Itre Edromë
21 Ceitune hi la hni ne la joxu memine la itre tim ka neni ngöne la ime i Iehova.
Nyidrëti a iujin ej ngöne la nöjei götran hnei nyidrëti hna ajan.
2 Ame kowe la atr, ka meköt asë hi la itre aqane ujë i angeic,
Ngo Iehova kö la ka waipengöne la itre hni.*
3 Ame la aqane ujë ka lolo me meköt
Ke ka amadrinë Iehova catre kö hune la huuj.
4 Ame la luemek ka pi tru me hni ka pi draië
Ke ketre laam ka thina gojenyine la itre ka iakötrë kowe la ngazo.
5 Nyipici laka, troa eatre* la itre mekuna ne la atr ka akötrehnine la huliwa,
Ngo troa pë ewekë la atr ka canga sesë, nge tha hna pane mekune kö la aqane troa kuca.
6 Ame la troa trenamo jëne la thinem ka thoi
Ke ceitu me xaxapo ka patre trootro, me ketre theth hna mecin.*
7 Tro ha apatrene la itre atr ka ngazo hnene la aqane iakötrë i angatr,
Ke xele kö angatr ma ujë thenge la meköt.
8 Ka qaliqali la gojeny hna trongën hnene la atr hna jelengazon,
Ngo ka meköt la aqane ujë ne la atr ka pë engazon.
9 Ka loi ju kö la troa lapa ngöne la ketre kona ne la hune uma
Hune la troa ce mel e hnine la uma memine la föe ka iwesitrë lapaa.*
10 Ame la atr ka iakötrë, angeic a piine la ngazo;
Pëkö ca ihnimi angeic kowe la atre lapa easenyi angeic.
11 Ame la kola amekötine la atr ka ihnyima sai, ke kola ainamacanëne la itre atr ka pëkö hna atre,
Nge ame la atr ka inamacan a atreine thelewekë, angeice fe lai a kapa la atrehmekun.*
12 Kola goeëne la uma ne la atr ka ngazo hnene la Atr Ka Meköt;
Nyidrëti a ukune la itre atr ka ngazo kowe la akötr.
13 Ame la ka drei simine la treije ne la ka co
Ke tha tro kö a sa la angeic a hë.
14 Ame la ahnahna hna hamën juetrën, ke ka aupune la elëhni,
Ame la mani hna hamën juetrën,* ke ka aupun la elëhni atraqatr.
15 Ame la troa ujë cememine la meköt, ke ka amadrinëne la atr ka meköt,
Ngo ketre ewekë lai hna xele ma wang hnene la itre ka kuca la ngazo.
16 Ame la atre trotrije la gojenyine la atreine thelewekë
Ke tro angeic a meköl memine la itre ka pë trengecatr ngöne la mec.
17 Ame la atr ka hniin la itre nyine iamadrinë, ke tro hë angeic a pë ewekë;
Ame la atr ka hniin la waina me oel, ke tha tro kö angeic a trenamo.
18 Ame la atr ka ngazo, ke thupene mel kowe la atr ka meköt,
Nge troa nyihnane la atr ka thoi hnene la atr ka meköt.
19 Ka loi ju kö la troa mel ngöne la hnapapa
Hune la troa ce mel memine la föe ka iwesitrë lapaa* me elëelëhni.
20 Ame ngöne la uma ne la atr ka inamacan, ke hetre trengamo ka tru me oel,
Ngo tro la hmo a aluzin* la hnei angeic hna hetreny.
21 Ame la atre thele la meköt me ihnimi nyipici
Ke tro angeic a öhne la mel, me meköt, me iatruny.
22 Atreine hi la ka inamacan troa thapa la traon ne la itre ka catr
Me apatrene la ecatrene la mejiune i angatr.
23 Ame la atr ka thupëne la që me thineme i angeic
Ke angeic a neëne la itre jol.
24 Hna jele ka iselë,* me pi tru, me pi mama, la atr ka ujë cememine la pi tru
Ke tha mekune kö angeic la pun ne la aqane ujë i angeic.
25 Hna mecin kowe la atr ka geny la hnei angeic hna piin,
Ke xele kö la lue ime i angeic ma huliwa.
26 Ngöne la drai ka pexej, tha mano kö piin hnene la atr ka geny,
Ngo ame la atr ka meköt, angeic a hamën asë la hnei angeic hna hetreny.
27 Ame la huuj ne la atr ka ngazo, ke ketre ewekë lai hna methinën.
The qaja pala ha e tro angeic a tro fë cememine la mekun ka ngazo!*
28 Tro ha mec la temoë ka thoi,
Ngo tro ha mejiun kowe la atre qaja* la hnei angeic hna dreng.
29 Kösë tha xou kö la atr ka ngazo,
Ngo ame la atr ka meköt, angeic a tro ngöne la nyipi gojeny.*
30 Pëkö inamacan, me atreine waiewekë, me eamo ka loi, e ka isazikeu memine la aja i Iehova.
31 Ase hë hnëkëne la hos thatraqane la drai ne isi,
Ngo Iehova kö la ka amelen.