Ieremia
1 Itre hna qaja hnei Ieremia* nekö i Hilekia, ketre atre huuj ka mel e Anathoth ngöne la zi i Beniamina. 2 Hnei Iehova hna ithanata koi angeic ngöne la hna 13 ne macatre ne mus i Iosea, nekö i Amona, joxu ne Iudra. 3 Hnei nyidrëti hna ithanata hmaca koi angeic ngöne la ijine i Iehoiakima, nekö i Iosea joxu ne Iudra, uti hë la pun ne la hna 11 ne macatre ne mus i Zedekia nekö i Iosea joxu ne Iudra, nge uti hë la kola kötre fë la angetre Ierusalema ngöne la hna 5 ne treu.
4 Hnei Iehova hna ithanata koi ni, me hape:
5 “Qëmekene troa xupi ö e kuhu hni, atrepengöi ö hë ni,*
Qëmekene troa hnaho eö, hnenge fe hë hna ahmitrötrë* eö.
Hnenge hna acili ö troa perofeta kowe la itre nöj.”
6 Ngo öninge jë hi: “Ekölöhini Iehova Joxu Ka Sisitria!
Thatreine kö ni ithanata, ke nekönatre* ni.”
7 Matre öni Iehova jë hi:
“The qaja kö ka hape, nekönatr eö.
Ke hnëqa i ö troa tro kowe la nöjei atr hnenge hna troa upi ö kow,
Nge tro hë eö a qaja la nöjei ewekë hnenge hna amekötin koi ö.
8 The xoue angatre kö,
Ke hane hi la hna qaja hnei Iehova: ‘Ce eni me eö matre amele eö.’”
9 Ame hnei Iehova hna line la iwanakoime i nyidrë me ketr la qëng. Nge öni Iehova jë hi: “Ase hë ni amë la itre trengewekëng ngöne la që i ö. 10 Dreng! Enehila, eni a acili ö troa perofeta kowe la itre nöj me itre baselaia, matre fejetrij me thupatrij, me apatren me thëtrij, me xup me traan.”
11 Hnei Iehova hmaca hna ithanata me hnying koi ni ka hape: “Ieremia, nemene la hnei ö hna öhn?” Öninge jë hi: “Ketre picine iamad.*”
12 Öni Iehova jë hi: “Eje hnyawa hi lai, ke ka hmeke pala hi ni troa eatrëne la trengewekëng.”
13 Ame hnei Iehova hmaca hna ithanata koi ni me hape: “Nemene la hnei ö hna öhn?” Öninge jë hi: “Ketre öl* ka boel,* nge ka ez la ulan ej qa kolopi a tro kolojë.” 14 Matre öni Iehova jë hi:
“Tro ha fetra qa kolopi la akötr
Kowe la nöjei atrene la nöj.
15 Ke hane hi la hna qaja hnei Iehova: ‘Eni a hëne la nöjei fami qa ngöne la itre baselaia ne kolopi,
Nge tro angatr a traqa; tro la itre joxu i angatr a isa acile la therone i angatr
Ngöne la itre qëhnelö ne Ierusalema,
Matre thë la itre ihage xötreith
Me isi memine la nöjei traon ne Iudra.
16 Eje hi, tro ni a qaja koi angatr la itre hnenge hna amekötin pine la aqane iakötrë i angatr,
Ke hnei angatre hna nuetriji ni,
Ke angatr a huhajine la itre huuje i angatr kowe la itre xaa haze
Nge angatr a thil me atrune la itre ewekë hnei angatr hna xup.’
17 Ngo ame pe kö eö, sil amacane jë la gö i ö,*
Qa i ö troa cil me qaja koi angatr la nöjei ewekë hnenge hna troa amekötin koi ö.
The xoue angatre kö,
Wanga tro ni a lepi ö hnei xou qëmekei angatr.
18 Ke enehila, eni a kuca matre tro eö a ketre traon hna eköhagen,
Me ikapa fao, me itre hage kopa, göne tro eö a cile catr qëmekene la nöj asë,
Qëmekene la itre joxu ne Iudra me itre nekö i joxu,
Me itretre huuj memine la nöjei atren la nöj.
19 Tro angatr a isi me eö,
Ngo tha tro kö angatr a hun,
Ke hane hi la hna qaja hnei Iehova: ‘Ce eni me eö matre amele eö.’”