Itre Edromë
10 Itre edromë i Solomona.
Ame la nekönatr ka inamacan, ke ka amadrinëne la keme i angeic,
Ngo ame la nekönatr ka hmo, angeic a akötrëne la thine i angeic.
2 Ka gufa la itre mo hna kapa qa ngöne la hna huliwa qenatrekënö,
Ngo ame la meköt, celë hi ka thepe së qa ngöne la mec.
3 Tha tro kö Iehova a nue la atr ka meköt troa mecijiin,
Ngo tro pe nyidrëti a cipan la hna ajan hnene la itre atr ka iakötrë.
4 Tro ha pë ewekë la lue ime ka geny,
Ngo tro ha trenamo la lue ime ka catre huliwa.
5 Ame la nekön ka atreine thelewekë, angeic a xawane la hna menuën ngöne la ijine hedredrei,
Ngo nyine hmahmane la nekön ka meköl ngöne la ijine menu.
6 Kola të la itre manathith hune la he ne la atr ka meköt,
Ngo kola juetrën la iakötrë hnene la që ne la atr ka ngazo.
7 Tha tro jë kö a thëthëhmine la atr ka meköt, nge tro ha qaja aloinyi angeic,
Ngo tro ha thëthëhmine la ëjene la atr ka ngazo.
8 Tro la hni ka inamacan a trongëne la itre hna amekötin,
Ngo troa tro waja la atr ka ithanata menu.
9 Tro ha tro ngöne la gaa tingeting hnene la atr ka mele nyipici,
Ngo tro ha mama koi nöjei atr la aqane ujë ne la atre huliwa qenatrekënö.
10 Ame la atre isamekë matre kuca la ngazo, ke ka iakötrë,
Nge ame la atre qaja la itre ithanata ka hmo, ke tro ha waja trongën.
11 Ketre qeqe ne mel la ineqë ne la atr ka meköt,
Ngo tha qaja kö itre atr ka ngazo, la aja i angatr troa iakötrë.
12 Ame la imethinë, ke qaane la itre iwesitrë,
Ngo ame kö la ihnim, ej a he* la nöjei tria asë.
13 Kola mama la inamacan ngöne la që ne la atr ka atreine waiewekë,
Ngo ame la jia, ke thatraqane la ju ne la atr ka pë atrehmekun.*
14 Itre ka inamacan a thupëne hnyawa la atrehmekun,
Ngo kola hëne la akötr hnene la që ne la atr ka hmo.
15 Ame la itre mo* ne la trenemani, ke celë hi traone i angeic ka catr.
Ame la akötrene la itre ka pë ewekë, ke ene la troa mel ngöne la pë.
16 Jëne mel la huliwa ne la atr ka meköt;
Ngo ngazo la thupen kowe la atr ka iakötrë.
17 Ame la atre drengethenge la ihaji, angeic a fe* gojenyine la itre xan kowe la mel,
Ngo kolo pe a ajeanyi angatr hnene la atre methinëne la iameköti.
18 Ka thoi la atre juetrëne la imethinë i angeic,
Nge ka hmo la atre kötre fë la itre trengathoi hna sil.*
19 E tru la hne së hna ithanata, tro hë së lai a tria,
Ngo ka inamacan la atre thupëne la aqane ithanata* i angeic.
20 Ceitu me nyipi sileva la thineme ne la atr ka meköt,
Ngo wanamamike la hni ne la atr ka ngazo.
21 Kola thuane* la nöjei atr hnene la ukeineqë ne la atr ka meköt,
Ngo kola mec la itre atr ka hmo, hnene la hna pë atrehmekun.
23 Ame kowe la hmo, kösë kola elo la troa kuca la nyine hmahman,
Ngo ame la inamacan, ke thatraqane la atr ka atreine waiewekë.
24 Tro ha traqa kowe la atr ka ngazo la ewekë hnei angeic hna xouen;
Ngo troa hamën kowe la atr ka meköt la hnei angeic hna ajan.
25 E traqa jë la wene, ke tro ha patr la atr ka ngazo,
Ngo ame la atr ka meköt, celë hi trepene ka epine palua.
26 Tune la vinega kowe la itre inyö, memine la haji ne eë kowe la luemek,
Celë hi aqane goeëne la atr ka geny hnene la maseta* i angeic.
27 Ame la xoue Iehova, ke kola aqeane la mel,
Ngo ame kö la itre macatre ne la itre atr ka ngazo, ke tro ha ahopatren.
28 Ka hamë madrine la aqane itreqe* ne la itre atr ka meköt,
Ngo tro ha patr la mejiun ne la itre atr ka ngazo.
29 Ame la itre aqane huliwa* i Iehova, ke hnë zae ka catr kowe la atre mele nyipici,
Ngo itre ej a nyihatrene la akötr kowe la itre atr ka kuca la ngazo.
30 Tha tro jë kö a akeine la atr ka meköt epine palua,
Ngo tha tro hmaca kö la itre atr ka ngazo a lapane la ihnadro.
31 Kola aciane* la inamacan hnene la ukeineqë ne la atr ka meköt,
Ngo tro ha lep ahumune* la thinem ka iakötrë epine palua.
32 Atre hi la ukeineqë ne la atr ka meköt la ka hamë madrin,
Ngo trenge ka akötr pe hi ngöne la që ne la atr ka ngazo.