Itre Edromë
25 Hane mina fe la itre edromë i Solomona, hna fejan* hnene la itre sekreter i Hezekia joxu ne Iudra:
2 Ame la elolo i Akötresie, ke troa juetrën la ketre ewekë,
Nge ame la elolone la itre joxu, ke troa waipengöne la ketre ewekë.
3 Tune la edraiëne la hnengödrai, memine la ejuine la ihnadro,
Thatreine kö troa waipengöne la hni ne la itre joxu.
4 Xometrije pi la sikori qa ngöne la sileva,
Nge tro hë ej a nyipi lolo.
5 Xometrije pi la atr ka ngazo qëmekene la joxu,
Nge tro ha acile hutin la therone i nyidrë ngöne la meköt.
6 The pi mama kö qëmekene la joxu,
Nge the ce lapa kö memine la itre atr ka hlemu.
7 Ke ka loi ju kö tro nyidrëti a qaja koi ö ka hape, “Elë jë troa lapa e ce,”
Hune la tro nyidrëti a ahmahmanyi ö qëmekene la ketre he ne nöj.
8 The canga sesë kö troa iutisai,
Ke tune ka ju hë elany, e tro la atre lapa easenyi ö a ahmahmanyi ö?
9 Isigöli ö jë qëmekene la atre lapa easenyi ö,
Ngo the kötre fë ithanata kö,*
10 Wanga ahmahmanyi ö jë hnene la ka drei ö
Nge wanga qaja trongën jë eö la itre trengathoi,* hnei ö hna thatreine apatrene hmaca.
11 Tune la itre wene pom gool, hnine la itre itrengene sileva
Celë hi pengöne la trengewekë hna qaja ngöne la nyipi ijin.
12 Ame la atre ihaji cememine la inamacan
Ke ceitu i angeic me ane hnangenyë gool kowe la ka dreng, me nyine amingömingön hna kuca hnei nyipi gool.
13 Tune la lepanyi ne la kiona ngöne la ijine menu
Celë hi pengöne la atre tro fë maca ka nyipici kowe la itre ka upi angeic,
Ke angeic a aegöcatrene la maseta i angeic.
14 Tune la itre iaw me eny ka tha traqa fë mani kö
Celë hi pengöne la atre qaja lapaane la ketre ahnahna, ngo tha hamëne pe.*
15 Maine tro sa atreine itreqe, tro së lai a ahmalane la hni ne la trene mus,
Nge atreine hi la thinem ka menyik troa hutra la ketre jun.
16 Maine tro eö a öhnyi miel, ije ju hi la ka ijij,
Ke maine tro eö a ij atrun, tro hë eö lai a hmitrane hmaca.
17 The tro lapaa kö kowe la hnalapa ne la atre lapa easenyi ö,
Wanga hmanono jë angeice koi ö, me methinë eö.
18 Tune la weë,* me taua, me ane pehna hna xöl
Celë hi pengöne la atr ka upezön thoine la atre lapa easenyi angeic.
19 Ame la troa mejiun kowe la atr, nyine tha tro kö a mejiun* kow ngöne la ijine jol
Ke ceitune hi memine la kola hutre la xen hnei inyö ka xeci, maine tro memine la waca ka pej.
20 Tune la ketre atr ka uni iheetr ngöne la ijine hnötr
Me tune la vinega hna neng hune la sotr*
Celë hi pengöne la atr ka nyima kowe la hni ka treij.
21 Maine kola mecijiine la ithupëjia* me eö, thue a i angeice jë falawa;
Maine angeic a pi ij, thue ime i angeice jë tim,
22 Ke tro hë eö lai a xawane la itre wanalep ka mel hune la he i angeic,*
Nge tro hë Iehova a amanathithi ö.
23 Enyi ne kolopi a axulun la itre mani ka catr,
Nge ame la thinem ka iqej trootro, ke ka ijele trengehni.
24 Ka loi ju kö la troa lapa ngöne la ketre kona ne la hune uma
Hune la troa ce mel e hnine la uma memine la föe ka iwesitrë lapaa.*
25 Tune la tim ka menyik kowe la atr ka kucakuca
Celë hi pengöne la maca ka loi ka traqa qa ngöne la nöj gaa nany.
26 Tune la qeqe ne tim hna adron, me hnë tha tim hna apoizinën
Celë hi pengöne la atr ka meköt, ka kei thenge* la atr ka ngazo.
27 Tha ka loi kö troa iji atruny la miel,
Maine thel troa sipu atrunyi së kö.
28 Tune la ketre traon hna lep, nge hna akeine la ihag,
Celë hi pengöne la atr ka thatreine xomihnine la elëhni i angeic.