Esodro
4 Ngo öni Mose koi Akötresie: “Nge maine tha jele nyipici ni kö hnei angatr, me drei ni, tro hë angatre lai a qaja ka hape, ‘Tha hnei Iehova kö hna mama koi eö.’” 2 Matre öni Iehova: “Nemene la hnei eö hna ea?” Öni Mose: “Sine tö.” 3 Nge öni Akötresieti hmaca jë hi: “Kuiëne pi e cahu.” Angeic a kuiëne pi, nge nyi une jë hi lai sine tö. Matre Mose a kötr ezi pi. 4 Ngo öni Iehova koi Mose ka hape: “Line pi la ime i eö, nge xolouthe ju la pune lai un.” Matre angeic a li ime ju me ea, ame hna nyi sine tö hmaca pi ngöne la ime i angeic. 5 Nge öni Akötresie: “Matre tro angatr a jelenyipicine laka, hnei Iehova Akötresi ne la itre qaaqaa i angatr, me Akötresi Aberahama, me Akötresi Isaaka, me Akötresi Iakobo hna mama koi eö.”
6 Öni Iehova hmaca jë hi: “Pane line ju la ime i eö ngöne la iheetre i eö, hmekune la imano.” Matre angeic a line ju la ime i angeic hnine la iheetre i angeic, nge ame hë la angeic a hule hmaca, ke ase hë tith hnei lepera, nge kola wië kösë kiona! 7 Nge öni nyidrëti hmaca: “Amë hmaca ju la ime i eö hnine la iheetre i eö, hmekune la imano.” Matre angeic a amë hmaca ju, nge ame hë la angeic a hul, loi hmaca ha la ime i angeic, tune la ngönetrei angeic asë! 8 Nge öni Akötresie: “E tha jelenyipici eö kö hnei angatr, me kapa lo pane hatren, tro hë angatre lai a kapa la hnaaluen. 9 Ngo e tha kapa kö angatre la lue hatrene celë, nge e xele kö angatre ma drei eö, tro eö a jöe tim qa ngöne la Nil, me neng hune la ihnadro. Nge ame hë la tim hnei eö hna jöe qa ngöne la Nil, tro hë ej a nyi madra hune la ihnadro.”
10 Öni Mose jë hi koi Iehova: “Menu hë ni Iehova, ngo qaane ekö tha ka maca kö ni troa ithanata, nge uti pala hi la nyipëti a ithanata enehila kowe la hlue i nyipë. Hmitr* la qëng troa ithanata, nge ka tretr la thinemeng.” 11 Matre öni Iehova: “Drei la atre xupe la që ne la atr? Maine kuca matre humu pena, maine asimin, me fe la luemek, maine thinge pena? Hapeu, tha eni kö Iehova? 12 Matre enehila, tro jë, nge tro ni a ce me eö* la eö a ithanata, nge tro ni a ini eö la nyine tro eö a qaja.” 13 Ngo öni Mose: “Menu hë ni Iehova, ngo upe jë la ketre atr hnei nyipëti hna mekun.” 14 Ame hnei Iehova hna elëhni koi Mose, matre öni nyidrë: “Hetre trejine me eö, Arona qa Levi, eje hi? Atre hi ni laka, ka maca angeic troa ithanata, nge mai angeice hë lai troa ixelë me eö. Nge ame hë la angeic a troa öhnyi eö, tro ha madrine la hni angeic. 15 Tro eö a ithanata me angeic, me thuemacanyi angeice la nyine tro angeic a qaja.* Tro ni a ce me epon la epon a ithanata, nge tro ni a ini epon la nyine troa kuca. 16 Tro angeic a nyihnai eö troa ewekë kowe la nöj, tro angeic a qeneqaja i eö. Nge tro eö a Akötresi* angeic. 17 Tro eö a xome la sine tö celë, matre kuca la itre iamamanyikeu.”
18 Nge hnei Mose hna bëeke hmaca koi Iethero, keme ne la föi angeic, nge öni angeic: “Pane nue ni pi troa wang la itre trejin me eni e Aigupito, troa wange ka hape, mele pala kö angatr.” Matre öni Iethero: “Tro jë memine la tingeting.” 19 Thupene lai, Iehova a qaja jë koi Mose e Midiana ka hape: “Tro jë Aigupito, ke meci asë hë la itre ka thele troa humuthi eö.”
20 Nge hnei Mose hna xome la föi angeic me lue nekö i angeic, me ati angatr hune la boliko, me tro Aigupito. Nge angeic a eatrongëne la sine tö ne la nyipi Akötresie. 21 Nge öni Iehova koi Mose: “E traqa ha eö e Aigupito, kuca asë jë qëmeke i Farao la nöjei iamamanyikeu hnenge hna aijijë eö troa kuca. Nge tro ni a nu matre xeti la hni angeic, nge tha tro kö angeic a nue la nöj. 22 Nge qa i eö troa qaja koi Farao ka hape, ‘Hane hi la hna qaja hnei Iehova, “Isaraela la neköng, pane neköng, 23 nue pi la neköng matre tro angeic a nyihlueng. Ngo maine xele kö eö, tro ni a humuthe la nekö i eö, ene la pane nekö i eö.”’”
24 Nge hnei Iehova hna ixelë me angeic ngöne la gojenyi ne tro kowe la hnalapa i angatr, nge hnei nyidrëti hna thele troa humuthi angeic. 25 Ame hnei Zipora hna xome la etë ka ixöj,* me xötrehatrene la nekö i angeic, me kuca matre tro la ikupein a ketr la lue ca i angeic.* Nge öni Zipora: “Ke nyipëti la föeng ne madra.” 26 Ame hnei Akötresieti hna nue angeic. Ngöne la ijine cili, hnei Zipora hna qaja ka hape, “nyipëti la föeng ne madra,” ke hnene la hna xötrehatren.
27 Nge hnei Iehova hna qaja koi Arona ka hape: “Tro jë kowe la hnapapa troa ixelë me Mose.” Matre angeic a tro ju, me ixelë me Mose ngöne la wetr ne la nyipi Akötresie, me ibozu me dremi angeic. 28 Nge hnei Mose hna qaja koi Arona la nöjei ewekë hna qaja hnei Iehova, lo ka upi angeic, me nöjei iamamanyikeu hnei nyidrëti hna upi angeice troa kuca. 29 Thupene lai, hnei Mose me Arona hna tro troa icasinekeune la nöjei qatr ne Isaraela. 30 Nge hnei Arona hna qaja koi angatre la nöjei ewekë hnei Iehova hna qaja koi Mose, nge hnei angeic hna kuca la itre iamamanyikeu qëmekene la nöj. 31 Ame hnene la nöj hna jelenyipici Mose. Nge ame hë la angatr a atre laka, hnei Iehova hna nyipine la angetre Isaraela, me öhne la akötre i angatr, ame hnei angatr hna sa iwatingöneca me thil.