Itre Edromë
15 Kola apujene la elëhni hnene la aqane sa ka menyik,*
Ngo kola aciane la wesitr la kola ithanata akökötreny.*
2 Kola huliwane hnyawane la atrehmekun hnene la thinem ne la itre ka inamacan,
Ngo kola ithanata menu hnene la që ne la itre hmo.
3 Öhn asë hi la nöjei ewekë hnene la luemeke i Iehova,
Lue ej a goeëne la itre atr ka ngazo me ka loi fe.
5 Pëkö metrötrene la hmo kowe la ihaji* ne la keme i angeic,
Ngo ame la atr ka inamacan, angeic a wangatrune la kola ameköti* angeic.
6 Nyimutre la itre trengamo ngöne la uma ne la atr ka meköt,
Ngo itre huliwa* ne la atr ka ngazo a axulune la itre jol koi angeic.
7 Itre ukeineqë ne la itre atr ka inamacan a tro fë la atrehmekun,
Ngo isapengöne kö memine la hni ne la itre hmo.
8 Methi Iehova la huuj ne la itre atr ka ngazo,
Ngo nyidrëti a madrin kowe la thithi ne la itre atr ka meköt.
9 Methi Iehova la aqane ujë ne la atr ka ngazo,
Ngo nyidrëti a hnime la itre ka xötrethenge la meköt.
10 Ka ngazo* la ihaji kowe la atre trotrije la gojenyi ne la meköt,
Ngo tro ha mec la atre methinëne la iameköti.
11 Tha ka sihngödri kö koi Iehova la Hua* me hnë apatren,*
Nga the qaja pala ha la hni ne la itre atr!
12 Methi ne la ka ihnyimasai la atre haji* angeic.
Tha angeice kö a thele eamo thene la ka inamacan.
13 Kola amadrinëne la iqëmek, hnene la hni ka madrin,
Ngo kola ahacene la mekun, hnene la akötr.
14 Kola thele la atrehmekun hnene la hni ka inamacan,
Ngo kola xen* la itre ewekë ka tha loi kö hnene la që ne la itre hmo.
15 Ka ngazo asë hi la itre drai kowe la atr ka hleuhleu,
Ngo ka xeni madri* pala hi la atre hni ka madrin.
16 Ka loi ju kö troa melëne la ka ijij me xoue Iehova
Hune la troa hnehengazo fë* la itre trengamo.
17 Ka loi ju kö la trepe sil nge hetre ihnim
Hune la kau ka giris nge hetre imethinë.
18 Ame la atr ka elëelëhni, ke ka axulune la iwesitrë,
Ngo ame la atr ka hmitre elëhni, ke angeic a apujene la ihmönyinyi.
19 Ame la gojenyi ne la atr ka geny, ke ka tiqa hnei sinöe ka ithiny,
Ngo ceitune la jë ne la itre atr ka meköt memine la gojeny hna jë.
20 Ame la nekön ka inamacan, ke ka amadrinëne la keme i angeic,
Ngo ame la atr ka hmo, ke ka methinëne la thine i angeic.
21 Ame la troa hmo, ke ka amadrinëne la atr ka pë wangatrehmekun,*
Ngo ame la atr ka atreine waiewekë, ke angeic a tro meköt qëmekei angeic.
22 Triane kö la itre mekun, e tha hna sipo eamo kö,*
Ngo tro itre eje lai a eatr, e ala nyimu la ka hamë eamo.
23 Madrine la atr e ka meköt* la aqane sa i angeic,
Nge tha aqane lolo kö la trengewekë hna qaja ngöne la nyipi ijin!
24 Ame la atr ka inamacan, angeic a elë kowe la gojenyi ne mel,
Me triane la Hua* e kuhu.
25 Tro Iehova a thëtrije la uma ne la ka pi tru,
Ngo tro kö nyidrëti a thupëne la itre ifego ne la hlapa ne la sine föe.
26 Methi Iehova la itre nyinyithiina ne la atr ka ngazo,
Ngo ka wië koi nyidrë la itre trengewekë ka menyik.
27 Ame la ka huliwa qenatrekënö, angeic a axulun la itre jol* kowe la fami i angeic,
Ngo ame la atre methinëne la mani hna hamën juetrën, tro angeic a mel.
28 Ame la hni ne la atr ka meköt, ke ej a pane mekun qëmekene troa sa,*
Ngo kola tro pi qa ngöne la që ne la atr ka ngazo, la itre ewekë ka tha loi kö.
29 Ka nanyi Iehova qaathene la itre atr ka ngazo,
Ngo nyidrëti pe a drenge la thithi ne la itre atr ka meköt.
30 Kola amadrinëne la hni hnene la luemek ka hnyimahnyima;
Kola aegöcatrene* la itre jun hnene la ketre maca ka loi.
31 Ame la atre drenge la iameköti ka thue mel
Ke hetre göhne i angeic thene la itre ka inamacan.
32 Ame asë hi la itre ka xelene la ihaji, ke ka methinën la mele i angatr,
Ngo ame la atre drenge la ihaji, ke tro angeic a inamacan.*
33 Ame la xoue Iehova, ke ka ini së la inamacan,
Nge qëmekene troa kapa la iatruny, ke troa pane ipië.