i Levi, thenge la itre qaaqaa i angatr: Geresoma, me Kohatha, me Merari. Hnei Levi hna mele koi 137 lao macatre.
17 Lue nekö i Geresoma: Libeni, me Simei, qaaqaa ne la itre lapa i nyidro.
18 Itre nekö i Kohatha: Amerama, me Izara, me Heberona, me Uziela. Hnei Kohatha hna mele koi 133 lao macatre.
19 Lue nekö i Merari: Maheli, me Musi.
Itre lapa i angetre Levi lai, thenge la itre xötre qaaqaa i angatr.
20 Hnei Amerama hna faipoipo me Iokebeda, xa ne la keme i angeic. Eahlo a hnaho Arona jë me Mose. Hnei Amerama hna mele koi 137 lao macatre.
21 Itre nekö i Izara: Kora, me Nefega, me Zikeri.
22 Itre nekö i Uziela: Misaela, me Elizafana, me Sitheri.
23 Arona a faipoipo jë me Eliseba, nekö i Aminadaba, xa i Nasona. Eahlo a hnaho Nadaba, me Abiu, me Eleazara, me Ithamara.
24 Itre nekö i Kora: Asiro, me Elekana, me Abiasafa. Itre lapa i Kora lai.
25 Hnei Eleazara nekö i Arona hna faipoipo memine la ketre nekö i Putiela. Eahlo a hnaho Fineasa jë.
Itre tixe ne lapa lai ka xulu qaathene la itre nekö i Levi.
26 Matre hnei Iehova hna qaja koi Arona me Mose ka hape: “Xomi angetre Isaraela jë qa Aigupito, nge tro angatr a tro tune la aqane tro ne la ketre trongene isi.*” 27 Nge nyidroti hi, Arona me Mose, la ka ewekë koi Farao joxu ne Aigupito, matre tro nyidrëti a nue la angetre Isaraela qa Aigupito.
28 Ngöne la drai ne Iehova a ithanata koi Mose e Aigupito, 29 öni Iehova koi angeice ka hape: “Iehova ni. Qaja ju koi Farao joxu ne Aigupito, la nöjei ewekë hnenge hna ahnithe koi eö.” 30 Ame hnei Mose hna sa koi Iehova ka hape: “Thatreine hnyawa kö ni ithanata, tha tro kö Farao lai a drei ni.”