Angetre Amekötin
21 Nge e Mizepa, hnene la itre trahmanyi ne Isaraela hna sisinyi ka hape: “Tha tro kö la ketre e eahun a hamëne la nekö i angeic jajinyi kowe la ketre atre Beniamina.” 2 Ame hnene la angetre Isaraela hna tro a tro Bethela, me lapa qëmekene la nyipi Akötresie uti hë e hej, me ho me treije latresi. 3 Öni angatr: “Iehova fe, Akötresi Isaraela, hnauëne laka, hna traqa tun e Isaraela? Hnauëne laka, troa patr la ketre tribu e Isaraela?” 4 Matre ame hë e hmakany, hnei angatr hna canga ilë troa xupe la ketre ita ne huuj e cili, me huujëne la itre huuj ne dreuth asë, me itre huuj ne tingeting.
5 Thupene lai, hnene la angetre Isaraela hna hnyingëne ka hape: “Drei la tribu e Isaraela ka tha hane kö elë troa cil qëmekei Iehova?” Eje hi, hnei angatre lo hna ce axeciën ka hape, ame la itre ka tha elë a tro Mizepa troa cil qëmekei Iehova, ke tro ha humuthi angatr. 6 Hace catre la hni ne la angetre Isaraela pine la ewekë ka traqa kowe la itre trejin me angatr qa Beniamina, ke öni angatr: “Ase hë apatrene la ketre tribu qa Isaraela. 7 Tro sa tune kaa matre hetre föene jë la angetre Beniamina ka mele pe, ke hne së lo hna sisinyi koi Iehova laka, tha tro kö sa hamë angatr la itre nekö së jajiny?”
8 Matre öni angatre jë hi: “Drei la tribu e Isaraela ka tha hane kö elë a tro Mizepa troa cil qëmekei Iehova?” Nge eje hi laka, pëkö ca atr qaathene la angetre Iabese-Gileada ka hane traqa troa sine la icasikeu ne la nöj. 9 Nge ame hë la kola ase e la etrune la nöj, mama ju hi laka, angetre Iabese-Gileada pe hi la ka patr. 10 Matre hnene la nöj hna up e cili la 12 000 lao soc ka catr, me hape: “Tro jë troa humuthe la angetre Iabese-Gileada hnei taua, memine la itre föe, me itre nekönatr. 11 Hane hi la nyine tro epuni a kuca: tro epuni a humuth* asë la itre trahmany, memine la itre föe ka iatre hë me trahmany.” 12 Ame hnei angatr hna öhn e Iabese-Gileada la 400 lao jajinyi ka tha iatre pala kö me trahmany. Matre hnei angatr hna xome la itre jajinyi kowe la lapa i angatr e Silo, ngöne la nöje Kanana.
13 Thupene lai, hnene la nöj hna iupi fë maca kowe la itre trahmanyi ne Beniamina ka lapa ngöne la git e Rimona, matre troa thele tingeting me angatr. 14 Ame hnene la angetre Beniamina hna bëeke hmaca, nge hna hamë angatr lo itre jajinyi ne Iabese-Gileada ka mele pe. Ngazo pe, tha ijije kö. 15 Matre hace catre la hni ne la nöj pine la tribu ne Beniamina, ke ase hë Iehova thë la aqane casine la itre tribu ne Isaraela. 16 Ame hnene la itre qatr hna hnying kowe la nöj ka hape: “Tro sa tune kaa matre hetre föene jë la itre trahmanyi ka lapa pe, ke ase hë së humuth asë la itre föe ne Beniamina?” 17 Öni angatr hmaca jë hi: “Loi e tro la angetre Beniamina ka mel a thupën la edrö i angatr, wanga patre pi la ketre tribu e Isaraela. 18 Ngo tha ijiji së kö troa hamë angatr la itre nekö së jajiny, ke hnene la nöje Isaraela hna sisinyi me hape: ‘Hnëjine hë la atre hamën la ketre föe kowe la atre Beniamina.’”
19 Matre öni angatre jë hi: “Pane dreng! E nöjei macatre, hetre feet koi Iehova e Silo, ngöne la götrane kolopi e Bethela, e koië ngöne la gojenyi ka tru ka elë qa Bethela uti hë Sekema, nge e kolojë e Lebona.” 20 Matre öni angatr kowe la itre trahmanyi ne Beniamina: “Tro jë troa zae ngöne la hnënge vin. 21 Nge ame hë la epuni a öhn la itre nekö jajinyi ne Silo a tro qa ngöne la traon me fiafia kano, qa i epun troa isa xulu qa ngöne la hnënge vin, me isa xomi* föen. Thupene lai, tro hë epuni a bëeke hmaca ngöne la itre götran ne la tribu i Beniamina. 22 Nge maine tro la itre keme i angatr me itre xa i angatr a eetre pi hun, ke tro huni a sa ka hape: ‘Pane trotrohni huni ju, ke tha ijije kö la itre föe hne huni hna xome kowe la itre trahmanyi celë ngöne la isi. Nge ame epun, tha tro kö epuni a hamë föi angatr, wanga nyizö epuni jë.’”
23 Ame hnene la itre trahmanyi ne Beniamina hna kuca tune lo hna upi angatr, me isa xomi föen thene la itre ka fiafia. Thupene lai, hnei angatr hna bëeke hmaca kowe la zi i angatr, lo hnei angatr hna kapa nyine edrö. Nge hnei angatr hna xupe hmaca me lapane la itre traon.
24 E cili, hnene la angetre Isaraela hna isaije, me isa bëeke hmaca kowe la itre tribu i angatr, me itre fami i angatr. Nge hnei angatr hna isa tro qa Silo, me isa bëeke kowe la itre zi i angatr, lo hnei angatr hna kapa nyine edrö.
25 Ngöne la ijine cili, pë pala kö joxu e Isaraela. Matre angatr a isa kuca la ka meköti* koi angatr.