Salamo
Salamo i Asafa.
79 Akötresieti fe, hnene la itre nöj hna lö hnine la nöje i nyipë;
Hnei angatr hna apuingazone la uma ne hmi ka hmitrötre i nyipë;
Hnei angatr hna lep apatrenyi Ierusalema matre itre tra etë pë hë.
2 Hnei angatr hna hamëne la itre ngönetrei ne la itre hlue i nyipë ka mec matre troa öni hnei itre waco ne hnengödrai
Memine la ijön ne la itre ka mele nyipici kowe la itre öni wael e celë fen.
3 Hnene la itre nöj hna neng la madra i angatr xötreithi Ierusalema tune la tim,
Nge pëkö atr ka troa kelemi angatr.
4 Kola methinë huni hnene la itre ka lapa easenyi hun;
Kola hnyimasai hun hnene la itre ka lapa xötreithi hun.
5 Iehova fe, uti hë eu la tro nyipëti a elëhni? Uti hë epin?
Uti hë eu la troa mel la elëhni i nyipë tune la eë?
6 Nenge pi la elëhni i nyipë kowe la itre nöje ka thatre nyipëti kö
Me kowe la itre baselaia ka tha hëne kö la ëje i nyipë.
7 Ke hnei angatr hna hej angazo* Iakobo
Me angazone la nöje i angeic.
8 The upezö huni kö pine la itre ngazo ne la itre qaaqaa hun.
Canga amamane pi koi huni la utipine i nyipë,
Ke hna thaipië hun.
9 Akötresie atre amele huni fe, xatua huni jë,
Pine la ëje i nyipë ka sisitria;
Amele huni pi nge senge* pi la itre ngazo hun, pine la ëje i nyipë.
10 Hnauëne laka, tro la itre nöj a qaja ka hape: “Ekaa la Akötresi angatr?”
Qëmeke hun, loi e troa atre nyipine la itre nöj laka
Ase hë nyithupene la madra ne la itre hlue i nyipë.
11 Epi tro nyipëti a dreng la kola awe hnene la atr hna akalabusin.
Huliwane jë la mene ka catre* i nyipë matre thupëne* la itre ka troa mec.*
12 Iehova fe, epi tro nyipëti a a 7 lao nyithupene kowe la itre ka lapa easenyi hun
Pine angatr qaqa nyipë.
13 Haawe tro hun, lo nöje i nyipë memine la hnënge mamoe ne la zi i nyipë,
A olene koi nyipë epine palua;
Nge tro huni a qaja trongëne la nyine atrunyi nyipë kowe la nöjei xötr.