Itre Edromë
23 E tro eö a lapa troa ce xen memine la joxu,
Wange pala kö la itre hna amë qëmekei ö;
2 Atë ju la hele ngöne la nyinawa* i ö
E tru pala ha la trenge pi xeni ö.*
3 The piine kö la itre a i nyidrë ka lolo,
Ke ka iaö la itre xeni cili.
4 The huliwa meci kö matre troa trenamo.
Pane cile ju nge inamacane pi.*
5 Ame la eö a goeën itre ej, ke patre hë,
Ke itre ej a axö iap tune la aeto, me sesë e caha hnengödrai.
6 The xeni kö la a ne la ka xeni cipa;*
The piine kö la itre a i angeic ka lolo,
7 Ke ceitu i angeic memine la atr ka fejan la itre gufa.
Öni angeic, “Xeni jë, nge iji jë,” ngo tha qa kö e kuhu hni i angeic.
8 Tro eö a hmitrane trij la hnei ö hna xen
Nge luzi pë hë la hnei ö hna qaja aloinyi angeic.
9 The ithanata kö kowe la hnangenyë ne la hmo,
Ke tro angeic a methinëne la itre trengewekë i ö ka inamacan.
10 The kötrëne kö la ifego hna amë ekö
The ahuë kö kowe la hlapa ne la nekön hna mecitrij hnei kem.
11 Ke ka catr la Atre Isigöli* angatr;
Nyidrëti la ka troa isigöli angatr qëmekei ö.
12 Fe pi la hni i ö kowe la ihaji
Me lue hnangenyë i ö kowe la itre trengewekë ne la atrehmekun.
13 The cile kö troa amekötine la nekö trahmany.*
Maine tro eö a lepi angeic hnei jia, tha tro jë kö angeice lai a mec.
14 Lepi angeice jë hnei jia,
Matre thupë angeic qa ngöne la Hua.*
15 Neköng, maine troa inamacane la hni i ö,
Ke tro ha madrine la hning.
17 Tha tro kö la hni i ö a piine la itre atr ka ngazo,
Ngo xoue Iehova jë ngöne la drai ka pexej,
18 Ke tro hë eö a hetrenyi la mel ka lolo elany
Nge tha tro kö a apatrene* la mejiune i ö.
19 Drenge ju neköng, nge inamacane pi,
Ujëne jë la hni i ö kowe la gojenyi ka meköt.
20 The ce lapa kö memine la itre ka iji waina atruny,
Memine la itre ka öni atrune la mitr,
21 Ke troa pë ewekë la atre hmo hnei kahaitr, me ka tru hna xen,
Nge tro ha heetrëne la itre iheetr ka hnyiqetr hnene la atr ka lapaa pi meköl.
22 Drenge ju la keme i ö, lo atre hamë mele i ö,
Nge the methinëne kö la thine i ö hnene hi laka, qatre föe hë eahlo.
23 Itöne jë* la nyipici nge the salemëne tro pi kö,
Kuca tune ju fe memine la inamacan, me ihaji, me trotrohnin.
24 Nyipici, troa madrine la keme ne la atr ka meköt;
Tro la atre hamë mel kowe la nekön ka inamacan a madrine koi nyën.
25 Tro la kem me thine i ö a madrin,
Nge tro la föe ka hnaho eö a madrine catr.
26 Neköng, hamë ni pi la hni i ö,
Nge loi e tro la luemeke i ö a madrin kowe la itre aqane ujëng.
27 Ke hnaope ka jui la föe ne gojeny,
Nge ketre hnë tha tim ka ilitr la föe ka kuci ngazo.*
28 Angeic a zae tune la atrekënö;
Angeic a aelëne la etrune la itre trahmany ka nyixetë.
29 Koi drei la akötr? Koi drei la hnehengazo?
Koi drei la iwesitrë? Koi drei la troa eetr?
Koi drei la itre eatre menu? Koi drei la lue mek ka cipa?*
30 Kowe la itre ka iji waina lapaa;
Kowe la itre ka thele* la waina hna ithuenyikön.
31 The tro kö a huli ö hnene la emadrane la waina
Ka wafel ngöne la verë waina, nge ka neni ngöne la nyinawa,
32 Ke ej a ihej tune la un,
Nge ka poizin tune la vaipa.
33 Tro la luemeke i ö a öhne la itre ewekë ka ketre pengön,
Nge tro la hni i ö a qaja la itre ewekë ka hmitrötr.*
34 Nge tro hë eö a tune la atr ka meköl nyipine la hnagejë,
Tune la atr ka meköl hune la ima* ne he.
35 Tro hë eö a qaja ka hape: “Hna lepi ni ngo tha drenge kö ni.*
Hna jei ni, ngo thatre pe ni.
Eu la tro ni a hlë?
Eni hmaca kö a pi ij.”*