Amosa
8 Hane hi la hna amamai ni hnei Iehova Joxu Ka Sisitria: Hnenge hna öhne la ketre itrengen ka tiqa hnei wene sinöe.* 2 Öni nyidrëti jë hi: “Amosa, nemene la hnei ö hna öhn?” Öning: “Ketre trengen ka tiqa hnei wene sinöe.”* Matre öni Iehova: “Traqa ha la pun koi Isaraela nöjeng. Tha tro hmaca kö ni a nue la itre ngazo i angatr. 3 “Ngöne la drai cili, tro ha nyihnane la itre nyima ngöne la uma ne hmi hnei treij, öni Iehova Joxu Ka Sisitria. Tro ha tiqa hnei atr ka mec hna troa kuiëne pe hi e cahu. Humu ju!”
4 Drenge ju la, epun itre ka wajahuje la itre ka pë ewekë
Itre ka apatrene la itre atr ka ipië ne la nöj,
5 Me ka qaja ka hape: ‘Troa afenesine eu la feet ne la treu ka hnyipixe, matre tro huni a salemën la itre itine feja?
Nge troa afenesine eu la Sabath, matre tro huni a salemëne la itre wene feja?
Tro hë huni a xome la ketre efa* ka co
Me ketre sekel* ka hace,
Me atriane la itre tulu hun matre atrekënö;
6 Nge tro huni a hamë sileva nyine itöne la atr ka pë mo
Me hamë lue butre nyine itöne la atr ka pë ewekë,
Me salemëne la itre wene feja ka ngazo.’
7 Hnei Iehova, la Elolo i Iakobo, hna sisinyi ngöne la mele i nyidrë ka hape:
‘Tha tro pi kö ni a thëthëhmine la nöjei ewekë hnei angatr hna kuca.
8 Pine la ewekë celë, tro ha hmengöhmengöne la nöj,*
Nge tro ha hnëmec la itre atren.
Hapeu, tha tro kö a elë la nöj tune la kola elë la tim ne la hneopegejë Nil?
Tro ej a elë me uti hmaca tune la hneopegejë Nil e Aigupito.’
9 ‘Ngöne la drai cili,’ öni Iehova Joxu Ka Sisitria,
‘Tro ni a kuca matre troa lö la jö e midi,
Nge tro ni a ajidrine la nöj ngacama lai pala kö.
10 Tro ni a nyihnane la itre feete i epun hnei hnëmec
Me itre nyima i epuni asë hnei nyima ne kele wezipo.
Tro ni a sil la itre bëek ka tru thenyin hune la nöjei gö asë, me cin apan la nöjei he asë;
Ame la hnenge hna troa kuca koi epun, ke ceitune hi me ketre atr ka treije pine la nekö i angeic ka cas,
Nge tha aqane tro kö a akötr ngöne la pune la drai cili.’
11 ‘Drenge ju la!’ öni Iehova Joxu Ka Sisitria,
‘Tro ha traqa la ijine tro ni a upe la ketre jiin kowe la nöj,
Tha tro kö la itre atr a pi xeni falawa me pi iji tim,
Tro pe angatr a pi xen me pi ije la itre trengewekë i Iehova.
12 Tro angatr a kei trootro qane ju hi la ketre hnagejë uti hë la ketre
Nge qa kolopi uti hë koië.
Tro angatr a thel agöne la trengewekë i Iehova, ngo tha tro kö angatr a öhn.
13 Ngöne la drai cili, tro ha enuenu la he ne la itre nyipi jajiny* ka mingöming,
Me itre nekö trahmany hnei pi ij;
14 Itre ka sisinyi fë la ngazo i Samaria, me hape:
“Dana fe, maine mele kö la haze i ö!”
Nge “Maine nyipici laka, hetre gojenyi ka tro Bere-Seba!”
Ke tro hë angatr a kei, nge tha tro hmaca kö angatr a mejë.’”