Isaia
55 Trohemi, epuni fe, itretre pi ij, trohemi ma xome la tim!
Epuni fe itre ka pë mani, trohemi, xome jë,* nge xeni jë!
Trohemi, nge xome* jë la waina me melek, ngo the nyithupene kö, ke ka pë thupen.
2 Hnauëne laka, epuni pala hi a aluzi mani troa itöne la ka tha nyipiewekë, ngo tha itö falawa pe?
Nge hnauëne laka, epuni a hamëne la thupe* i epun kowe la itre ewekë tha hna mejine kö?
Drei ni hnyawa ju, nge xeni jë la ka loi,
Nge tro hë epuni a mej hnei nyipi xen.*
3 Hnangenyëne ju, nge trohemi koi ni.
Drenge ju, matre mele pi epun,
Nge tro ha tru la ajang troa kuca me epun la isisinyikeu ka epine palua
Thenge lo hnenge hna thingehnaean koi Dravita hnene la ihnimi nyipicing, ene lo hna thingehnaean hna mejiune* kow.
4 Goeën! Ase hë ni acili angeic nyine anyipicin thatraqane la itre nöj,
Atre elemeken, me atre musi kowe la itre nöj.
5 Goeën! Tro* eö a hëne la nöj hnei ö hna thatre,
Nge tro la itre atrene la ketre nöj ka thatre eö a nyinyiape koi ö
Pi Iehova Akötresi ö, lo Atre Ka Hmitrötr e Isaraela,
Ke tro kö nyidrëti a atrunyi ö.
6 Thele Iehova jë, e ijine tro pala kö a öhnyi nyidrë.
Hë nyidrëti jë, e ijine nyidrëti pala kö la.
7 Epi tro la atr ka ngazo a nuetrije la itre thiina i angeic
Nge tro la atr ka menu a nuetrije la itre mekuna i angeic;
Epi tro angeic a bëeke koi Iehova, matre tro nyidrëti a utipi angeic,
Lo Akötresi së, ke nyidrëti a nue hnyawane* la itre ngazo.
8 “Ke ame la itre mekunang, ke tha itre mekuna i epuni kö,
Nge ame la aqane ujë* i epun, ke tha aqane ujënge* kö,” öni Iehova.
9 “Ke draië kö la hnengödrai hune la fen,
Ketre tune fe, ka draië kö la aqane ujëng,* hune la aqane ujë* i epun
Me itre mekunang hune la itre mekuna i epun.
10 Kola trotro la mani memine la kiona qa hnengödrai
Nge tha tro kö lue ej a bëek, e tha hna pane maniëne kö la fen, me aciane la itre feja, me wa wen,
Me hamëne la itre feja kowe la atre traan, me hamëne la falawa kowe la atre xen,
11 Tro ha tune lai la trengewekëng ka tro pi qa ngöne la qëng.
Tha tro kö ej a bëeke koi ni, nge pëkö thangan,
Ngo tro ej a kuca asë la ajang,
Nge tro ej a eatrën asë la hnenge hna up eje kow.
12 Ke tro epuni a lö pi memine la madrin,
Nge tro epuni a bëek cememine la tingeting.
Tro la itre wetr memine la itre sasala a sue madrin qëmekei epun,
Nge tro ha xexe la itre sinöe ngöne la itre hlapa.
13 Tro ha cia la göti hnane la sinöe ka ithiny,
Memine la hnitr ka ithiny hnane la hnitr ka iciny.
Nge jëne la itre ewekë cili, tro ha hlemu la ëje i Iehova,
Nyine hatrene ka epine palua, nge ka cile hut.”