Isaia
54 “Föe ka tha hnaho* fe, sue madrine jë, nyipoti ka pë nekön!
Madrine jë nyipo, ke tha hane kö nyipoti atre la akötrene la ka hnaho,
Ke ala nyimu kö la itre nekön ne la föe hna nuetrij
Hune la ka trene föe hmunë,”* öni Iehova.
2 “Atrune pi la göhnen ne la itat i nyipo.
Seluthe pi la imaano ne la uma* ka sisitria i nyipo.
The cile kö! Ngo aqeane pi la itre eno ne la itat i nyipo,
Nge acatrene ju la itre fao.
3 Ke tro nyipoti a ahuëne la itre ifego i nyipo ngöne la götrane maca me mi.
Tro la itre matra i nyipo a musinëne la itre nöj,
Me lapane la itre traone hna apatren.
4 The xou kö, ke tha tro kö a ahmahmanyi nyipo;
Nge the hmahma kö, ke tha tro kö nyipoti a hleuhleu.
Ke tro nyipoti a thëthëhmine la hmahma i nyipo ngöne lo nyipoti a jajiny,
Nge tha tro hmaca kö nyipoti a mekune lo nyipoti a hmahma, ke hna mecitriji nyipo.”
5 “Ke kösë föi* nyipoti la Atre Xup Ka Sisitria,
Iehova joxu ne la itre trongene isi e hnengödrai la ëje i nyidrë,
Lo Atre Ka Hmitrötr e Isaraela, Atre Itö nyipo.
Tro ha ati ëje i nyidrë, Akötresie ne la fene hnengödrai asë.
6 Ke ase hë Iehova hë nyipo tune la ketre föe hna nuetrij nge ka hleuhleu,
Me tune la föe ka faipoipo lo jajinyi petre kö, nge hna nuetrij pë hë,” önine la Akötresi nyipo.
7 “Ke hnenge hna nuetriji nyipo koi hnepe ijine hi,
Ngo hnene la etrune la utipineng, tro hmaca kö ni a bëeke sai nyipo.
8 Ngöne la elëhni atraqatr, hnenge hna pane nue nyipo koi hnepe ijin,
Ngo hnene la ihnimi nyipicing ka epine palua, tro ni a utipi nyipo,” öni Iehova, Atre Itö Mele i nyipo.
9 “Ame koi ni, ceitu hi la ijine cili memine la ijine i Noa.
Lo eni a sisiny laka, tha tro hmaca kö a heetrëne la fene hnengödrai hnene la iwë,
Ketre tune fe, eni a sisinyi laka, tha tro hmaca kö ni a elëhni koi nyipo me wesitrë nyipo.
10 Ke ijije hi troa fejetrij la itre wetr
Nge ijije fe troa enienijën la itre sasala,
Ngo tha tro jë kö a xome qaathei nyipo la ihnimi nyipicing,
Tha tro kö a ukeuke qaathei nyipo la isisinyikeung ne tingeting,” öni Iehova, Atre utipi nyipo.
11 “Föe ka akötre fe, nyipoti lo hna lep hnei wene nge pëkö ka aupunyi nyipo,
Tro ni a atë la itre etë i nyipo hune la sima ka catr*
Me kuca la itre trepene i nyipo hnei etë safairo.
12 Tro ni a xupe la itre hene hage i nyipo hnei etë ka paluluxötr,
Me itre qëhnelö i nyipo hnei etë ka melemel,*
Nge tro ni a nyi ifegone la itre götrane i nyipo hnei itre etë ka tru thupen.
13 Nge tro hë Iehova a inine la itre nekö i nyipoti asë,
Nge tro ha tru la tingeting ne la itre nekö i nyipo.
14 Tro ha acile huti nyipo ngöne la meköt.
Tro ha nanyi qaathei nyipo la iaxösisi,
Tha tro kö nyipoti a xou, me hmengöhmengön,
Ke tha tro kö ej a easenyi nyipo.
15 Maine tro la ketre atr a isi me nyipo,
Ke tha eni kö la ka upi angeic.
Maine tro la ketre atr a thele isi me nyipo, tro hë angeic a kei hnei nyipo.”
16 “Goeën! Eni la ka xupe la atre dreu fao,
Lo atre ufe la wanalep ngöne la eë,
Me kuca la itre jia ne isi.
Eni fe la atre xupe la atre iapatreny matre angazon asë.
17 Haawe, pëkö ca jia ne isi hna kuca nyine akötrë nyipo ka troa hun,
Nge tro nyipoti a jele ngazone la nöjei thinem ka troa cile koi nyipo ngöne la hnakootr.
Celë hi edrö ne la itre hlue i Iehova,
Nge qaathenge la meköti angatr,” öni Iehova.