Salamo
Thatraqane la atre jumi traem. Salamo i Dravita.
40 Hnenge hna catre treqe* Iehova,
Nge hnei nyidrëti hna thili troa drei ni, me hnangenyëne la eni a sipo ixatua.
2 Hnei nyidrëti hna aelë ni qa ngöne la hnaop ka ulil,
Me qa ngöne la trëtr.
Nge hnei nyidrëti hna acilë ni hune la ketre git;
Hnei nyidrëti hna acatrene la hnenge hna feke ca.
3 Hnei nyidrëti hna amë ngöne la qëng la nyima ka hnyipixe,
Nyima nyine atrune la Akötresi së.
Ala nyimu la itre atr ka troa goeëne me hain
Nge tro hë angatr a mejiune koi Iehova.
4 Madrine la atr ka mejiune koi Iehova
Nge tha ka ujë kö kowe la itre ka icilekeu me itre ka thoi.
5 Iehova Akötresinge fe,
Nyimutre catre la itre ewekë hnei nyipëti hna xup,
Itre huliwa nyine hain me itre mekuna i nyipëti koi hun.
Pëkö ka tui nyipë;
Maine tro ni a tupath troa qaja me amaman itre ej,
Ke thatreine kö troa qaja asë, ke nyimutre catre pala ha!
6 Tha ajane kö nyipëti la itre huuj me itre ahnahna,
Ngo hnei nyipëti hna fe la lue hnangenyëng matre tro ni a dreng.
Tha hnei nyipëti kö hna sipon la itre huuje ne dreuth asë me itre huuj thatraqane la ngazo.
7 Matre öning ka hape: “Goeën, eni hë la.
Ase hë qeje ni ngöne la tusi hna ewath.
8 Ame la troa kuca la aja i nyipë, Akötresinge fe, ke madrinenge hi lai,
Nge wathebo i nyipëti e kuhu hning.
9 Eni a cainöjëne la maca ka loi ne la meköt ngöne la icasikeu ka tru.
Iehova fe, atre hnyawa hi nyipëti laka,
Tha eni kö a xomehnöthe la qëng.
10 Tha eni kö a juetrëne la meköt i nyipëti e kuhu hning.
Eni pe a cainöjëne la nyipici me iamele* qaathei nyipë.
Ngöne la icasikeu ka tru, tha eni kö a juetrëne la ihnimi nyipici i nyipë me nyipici i nyipë.”
11 Iehova fe, the cipane kö koi ni la utipine i nyipë.
Loi e tro pala hi a thupë ni hnene la ihnimi nyipici i nyipë me nyipici i nyipë.
12 Tru catre la itre akötr ka kanothi ni matre thatreine hë ni e la etrun.
Tru catre la itre triang matre itre ej a tranyi ni, nge thatre hë ni tro ni a ië;
Ala nyimu catre kö itre ej hune la itre pene heng,
Matre pë hë trengecatreng.
13 Iehova fe, eni a sipo nyipë, amele ni jë.
Iehova fe, canga traqa pi troa xatua ni.
14 Epi troa hmahma me thaipiën
La nöjei atr ka thele troa thapa la meleng.
Epi troa zae hnei hmahma
Hnene la itre atr ka madrin troa akötrë ni.
15 Epi tro la itre ka hnyimasai ni me hape: “Loi kö, hnei ö kö lai hna thel!”
A meci hnei xou pine la hmahma i angatr.
16 Ngo loi e tro la itre ka thele nyipë
A madrin me sue madrin göi nyipë.
Loi e tro pala hi la itre ka ajane la itre huliwa ne iamele i nyipë a qaja ka hape:
“Atrunyi Iehova jë.”
17 Ngo pëkö ka isigöli ni nge pëkö ca ewekëng;
Loi e tro Iehova a meku ni.
Nyipëti la atre xatua ni me amele ni;
Akötresinge fe, the hmitre kö.